စစ်ကိုင်းတိုင်း၊ ကလေးမြို့နယ်တောင်ပိုင်း၊ တင်သားရွာမှာ စစ်ကောင်စီတပ်ရဲ့ လက်နက်ကြီးကြောင့် ရွာသားတယောက် သေဆုံးခဲ့ပြီး မိခင်ဖြစ်သူကတော့ လက်နှစ်ဖက်ဖြတ်ရကာ ရွာသား ၅ ဦး ဒဏ်ရာရရှိခဲ့တယ်လို့  ရွာခံတွေက ပြောပါတယ်။

နိုဝင်ဘာ ၂၈ ရက် နေ့လယ် ၂ နာရီဝန်းကျင်က တင်သားရွာရဲ့ တောင်ဘက် ၃ မိုင်အကွာ စစ်ကောင်စီလက်‌အောက်ခံ ပျူစောထီးကျေးရွာလို့ခေါ်တဲ့ ကြံသာကျေးရွာကနေ တင်သားရွာဘက်ကို လက်နက်ကြီးတွေနဲ့ ဆက်တိုက်ပစ်ခတ်ခဲ့တာပါ။

အဆိုပါလက်နက်ကြီးကြောင့် တင်သားရွာ အမှတ် ၆ ရပ်ကွက်က အသက် ၃၅ နှစ်ဝန်းကျင်အရွယ် ကိုအောင်ဌေးလင်းတို့သားအမိ လက်နက်ကြီးထိမှန်ပြီး ကိုအောင်ဌေးလင်း ပွဲချင်းပြီး သေဆုံးခဲ့ကာ မိခင်ဖြစ်သူက လက်နှစ်ဖက် ဖြတ်ခဲ့ရတာပါ။

တင်သားရွာသူတဦးက “အောင်ဌေးလင်းက သူ့အိမ်ကနေ အမေအိမ်လာရင်း သူ့အမေအိမ်ဝင်းပေါက်မှာ လက်နက်ကြီးမှန်ပြီး ဝမ်းဗိုက်ပွင့် သေသွားတာ။ အလောင်းတောင် ကောက်လို့မရလို့ စောင်တွေနဲ့ထုပ်ပြီး တခါတည်း သင်္ဂြိုဟ်လိုက်ရတာ။ သူ့အမေကတော့ လက်နှစ်ဖက်ဖြတ်ရတယ်။ အမှတ် ၃ က ဦးတင်ထွန်းလည်း တင်ပါးမှာ ဒဏ်ရာရတယ်။ ရွာတောင်ပိုင်း ၅ ယောက်လောက် ဒဏ်ရာရကြတယ်” လို့ ပြောပါတယ်။

အဆိုပါလက်နက်ကြီးပစ်ခတ်မှုနဲ့ပတ်သက်ပြီး စစ်ကောင်စီဘက်က တစုံတရာ ထုတ်ပြန်ထားတာ မရှိသေးသလို ဒေသခံတွေအနေနဲ့ စစ်ကောင်စီက မိမိတို့ကျေးရွာ‌တွေမှာ PDF တွေရှိတယ်အထင်နဲ့ လက်နက်ကြီးနဲ့ပစ်ခတ်တာ ဖြစ်နိုင်တယ်လို့ ပြောပါတယ်။

နိုဝင်ဘာ ၂၃ ရက် မနက်ပိုင်းကလည်း စစ်ကောင်စီလက်နက်ကြီးကြောင့် တင်သားရွာ အမှတ် ၆ ရပ်ကွက်က ဒေါ်မာဝေ ပွဲချင်းပြီး သေဆုံးခဲ့ပါသေးတယ်။