ရန်ကုန်မြို့၊ အင်းစိန်မြို့နယ်ရှိ စစ်တပ်ပိုင် ဦးပိုင်ကုမ္ပဏီ ကားဝင်းကို နိုဝင်ဘာ ၂၉ ရက် ညက ဗုံးနဲ့ ပစ်ခတ်တိုက်ခိုက်ခံခဲ့ရတယ်လို့ ဒေသခံတွေဆီက သိရပါတယ်။

အင်းစိန်မြို့နယ်၊ သီရိမင်္ဂလာလမ်း (ဂျပန်လမ်း) ပေါ်ရှိ စစ်ကောင်စီရဲ့ အဓိက ဒေါက်တိုင်ဖြစ်တဲ့ ဦးပိုင်ကုမ္ပဏီ ကားဝင်းကို မနေ့ည ၇ နာရီ မိနစ် ၄၀ လောက်မှာ ပစ်ခတ်တိုက်ခတ်ခံခဲ့​ရတယ်လို့ အင်းစိန်မြို့ခံတဦးက ပြောပါတယ်။

“ညက ၇ နာရီခွဲကျော်လောက်ရှိမယ်။ အင်းစိန် ဂျပန်လမ်းဘက်မှာ ဗုံးပေါက်သံ နှစ်ချက်ကြားလိုက်တာ။ အသံကတော့ တော်တော်ကျယ်တယ်။ ဦးပိုင်ကားဝင်းထဲမှာ ပေါက်တာ။ ဘာတွေဖြစ်လဲတော့ ကျနော်တို့လည်း သွားမကြည့်ရဲဘူး။ လက်ရှိအခြေအနေကတော့ လမ်းပိတ်တယ်၊ တားတယ်၊ စစ်တယ်၊ မသင်္ကာရင် အဖမ်းခံရရော။”

အဲ့ဒီတိုက်ခိုက်မှုကိုတော့ မြို့ပြစစ်ဆင်ရေး Urban Special Operation (USO) အဖွဲ့က ၄၀ မမ ဗုံးသီး ၂ လုံးနဲ့ ပစ်ခတ်တိုက်ခိုက်ခဲ့ကြောင်းနဲ့ လက်ရှိမှာ မြို့ပြစစ်ဆင်ရေး အခြေစိုက်မြို့တွေမှာ တော်လှန်ရေးသင်္ကေတတခုဖြစ်တဲ့ အနက်ရောင်အလံကို စတင်လွှင့်ထူပြီဖြစ်ကြောင်း USO အဖွဲ့က အသိပေး ထုတ်ပြန်ထားပါတယ်။

ကားဝင်းပေါက်ကွဲမှု ဖြစ်ပွားပြီးနောက် အင်းစိန်မြို့နယ် သီရိမင်္ဂလာလမ်း (ဂျပန်လမ်း)၊ အောက်မင်္ဂလာဒုံလမ်းနဲ့ ပြည်လမ်းမတွေမှာ စစ်ကောင်စီအဖွဲ့က လမ်းတွေပိတ်ဆို့ထားပြီး စစ်ဆေးနေပါတယ်။