နေပြည်တော်ကောင်စီနယ်မြေ တပ်ကုန်းမြို့နယ် ကြို့ပင်သာစစ်ဆေးရေးဂိတ်မှာ ဒီနေ့ည ၇ နာရီက လုံခြုံရေးယူထားတဲ့ စစ်ကောင်စီတပ်နဲ့ရဲတွေ ပစ်ခတ်ခံရပြီး ရဲ ၁ ဦး ဒဏ်ရာရရှိခဲ့တယ်လို့ မြို့ခံတွေက ပြောပါတယ်။
"ဘယ်လိုလာပစ်သွားလဲတော့မသိဘူး၊ စစ်သားတွေ အများကြီးပဲ လူနာတင်ယာဥ်လည်းရှိတယ်၊ ရဲတယောက် ဒဏ်ရာရလို့ ဆေးရုံခေါ်သွားတယ်။”
ကြို့ပင်သာစစ်ဆေးရေးဂိတ်ကို လာရောက်ပစ်ခတ်တာ မှန်ကန်ပြီး တပ်ကုန်းမြို့မရဲစခန်းမှ ရဲတပ်သားတဦး ဒဏ်ရာရရှိကာ တပ်ကုန်းမြို့ခုတင် ၁၀၀ ဆေးရုံကို ပို့ဆောင်ထားတယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
"တပ်ကတော့ သတင်းမပျံ့အောင် ဒရုန်းနဲ့ကင်းလာထောက်လို့ ရဲတွေက ဒရုန်းကို ပစ်တယ်လို့ ပြောတယ်။ အမှန်က သေနတ်နဲ့အပစ်ခံရတာ၊ ရဲတဦးထိတယ် မစိုးရိမ်ရဘူး။"
လက်တလောမှာ တပ်ကုန်းမြို့အဝင် ကြို့ပင်သာစစ်ဆေးရေးဂိတ်နဲ့မြို့အတွင်းမှာ စစ်ကောင်စီတပ်နဲ့ရဲတွေ ပိတ်ဆို့စစ်ဆေးနေတယ်လို့ မြို့ခံတွေဆီက သိရပါတယ်။
ပြီးခဲ့တဲ့ ၂၀၂၁ ခုနှစ် အောက်တိုဘာ ၁၆ ရက်က တပ်ကုန်းမြို့နယ် အထွေထွေအုပ်ချုပ်ရေးမှူးရုံးရှေ့မှာ ဗုံးပေါက်ကွဲခဲ့သလို ၂၀၂၂ ခု ဇန်နဝါရီ ၁၉ ရက်နေ့ကလည်း အခွန်ဦးစီးဌာနရုံးတို့မှာ ဗုံးပေါက်ကွဲခဲ့ပြီး ထိခိုက်ဒဏ်ရာရသူအချို့ ရှိခဲ့ပါတယ်။
