တနင်္သာရီတိုင်း၊ ထားဝယ်မြို့ ထားဝယ်-ရေဖြူကားလမ်းမပေါ်မှာ အသစ်ဆောက်လုပ်နေတဲ့ အကျဥ်းထောင်အသစ်လုပ်ငန်းခွင်ကို ဒေသခံ PDF တပ်ဖွဲ့ဝင်တွေ ဒီနေ့မနက် ရောက်လာပြီး ဘက်ဟိုးယာဥ် ၂ စီးကို မီးရှို့သွားတယ်လို့ မြို့ခံတွေဆီက သိရပါတယ်။
"စစ်တပ်က ဆောက်နေတဲ့ အကျဥ်းထောင်အသစ် စီမံကိန်းမှာ ဒေသခံတွေကို မလုပ်ဖို့ပြောတယ်။ ရိုက်တာ နှက်တာမရှိဘူး။ အကျဥ်းထောင်အသစ် ဆက်ပြီး ဆောက်လို့မရအောင် လုပ်ငန်းခွင်ထဲက ပစွည်းတွေမီးရှို့သွားတယ်။"
ထားဝယ်မြို့နယ်အထွက်မှာ အသစ်ဆောက်လုပ်နေတဲ့ ထားဝယ်အကျဥ်းထောင်အသစ် လုပ်ငန်းခွင်ထဲမှ ဘက်ဟိုး ၂ စီးကို PDF ပူးပေါင်းအဖွဲ့က မီးရှို့ကာ အလုပ်သမား ၂ ဦးကို ဖမ်းဆီးခေါ်ဆောင်သွားတယ်လို့ အုပ်ချုပ်ရေးနဲ့နီးစပ်သူတဦးက ဒီဗွီဘီကို ပြောပါတယ်။
"ဒီနေ့မနက်မှာဖြစ်တာ၊ အကျဥ်းထောင်လုပ်ငန်းခွင်ကို တပ်က လုံခြုံရေးမပေးနိုင်ဘူး။ မနက်ကတော့ အပြန်အလှန်ပစ်ခတ်မှုတွေ ဖြစ်သေးတယ်၊ ၂ ဦးအဖမ်းခံရတယ်၊ ဝန်ထမ်းမဟုတ်ဘူး၊ ဆောက်လုပ်ရေးလုပ်ငန်းခွင်ထဲက အလုပ်သမားတွေ။"
လက်တလောမှာ စစ်ကောင်စီတပ်ဟာ ဘုရားမဲစစ်ဆေးရေးဂိတ်ကို အင်အားဖြည့်တင်းထားပြီး စစ်ဆေးနေတယ်လို့ မြို့ခံတွေဆီက သိရပါတယ်။
ပြီးခဲ့တဲ့ စက်တင်ဘာ ၃၀ ရက်ကလည်း ထားဝယ်အကျဉ်းထောင်မှာ ထောင်ဝန်ထမ်း ၂ ဦး အသတ်ခံရပြီး အကျဥ်းသား ၅ ဦး ထွက်ပြေးလွတ်မြောက်ခဲ့ပါတယ်။
