ကရင်ပြည်နယ်၊ ကော့ကရိတ်မြို့တွင်းနဲ့ မြို့ပြင်နေရာတွေမှာ ဒီဇင်ဘာ ၁ ရက် မနက် ၅ နာရီလောက်ကစတင်ပြီး စစ်ကောင်စီတပ်နဲ့ K.N.L.A ပူးပေါင်းတပ်ဖွဲ့တို့ တိုက်ပွဲတွေ ပြင်းထန်နေတယ်လို့ မြို့ခံလူမှုကူညီရေးအသင်းတွေဆီက သိရပါတယ်။

နိုဝင်ဘာ ၁၇ ရက်က တပ်မဟာ ၆ နယ်မြေ ကော့ကရိတ်ခရိုင်အတွင်းက ဌာနဆိုင်ရာဝန်ထမ်းတွေ စစ်ကောင်စီအုပ်ချုပ်ရေး ယန္တရားက‌နေ ၇ ရက်အတွင်း အမြန်ဆုံး ထွက်ခွာသွားပေးဖို့ ကော့ကရိတ်မြို့နယ်၊ အမြဲတမ်းကော်မတီက ထုတ်ပြန်ပြီးနောက် တိုက်ပွဲတွေ ပြန်လည်ဖြစ်ပွားခဲ့တာပါ။

ဒီကနေ့မနက် ၂ လောက်ကစတင်ပြီး ကော့ကရိတ်မြို့တွင်းကို လေကြောင်းကနေ ဗုံးတလုံး ကြဲချခဲ့ပြီးနောက် မနက် ၅ နာရီလောက်ကစတင်ပြီး ရုံးကြီးအနောက်၊ သပြေကုန်း၊ မြို့တော်ဦး၊ အမှတ် ၁ ချောင်းတောင် (မြေစာရင်းရုံး)၊ မြို့အဝင် ကြာပန်းအဝိုင်းနဲ့ ခနိမ့်မူတွေမှာ တိုက်ပွဲဖြစ်ပွားနေတာဖြစ်ပြီး နှစ်ဖက်တိုက်ပွဲပြင်းထန်နေတာလို့ ဆိုပါတယ်။

မြို့ခံလူမှုကူညီရေးအသင်းဝင်တဦးက “ထိခိုက်မှုတွေတော့ ရှိတယ်။ ကျနော်တို့တွေကော တခြားလူတွေကော အပြင်ကိုထွက်လို့မရသေးတာ။ တိုက်ပွဲအခြေအနေက အခု ၅ မိနစ်လောက်ရှိပြီ နည်းနည်းငြိမ်သွားတာ။ တမနက်လုံးက ကြမ်းနေတယ်။ မြို့တပတ်လုံးမှာ တိုက်ပွဲဖြစ်နေတာ” လို့ ပြောပါတယ်။

မနက် ၁၀ နာရီလောက်က နှစ်ဖက်တိုက်ပွဲအတွင်း စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူတွေ ထိခိုက်ဒဏ်ရာရရှိသူတွေရှိပြီး အရေအတွက် အတိအကျကိုတော့ မသိရသေးဘူးလို့ ဆိုပါတယ်။

ဒါအပြင် ကော့ကရိတ်မြို့ ဌာနဆိုင်ရာရုံးတချို့ မီးလောင်ပျက်စီးတာတွေရှိပြီး ကော့ကရိတ်-မြဝတီ (အာရှလမ်း) လမ်းမကြီးကို ပိတ်ထားတာကြောင့် ယာဉ်တွေ ရပ်နားထားရတယ်လို့ ယာဉ်မောင်းတဦးက ပြောပါတယ်။

နှစ်ဖက်တိုက်ပွဲအခြေအနေကို စစ်ကောင်စီတပ်ဖွဲ့နဲ့ နီးစပ်သူတွေ၊ ကရင်အမျိုးသားလွတ်မြောက်ရေးတပ် (K.N.L.A) ပူးပေါင်းတပ်ဖွဲ့ တာဝန်ရှိသူတွေကို ဆက်သွယ်မေးမြန်းဖို့ ဒီဗွီဘီက ကြိုးစားခဲ့ပေမဲ့ ဆက်သွယ်လို့ မရသေးပါဘူး။

အောက်တိုဘာ ၂၇ ရက် မနက် ၅ နာရီလောက်ကစတင်ပြီး ကော့ကရိတ်မြို့မှာ စစ်ကောင်စီတပ်ဖွဲ့တွေ လုပ်ခြုံရေးရယူထားတဲ့ နေရာတွေကို KNLA ပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့ပြီး တိုက်ပွဲပြင်းထန်ခဲ့ရာ စစ်ကောင်စီလက်အောက်ခံ ရဲသတင်းတပ်ဖွဲ့ရုံး၊ စစ်ဘက်ဆိုင်ရာ လုံခြုံရေးရုံး ၂ ခု မီးရှို့ဖျက်ဆီးခဲ့ပြီး လက်နက်ခဲယမ်းတွေ သိမ်းဆည်းရမိခဲ့ပါတယ်။