တကယ်လို့ ကျန်းမာရေးစနစ်ကို မပြုပြင်ရင် ဂါဇာကမ်း‌မြောင်မှာ လူတွေဟာ ဗုံးပေါက်ကွဲမှုကြောင့်ထက် ရောဂါနဲ့ သေဆုံးနိုင်ခြေ ပိုများတယ်လို့ ကမ္ဘာ့ကျန်းမာရေးအဖွဲ့ (WHO) ရဲ့ ပြောရေးဆိုခွင့်ရှိသူက နိုဝင်ဘာ ၂၈ ရက်မှာ ပြောပါတယ်။

ဂါဇာကမ်းမြောင်ဒေသမှာ အစ္စရေးရဲ့ ဗုံးကြဲတိုက်ခိုက်မှုအတွင်း လူပေါင်း ၁၅,၀၀၀ ကျော် သေဆုံးခဲ့တယ်လို့ ကုလသမဂ္ဂရဲ့ ယုံကြည်စိတ်ချရတဲ့ အာဏာပိုင်တွေက ပြောပါတယ်။

ဂါဇာကမ်းမြောင်ဒေသခံ ၄၀ ရာခိုင်နှုန်းက ကလေးငယ်တွေဖြစ်ပြီး နောက်ထပ်သေဆုံးသူ အများအပြားဟာ အပျက်အစီးတွေအောက် ပျောက်ဆုံးနေမှာ စိုးရိမ်ရတယ်လို့ ဂါဇာ ကျန်းမာရေးအာဏာပိုင်တွေက ပြောပါတယ်။

ဂါဇာကို စိုးမိုးအုပ်ချုပ်နေတဲ့ ဟားမတ်စ် စစ်သွေးကြွအဖွဲ့က အစ္စရေးနယ်စပ် ခြံစည်းရိုးကို ဖြတ်ကျော်ပြီး လူပေါင်း ၁,၂၀၀ ဝန်းကျင်ကို သတ်ဖြတ်ခဲ့ပြီး သုံ့ပန်း အယောက် ၂၄၀ ကို အောက်တိုဘာ ၇ ရက်က ဖမ်းဆီးခဲ့ပါတယ်။

အဲဒီနောက် အစ္စရေးက ဟားမတ်စ်တွေကို လက်တုံ့ပြန်ဖို့ ကတိပြုပြီး ဂါဇာကို ကြည်းရေလေ သုံးဖက်ညှပ် တိုက်ခိုက်ခဲ့ပါတယ်။

ရေနဲ့ လျှပ်စစ် ဖြန့်ဖြူးရေးလို အခြေခံအဆောက်အဦတွေ ပျက်စီးခဲ့တဲ့ ဂါဇာမှာ ကူးစက်ရောဂါတွေ၊ အထူးသဖြင့် ဝမ်းပျက်ဝမ်းလျှောရောဂါတွေ ဖြစ်ပွားမှု မြင့်တက်လာတာနဲ့ ပတ်သက်ပြီး စိုးရိမ်ပူပန်တယ်လို့ ဂျီနီဗာမှာကျင်းပတဲ့ ကုလသမဂ္ဂ သတင်းစာရှင်းလင်းပွဲအတွင်း WHO မှ မာဂရက် ဟာရစ်က ထပ်ပြောခဲ့ပါတယ်။ ဂါဇာမြောက်ပိုင်းက အယ်လ်ရှိဖှာ ဆေးရုံပြိုကျမှုကို ကြေကွဲစရာအဖြစ် ဖော်ပြခဲ့ပါတယ်။

WHO ကနေ ကယ်ဆယ်ရေးယာဉ်တန်း ထွက်လာချိန်မှာ အစ္စရေးတပ်ဖွဲ့တွေက ကုလ ဆေးဘက်ဆိုင်ရာ ဝန်ထမ်းတချို့ကို ထိန်းသိမ်းထားမှုအပေါ် စိုးရိမ်တယ်လို့လည်း သူက ပြောပါတယ်။

ညစ်ညမ်းတဲ့ရေတွေ သောက်မိလို့ အစာအိမ်ရောဂါ ခံစားရတဲ့ ကလေးတွေ ဂါဇာက ဆေးရုံတွေမှာ ပြည့်နေတယ်လို့ ဂါဇာမှာရှိတဲ့ ကုလသမဂ္ဂ ကလေးများအေဂျင်စီက ပြောရေးဆိုခွင့်ရှိသူ ဂျိမ်းစ် အယ်လ်ဒါက ဗီဒီယိုလင့်ခ်ကနေတဆင့် သတင်းထောက်တွေကို ပြောခဲ့ပါတယ်။

ဆေးဝန်ထမ်းမရှိလို့ ဆေးကုမခံရဘဲ ဆေးရုံကြမ်းပြင်မှာ နာရီပေါင်းများစွာ လဲလျောင်းနေရတဲ့ ခြေထောက်တဖက်မရှိတဲ့ ကလေးငယ်တဦးကို တွေ့ခဲ့ရတယ်လို့လည်း သူက ပြောပြခဲ့ပါတယ်။

Source/Photo-Reuters