ကချင်ပြည်နယ် မြစ်ကြီးနားမြို့ စီတာပူရပ်ကွက်က နောင်ရာပါကွင်းမှာ ဖေဖော်ဝါရီ ၁၆ ရက် ညနေ ၄ နာရီဝန်းကျင်မှာ အရပ်ဝတ်နဲ့ လက်နက်ကိုင်ဆောင်ထားတဲ့ စစ်ကောင်စီရဲနဲ့ စစ်သားတွေက လူငယ် ၅ ဦးထက်မနည်း ဖမ်းဆီးခေါ်ဆောင်သွားတယ်လို့ သိရပါတယ်။
“၄ နာရီလောက် ကျနော်တို့က ဘောလုံးကစားပြီး ပြန်မယ့်အချိန်မှာ အရပ်ဝတ်ကားနဲ့ လာဖမ်းသွားတာ တွေ့လိုက်တယ်။ ပါဂျဲရိုးကားနဲ့ အရပ်ဝတ်တွေပဲ သေနတ်တွေလည်းပါတယ်၊ ကျနော်တို့နဲ့ နည်းနည်းတော့လှမ်းတယ်။ အဲလို လူစုနေတာတွေ့တာနဲ့ အိမ်ကိုပဲ အမြန်ပြန်ခဲ့တာ။”
အရပ်ဝတ်နဲ့ လာရောက်ဖမ်းဆီးတဲ့သူတွေဟာ စစ်ကောင်စီတပ်သားတွေဖြစ်ပြီးတော့ လူငယ် ၅ ဦးထက်မနည်း ဖမ်းခေါ်သွားကာ ဘာကြောင့် ဖမ်းတယ်ဆိုတာတော့ မသိရသေးဘူးလို့ ဆိုပါတယ်။
“သူတို့ သေနတ်တွေ၊ ကျည်ကာတွေကို ကြည့်ရင်တော့ စစ်တပ်(စကစ)ကလူတွေပဲ၊ ရဲတွေ ပါမှာပဲ။ ကျနော်လည်း ခဏပဲတွေ့ပြီး ပြေးခဲ့ရတာဆိုတော့ အခု ပြန်ကြားရတာက ၄ ယောက် ၅ ယောက်လောက် ပါသွားတယ်ကြားတယ်။ အတိအကျတော့ မသိဘူး။”
လူငယ်တွေ ဖမ်းခံရတဲ့ နောင်ရာပါကွင်းဟာ လူငယ်အများစု အဖွဲ့လိုက် လာရောက် အပန်းဖြေလေ့ရှိတဲ့နေရာဖြစ်သလို ညနေပိုင်းမှာ အားကစားလုပ်တဲ့သူနဲ့ ဘောလုံးလာကစားတဲ့ လူငယ်တွေ အများအပြားရှိတဲ့ နေရာဖြစ်ပါတယ်။
ဖေဖော်ဝါရီ ၁၅ ရက်နေ့ညကလည်း မြစ်ကြီးနား တပ်ကုန်းဘက်မှာ ဖမ်းဆီးခံရတဲ့ လူငယ်တွေ ရှိတယ်လို့ သတင်းထွက်ပေါ်နေပါတယ်။
