ဂွါတီမာလာ သမ္မတဟောင်း အော့တို ပီရက်ဇ်ဟာ အဂတိလိုက်စားမှုနဲ့ ၂၀၁၅ ခုနှစ်ကတည်းက ၈ နှစ်ကြာ ထောင်ကျခဲ့ပြီးနောက်မှာ နေအိမ်အကျယ်ချုပ် ကျသွားပြီလို့ သူ့ရဲ့ရှေ့နေ ဆီဇာ ကယ်လ်ဒရွန်က ဇန်နဝါရီ ၄ ရက်မှာ ပြောကြားခဲ့ပါတယ်။

သမ္မတဟောင်း ပီရက်ဇ်ဟာ ဇန်နဝါရီ ၃ ရက်  ညနေပိုင်းမှာ အကျဉ်းထောင်ကနေ ထွက်ခွာသွား ကြောင်း ရှေ့နေ ကယ်လ်ဒရွန်က ရိုက်တာကို ပြောပါတယ်။ 

ပီရက်ဇ်ဟာ အကျဉ်းထောင်မှ ထွက်ခွာပြီး နေအိမ်အကျယ်ချုပ် ကျခံရဖို့အတွက် ဒေါ်လာ ၃၈,၀၀၀ အာမခံငွေ ပေးချေရပြီး အပေါင်ပစ္စည်းအဖြစ် ဒေါ်လာ ၁ ဒသမ ၂ သန်းတန်ဖိုးရှိ အိမ်ရာ ၂ ခုကို ထားရှိခဲ့ရကြောင်းလည်း ကယ်လ်ဒရွန်က ပြောဆိုပါတယ်။ 

အငြိမ်းစားဗိုလ်ချုပ်ကြီး ပီရက်ဇ်ဟာ ဗဟိုအမေရိကနိုင်ငံကို ၂၀၁၂ ခုနှစ်မှ ၂၀၁၅ ခုနှစ်အထိ အုပ်ချုပ်ခဲ့တာဖြစ်ပြီး အကျင့်ပျက်ခြစားမှု အရှုပ်တော်ပုံတွေနဲ့ပတ်သက်တဲ့ ဆန္ဒပြမှုတွေအကြား သူ့ရာထူးသက်တမ်း ၄ လ သာ ကျန်တော့တဲ့အချိန်မှာ နုတ်ထွက်ဖို့ တွန်းအားပေးခံခဲ့ရတာပါ။

၂၀၂၂ ခုနှစ်နှောင်းပိုင်းမှာ ပီရက်ဇ်ဟာ တရားမ၀င် အသင်းအဖွဲ့မှာ ပါဝင်မှုနဲ့ အကောက်ခွန် လိမ်လည်မှု စွဲချက်တွေနဲ့ ထောင်ဒဏ် ၁၆ နှစ် ချမှတ်ခံခဲ့ရပါတယ်။ 

ပီရက်ဇ်ဟာ သီးခြားအမှုတွဲတခုမှာလည်း ငွေကြေးခဝါချမှုနဲ့ လိမ်လည်မှုစွဲချက်တွေနဲ့ မနှစ်တုန်းက နောက်ထပ် ထောင်ဒဏ် ၈ နှစ် ချမှတ်ခံခဲ့ရပါတယ်။

အကျဉ်းချခံနေရဆဲဖြစ်တဲ့ သူ့ရဲ့ဒုသမ္မတ ရိုခ်ဆာနာ ဘောလ်ဒက်တီနဲ့အတူ ပီရက်ဇ် ဟာ သူတို့ရဲ့အုပ်ချုပ်မှု ကာလအတွင်း နိုင်ငံတော်ဘဏ္ဍာငွေ ဒေါ်လာ ၃.၅ သန်းလောက်ကို ခိုးယူခဲ့တဲ့ အကောက်ခွန်လိမ်လည်မှု ကွန်ရက်ကို ဦးဆောင်ခဲ့တယ်လို့ စွပ်စွဲခံခဲ့ရတာပါ။ 

လာ-လီနယာလို့ သိကြတဲ့ အဲဒီအမှုကို ကုလသမဂ္ဂက ကျောထောက်နောက်ခံပေးထားတဲ့ ဂွါတီမာလာနိုင်ငံရှိ လွတ်ငြိမ်းချမ်းသာခွင့်ဆိုင်ရာ နိုင်ငံတကာကော်မရှင် (CICIG) အောက်မှာ အရင်ဆုံး စုံစမ်းစစ်ဆေးခဲ့တာ ဖြစ်ပါတယ်။ 

ပီရက်ဇ်ကတော့ ဒီအမှုရဲ့ နောက်ကွယ်မှာ ရှိနေတဲ့ CICIG ကော်မရှင်ဟာ အမေရိကန်သံရုံးရဲ့ လက်နက်တခု ဖြစ်ပြီး အမေရိကန်ရဲ့ စွက်ဖက်မှုကို ထပ်ပြီး ရှုတ်ချပါတယ်လို့ ပြောပါတယ်။ 

Source/Photo - Reuters