မန္တလေးတိုင်း၊ မြင်းခြံမြို့နယ်မှာ စစ်ကောင်စီတပ်ကို ပြည်သူ့ကာကွယ်ရေးတပ်တွေက ဝင်ရောက်တိုက်ခိုက်ပြီး စစ်ကောင်စီဘက်က အနည်းဆုံး ၁၈ ယောက်သေဆုံး၊ ပြည်သူ့ကာကွယ်ရေးဘက်က ၁ ယောက် ကျဆုံးခဲ့ပါတယ်။
မြင်းခြံမြို့နယ်၊ စံပြကျေးရွာမှာ တပ်စွဲထားတဲ့ စစ်အုပ်စုကို ဖေဖော်ဝါရီ ၂ ရက်နေ့ ညနေ ၄ နာရီခွဲမှာ စခန်းသိမ်းဝင်ရောက်တိုက်ခိုက်ခဲ့လို့ စစ်ကောင်စီဘက်က သေဆုံးသူ များပြားပြီး ပြည်သူ့ကာကွယ်ရေးတပ် Myingyan Black Tiger က ရဲဘော် ၁ ယောက် ကျဆုံးခဲ့တယ်လို့ မြင်းခြံခရိုင် ပကဖရဲ့ သတင်းပြန်ကြားရေးတာဝန်ခံက ပြောပါတယ်။
သတင်းပြန်ကြားရေးတာဝန်ရှိသူ ကိုကောင်းဆင့်က “စကစဘက်က အနည်းဆုံး ၁၀ ယောက် ကျ၊ မိမိတို့ဘက်က ၁ ယောက်ကျ၊ ၁ ယောက် ဒဏ်ရာရ၊ MA1- ၃ လက်၊ ကာဘိုင် ၁ လက် ရရှိခဲ့ပါတယ်” လို့ ပြောပါတယ်။
အပြန်လှန်ထိတွေ့တိုက်ပွဲ ၄၅ မိနစ်လောက် ဖြစ်ပွားခဲ့ပြီး စစ်ကူကား ၈ စီး ရောက်ရှိ လာချိန်မှာလည်း မဟာမိတ်တပ်ဖွဲ့တွေက ကြားဖြတ်တိုက်ခိုက်ခဲ့လို့ ဒီတိုက်ပွဲတခုလုံးမှာ စစ်အုပ်စုက ၁၅ ယောက်နဲ့အထက် သေဆုံးတယ်လို့လည်း နွားထိုးကြီး ပကဖက သတင်းထုတ်ပြန်ပါတယ်။
တိုက်ခိုက်မှုအပြီးမှာ စစ်အုပ်စုက စံပြရွာကို စီးနင်းနေတဲ့အတွက် စံပြရွာဒေသခံတွေ ထွက်ပြေးတိမ်းရှောင်နေကြရပါတယ်။
ဒီတိုက်ခိုက်မှုကို မြင်းခြံမြို့နယ် ပကဖ၊ နွားထိုးကြီးမြို့နယ် ပကဖ၊ မြင်းခြံခရိုင် တပ်ရင်း ၁၊ ၄ နဲ့ ၈၊ Myingyan Black Tiger၊ ဗိုလ်စား ပြောက်ကျားတပ်ဖွဲ့၊ ဗိုလ်စက္ကအဖွဲ့၊ မန္တလေးခရိုင် တပ်ရင်း ၃ တို့ ပူးပေါင်းတိုက်ခိုက်ခဲ့တယ်လို့ သိရပါတယ်။
