ရန်ကုန်၊ သာကေတမြို့နယ်နဲ့ ကျောက်တန်းမြို့နယ်တို့မှာ ဖေဖော်ဝါရီ ၁၅ ရက်က မီးလောင်မှုတွေ ဖြစ်ပေါ်ခဲ့ပြီး လူနေအိမ် ၄ လုံး မီးလောင်ဆုံးရှုံးခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။

သာကေတမြို့နယ်၊ ၄/တောင်ရပ်ကွက်၊ မြို့မ ၁၀ လမ်းမှာ မွန်းလွဲ ၂ နာရီ ၃၅ မိနစ်လောက်က မီးလောင်မှုဖြစ်ပွားခဲ့ပြီး သွပ်မိုးပျဉ်ခင်း အိမ် ၂ လုံးနဲ့ တိုက်ခံ ၂ ထပ်အိမ် ၁ လုံး ဆုံးရှုံးခဲ့ပါတယ်။

သာကေတ လူမှုကူညီရေးအသင်း တာဝန်ရှိသူတဦးက “အိမ် ၃ လုံးပါသွားတယ်။ တထပ်အိမ်က ၂ လုံးပါ။ အသင်းကရောက်တော့ ၃ လုံးစလုံး လောင်နေပြီ။ မီးသတ်တဲ့သူတွေ ၃ ယောက်လောက် ပွန်းပဲ့ပြတ်ရှဒဏ်ရာတွေ ရတယ်” လို့ ပြောပါတယ်။

မီးလောင်မှုနေရာကို သာကေတမြို့နယ်မီးသတ်က မီးသတ်ယာဉ် ၃ စီး၊ သာကေတ အရပ်ဘက်အသင်းတွေက လာရောက်ငြှိမ်းသတ်ခဲ့ကြတာကြောင့် မွန်းလွဲ ၂ နာရီ ၄၅ မိနစ်လောက်မှာ မီးငြိမ်းသွားပါတယ်။

မီးလောင်မှုအတွင်း မီးငြှိမ်းသတ်ရေးအဖွဲ့ဝင် ၃ ဦး ပြတ်ရှ မစိုးရိမ်ရဒဏ်ရာတွေ ရရှိခဲ့ပြီး မီးလောင်မှုအကြောင်းအရင်းနဲ့ ပျက်စီးမှုတန်ဖိုး အသေးစိတ်ကို မြို့နယ်မီးသတ်က စစ်ဆေးတွက်ချက်နေဆဲ ဖြစ်ပါတယ်။

ကျောက်တန်းမြို့နယ်၊ အလယ်ပိုင်းရပ်ကွက်ရှိ ရတနာစတိုးဆိုင်ရဲ့ အပေါ်ထပ် ပစ္စည်းသိုလှောင်ခန်းမှာ ဖေဖော်ဝါရီ ၁၅ ရက် မနက် ၈ နာရီလောက်က မီးလောင်မှုဖြစ်ပွားခဲ့တာကြောင့် မြို့နယ်မီးသတ်က level 1 အဆင့် မီးငြှိမ်းသတ်ရေးယာဥ်တွေနဲ့ လာရောက် ငြှိမ်းသတ်ခဲ့ကြပါတယ်။

မီးလောင်မှုကြောင့် စတိုးဆိုင်အပေါ်ထပ်တခုလုံး ဆုံးရှုံးခဲ့ပြီး မီးသတ်နဲ့ အရပ်ဘက်အသင်းတွေ ပူးပေါင်းငြှိမ်းသတ်ခဲ့တာကြောင့် မနက် ၈ နာရီ ၂၃ မိနစ်လောက်မှာ မီးငြိမ်းသွားပါတယ်။

‌မြို့နယ်မီးသတ်တပ်ဖွဲ့ဝင်တဦးက “အသေးစိတ်ကတော့ စစ်ဆေးနေဆဲပါ။ လောင်တာက အပေါ်ထပ်က ပစ္စည်းထားတဲ့နေရာမှာ။ အောက်ထပ်က ဆိုင်ခန်း‌တွေရှိတယ်။ မီးထဲပါသွားတာက အပေါ်တထပ်လုံးပါပဲ။ လူထိခိုက်မိတာတော့ မရှိဘူး” လို့ ပေြာပါတယ်။

မီးလောင်ရတဲ့အကြောင်းအရင်းနဲ့ ပျက်စီးဆုံးရှုံးမှုတန်ဖိုး အသေးစိတ်ကို ကျောက်တန်းမြို့နယ် မီးသတ်က စစ်ဆေးတွက်ချက်နေဆဲဖြစ်ပြီး မီးလောင်မှုအတွင်း လူထိခိုက်မှုမရှိဘူးလို့ သိရပါတယ်။