တိုက်ပွဲဖြစ်ပွားနေတဲ့ ရှမ်းပြည်မြောက်ပိုင်း သိန္နီမြို့မှာ ဒီဇင်ဘာ ၁၀ ရက်ညက ရပ်ကွက် ၁ (ဈေးတန်းရပ်)ထဲ လက်နက်ကြီးကျတာကြောင့် လမ်းမကြီးဘေးက ဈေးဆိုင်ခန်းတွေရော၊ နေအိမ်နဲ့တွဲပြီး ဖွင့်ထားတဲ့ အိမ်တွေပါ မီးလောင်ပြာကျသွားပါတယ်။
မနေ့ည ၁၀ နာရီကျော်လောက်မှာ လေယာဉ်ပျံသံကြားပြီး ည ၁၀ နာရီခွဲလောက် မြို့ထဲမှာ မီးလောင်မှုဖြစ်ပွားကြောင်း၊ သိန္နီလမ်းမကြီးပေါ်ရှိ အိပ်ပန်းလက်ဖက်ရည်ဆိုင်ကစ မြောက်ဘက် ပန်းကမ္ဘာကုန်စုံဆိုင်ထိ နေအိမ်နဲ့ ဆိုင်ခန်းပေါင်း ၁၀ ကျော် မီးထဲပါသွားတယ်လို့ သိန္နီဒေသခံ ၁ ဦးက ပြောပါတယ်။
“ကျမတို့က စစ်ဘေးရှောင်နေတော့ မြို့ထဲကျန်ခဲ့သူက ဖုန်းဆက်လာလို့သိရတာပါ။ စစ်တပ်က လေယာဉ်နဲ့ လာပစ်တာလို့လည်း ပြောတယ်။ ည ၁၀ နာရီခွဲလောက်ကနေစပြီး တညလုံးလောင်တာ၊ မီးသတ်ကားလည်းမရှိဘူး၊ ပရဟိအဖွဲ့တွေပဲ တတ်နိုင်သလောက် ငြိမ်းကူကြတယ်။ မနက် ၆ နာရီကျမှ မီးညွန့်ကျိုးတယ်၊ အိမ်ရော ဆိုင်ခန်းရော ၁၀ ကျော် ပါသွားတယ်၊ အများစုက အပေါ် ထပ်မှာ လူနေပြီး အောက်ထပ်မှာ ဆိုင်ဖွင့်ထားကြတာလေ။ ထိခိုက်ဒဏ်ရာရတာတော့ မကြားမိဘူး။”
သိန္နီမြို့မှာ မြောက်ပိုင်းမဟာမိတ်တပ်ဖွဲ့နဲ့ စစ်ကောင်စီတပ်တို့ကြား တိုက်ပွဲဖြစ်နေတာ ၁ လခွဲလောက်ရှိပြီဖြစ်ပါတယ်။
မြောက်ပိုင်းမဟာမိတ်တပ်က ၁၀၂၇ အော်ပရေးရှင်းကြေညာပြီးနောက် သိန္နီမြို့အရှေ့ဘက် နဲ့ အရှေ့ မြောက်ဘက်တိုးဂိတ်၊ စစ်ကောင်စီစစ်ဆေးရေးဂိတ်၊ ရဲကင်းတွေ၊ သိန္နီမြို့မရဲစခန်း၊ မီးသတ်ရုံး၊ မြို့နယ်ထွေအုပ်ရုံးတွေကို သိမ်းပိုက်ထားပါတယ်။
မြောက်ပိုင်းမဟာမိတ် အထူးသဖြင့် ကိုးကန့်တပ်ဖွဲ့တွေဟာ သိန္နီမြို့ထဲမှာ ဝင်ရောက်နေရာယူပြီး သိန္နီမြို့ အနောက်တောင်ဘက်ရှိ စစ်ကောင်စီရဲ့ စကခ ၁၆ ဌာနချုပ်အပါအဝင် လားရှိုး-သိန္နီ ကားလမ်းဘေးရှိ စစ်ကောင်စီတပ်စခန်းတွေ ဆက်လက်သိမ်းပိုက်နိုင်ဖို့ ကြိုးစားနေပါတယ်။
စစ်ကောင်စီဘက်က လေယာဉ်နဲ့လာကူတိုက်တဲ့အခါ ဒေသခံရဲ့ နေအိမ်တွေထဲ လက်နက်ကြီးကျ ပြီး အရပ်သားတွေပါ သေဆုံးဒဏ်ရာရခဲ့ကြပါတယ်။
အထူးသဖြင့် ကောင်းဟော်ရပ်ကွက်၊ ဟိုတာ့ရပ်ကွက်၊ ခူးဝိန်းကျေးရွာ၊ တိုင်ယက်ကျေးရွာ၊ မိုင်းပါးကျေးရွာတွေမှာ နေအိမ်တွေ ပျက်စီးပြီး ထိခိုက်သေဆုံးသူတွေရှိကြောင်း၊ ဖုန်းလိုင်း၊ အင်တာနက်လိုင်းတွေ မရတာကြောင့် ထိခိုက်ဆုံးရှုံးမှုစာရင်း အတိအကျမရဘဲ ကောင်းဟော် ရပ်ကွက်မှာ အမျိုးသား ၁ ဦး၊ မိုင်းပါးရွာမှာ အမျိုးသား ၂ ဦးနဲ့ အမျိုးသမီး ၁ ဦးသေဆုံးခဲ့တယ်လို့ သိန္နီဒေသခံက ပြောပါတယ်။
အောက်တိုဘာ ၂၇ က စတင်တဲ့ တိုက်ပွဲတွေကြောင့် သိန္နီမြို့တွင်းနဲ့ အနီးနားတဝိုက်ကျေးရွာက ပြည်သူ ၆၀၀၀ ကျော် ဘေးလွတ်ရာဘုန်းကြီးကျောင်းတွေမှာ သွားရောက်ခိုလှုံနေရပါတယ်။
