အမျိုးသားညီညွတ်ရေးအစိုးရ (NUG) ဝန်ကြီးတွေ၊ ပြည်ထောင်စုလွှတ်တော် ကိုယ်စားပြုကော်မတီ (CRPH) တာဝန်ရှိသူတွေနဲ့ အမေရိကန်ရောက် မြန်မာအသိုက်အဝန်းနဲ့ တွေ့ဆုံပွဲကို ဒေသစံတော်ချိန် ဇန်နဝါရီ ၂၈ ရက်က အမေရိကန်ပြည်ထောင်စု မြို့တော် ဝါရှင်တန်ဒီစီရှိ NUG နိုင်ငံခြားရေးရုံးမှာ ကျင်းပပါတယ်။
ပြည်ထောင်စုလွှတ်တော်ကိုယ်စားပြုကော်မတီ ဥက္ကဋ္ဌ ဦးအောင်ကြည်ညွန့်၊ နိုင်ငံခြားရေးဝန်ကြီးဌာန ဝန်ကြီး ဒေါ်ဇင်မာအောင်၊ ဒုဝန်ကြီး ဦးမိုးဇော်ဦး၊ ဆက်သွယ်ရေး သတင်းအချက်အလက်နှင့် နည်းပညာဝန်ကြီး ဦးထင်လင်းအောင်၊ လူ့အခွင့်အရေးဆိုင်ရာ ဒုဝန်ကြီး ဦးအောင်ကျော်မိုး၊ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း၊ သမ္မတရုံး ပြောရေးဆိုခွင့်ရှိသူ ဦးကျော်ဇော်တို့နဲ့ အမေရိကန်ရောက် မြန်မာနွယ်ဖွား တိုင်းရင်းသားပြည်သူလူထုတွေ ရင်းရင်းနှီးနှီး တွေ့ဆုံ ဆွေးနွေးခဲ့ကြတာ ဖြစ်ပါတယ်။
ဝါရှင်တန်ဒီစီရောက် မြန်မာတွေက နိုင်ငံခြားရေးကိစ္စတွေနဲ့ ပတ်သက်လို့ တရုတ်နိုင်ငံနဲ့ ဆက်ဆံရေး၊ မြန်မာနိုင်ငံအတွင်းက တရုတ်စီမံကိန်းတွေအရေး၊ အနောက်အင်အားကြီး နိုင်ငံတွေနဲ့ဆက်ဆံရေး စတာတွေကို အဓိကမေးမြန်းခဲ့တာကို တွေ့ရပါတယ်။
ဒီမေးမြန်းချက်တွေနဲ့ပတ်သက်ပြီး နိုင်ငံခြားရေးဝန်ကြီးဌာနစတင်ထူထောင်ကတည်းက ကြေညာခဲ့တဲ့ မူဝါဒ၊ ထုတ်ပြန်ချက်တွေအတိုင်း တစိုက်မတ်မတ်ရှိနေပြီး လွတ်လပ်ပြီး တက်ကြွတဲ့ နိုင်ငံခြားရေးမူဝါဒကိုကိုင်စွဲထားတယ်လို့ ဝန်ကြီးဒေါ်ဇင်မာအောင်က ပြန်လည်ဖြေကြားခဲ့ ပါတယ်။
တရုတ်တနိုင်ငံတည်းမူနဲ့ပတ်သက်ပြီးလည်း မြန်မာဘာသာထုတ်ပြန်ချက်ကိုသာ အတည်ယူဖို့ နိုင်ငံခြားရေးဝန်ကြီး ဒေါ်ဇင်မာအောင်က ပြည်သူတွေမေးမြန်းတဲ့မေးခွန်းတွေကို ဖြေကြားခဲ့ပါတယ်။
သုတချမ်းသာ
