နေပြည်တော်ကောင်စီနယ်မြေမှာ  စက်သုံးဆီဝယ်ယူရ လွယ်ကူလာပြီလို့ ပြောနေပေမဲ့  ဒီဇင်ဘာ ၁၈ ရက် လက်ရှိအချိန်အထိ ဆီဆိုင်တွေမှာ အများပြည်သူတွေ တန်းစီပြီးဝယ်ယူနေရဆဲပဲလို့ ဒေသခံတွေက ပြောကြပါတယ်။

ပြီးခဲ့တဲ့သီတင်းပတ်တွေက  92 နဲ့ 95  စက်သုံးဆီကို ဓာတ်ဆီဆိုင်တွေမှာ ဝယ်ယူဖို့ ခက်ခဲခဲ့ပြီး   ၁ လီတာကို ပြင်ပပေါက်ဈေး ကျပ် ၆၀၀၀ လောက်အထိ ပေးဝယ်ခဲ့ရတာပါ။

အခုလက်ရှိမှာတော့ နေပြည်တော်မှာ 92 ၁ လီတာကို ၂၄၈၅ ကျပ် လောက်နဲ့  ဆီပန့်ကြီး တွေမှာလည်း လိုသလောက်ဝယ်ယူလို့ရနေပြီဖြစ်လို့  အရင်လောက်မခက်ခဲတော့ပေမဲ့ တန်းစီစနစ်နဲ့တော့ ဝယ်ယူနေရဆဲဖြစ်တယ်လို့ ဒေသခံတွေက ဆိုပါတယ်။

ဓာတ်ဆီအမျိုးအစားဖြစ်တဲ့ 92 နဲ့ 95 ကို ဝယ်ယူရ လွယ်ကူလာပြီဖြစ်ပေမဲ့ ပရီမီယံဒီဇယ်နဲ့ ရိုးရိုးဒီဇယ်ကတော့ နေပြည်တော်ကို ဝင်ရောက်မှု နည်းပါးနေဆဲဖြစ်ပြီး ဝယ်ယူရခက်ခဲတယ်လို့ လည်း သိရပါတယ်။