ရန်ကုန်၊ မြောက်ဒဂုံမြို့နယ်မှာ အသက် ၄ နှစ်ခွဲအရွယ် မိန်းကလေးတယောက် အဆိပ်ရှိ အကောင်ကိုက်ခံရတာကြောင့် ဆေးရုံ ၂ ရုံ လွှဲပြောင်းကုသပေမဲ့ သေဆုံးသွားတယ်လို့ ဝန်းရံမှူး လူမှုကူညီရေးအသင်းတာဝန်ရှိသူက ပြောပါတယ်။
မြောက်ဒဂုံ ၄၈ ရပ်ကွက်၊ အောင်တံခွန်လမ်းမှာ နေထိုင်တဲ့ ကလေးငယ်ဟာ ဇန်နဝါရီ ၆ ရက် နေ့လယ် ၁၂ နာရီကျော်က အိမ်ရှေ့မှာ ဆော့ကစားရင် မျက်လုံးပြာပြီး အော့အန်တာကြောင့် မိသားစုဝင်တွေက ကန်စွန်းရွက်အရည် တိုက်ခဲ့ကြပါတယ်။
ဝန်းရံမှူး လူမှုကူညီရေးအသင်းတာဝန်ရှိသူက “အကောင်ကိုက်ခံရတာကို ကလေးဆိုတော့ မသိတော့ ကြွက်ကိုက်ခံရတာလို့ပဲ ပြောတာ။ ညာဘက် လက်ဖမိုးမှာလည်း အပေါက် ၂ ပေါက်နဲ့။ အသင်းကိုရောက်တော့ ကလေးက အဆိပ်တက်နေပြီ။ မြောက်ဥက္ကလာဆေးရုံရောက်တော့ ဒါကလည်း ကလေးဆိုတော့ ရန်ကင်း ကလေးဆေးရုံကို ထပ်လွှဲပေးတာ။ ကလေးဆေးရုံရောက်တော့ မမီတော့ဘူး။ ဆုံးပါးသွားပါတယ်” လို့ ပြောပါတယ်။
နေ့လယ် ၁ နာရီလောက်မှာ ဝန်းရံမှူး ကယ်ဆယ်ရေးအသင်းယာဉ်နဲ့ မြောက်ဥက္ကလာပ မေဓာဝီဆေးရုံကို ပို့ဆောင်ပေးခဲ့ကြပြီး အဲဒီဆေးရုံကတဆင့် ရန်ကင်းကလေးဆေးရုံကို သွားရောက်ကုသခိုင်းခဲ့တာ ဖြစ်ပါတယ်။
ကလေးမိသားစုဝင်တယောက်က “နေ့လယ် ၁ နာရီလောက်မှ သိတာ။ သူက ကြောင်ပန်းရွက်တွေခူးပြီးတော့ အိမ်ပေါ်မှာ ဆော့နေကျပါ။ အိမ်နားမှာလည်း သစ်ပုံ အဟောင်းရှိတယ်။ ကလေးက မျက်လုံးတွေပြာလာပြီး ခေါင်းမူးတယ်ပြောတယ်။ အန်လည်း အန်လာလို့ အစာအဆိပ်သင့်တယ်ထင်ပြီး ကန်စွန်းရွက်ထောင်းတိုက်တာတွေ လုပ်ခဲ့ပါသေးတယ်။ လက်က ဒဏ်ရာတော့မသိလိုက်ဘူး။ ကလေးဆုံးသွားတာတော့ နေ့လယ် ၂ နာရီကျော်လောက်ပါ” လို့ ပြောပါတယ်။
ရန်ကင်းဆေးရုံမှာ ကုသခဲ့ပေမဲ့ လက်ဖမိုးမှာ မြွေကိုက်ထားသလို ထိုးသွင်းရာ ၂ ပေါက် ရှိနေတဲ့ အသက် ၄ နှစ်ခွဲအရွယ် မအိန္ဒြာကျော်ဟာ မွန်းလွဲ ၂ နာရီကျော်မှာ အဆိပ်တက် သေဆုံးသွားခဲ့ပါတယ်။
ရန်ကင်းဆေးရုံကနေ သေဆုံးသူ ရုပ်အလောင်းကို မိသားစုနေအိမ်ကို ပြန်ပို့ပေးထားပြီး အိမ်ကတဆင့် မေဓာဝီဆေးရုံ၊ ရင်ခွဲရုံကို Medical လူငယ်များအသင်းယာဉ်နဲ့ ပို့ဆောင်ပေးခဲ့တယ်လို့ သိရပါတယ်။
