ကမ္ဘာ့စီးပွားရေးအင်အားကြီး ၇ နိုင်ငံအဖွဲ့ (G7) ရဲ့ အဖွဲ့ဝင်နိုင်ငံတွေက နိုင်ငံခြားရေးဝန်ကြီးတွေ ဂျပန်နိုင်ငံ မြို့တော် တိုကျိုမှာ အစည်းအဝေးကျင်းပနေတာမှာ ယူကရိန်း-ရုရှားစစ်ပွဲ၊ အစ္စရေး-ဂါဇာ ပဋိပက္ခတို့ အပါအဝင် ကမ္ဘာ့အရေးကိစ္စတွေကို ဆွေးနွေးဖို့ မျှော်လင့်ထားကြပါတယ်။
နိုဝင်ဘာ ၇ ရက်ကနေ ၈ ရက်အထိ ကျင်းပတဲ့ ဒီအစည်းအဝေးကို ဗြိတိန်၊ ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်နဲ့ အမေရိကန်တို့အပြင် ဥရောပသမဂ္ဂကပါ ပါဝင်တက်ရောက်ခဲ့ပါတယ်။
G7 နိုင်ငံခြားရေးဝန်ကြီးတွေဟာ ယူကရိန်း နိုင်ငံခြားရေးဝန်ကြီး ဒမစ်ထရို ခူလေဘာနဲ့ နိုဝင်ဘာ ၈ ရက်မှာ အွန်လိုင်းကနေ ဆွေးနွေးဖို့ စီစဉ်ထားပါတယ်။
ဂျပန်နိုင်ငံခြားရေးဝန်ကြီး ယိုကိုကာမိကာဝါနဲ့ ဂျာမန် နိုင်ငံခြားရေးဝန်ကြီး အန်နာလေနာ ဘယ်ယာဘောက်ခ်တို့ဟာ G7 နဲ့ ဆက်စပ်အစည်းအဝေးအတွင်း တွေ့ဆုံပြီး အပြန်အလှန်ဆက်ဆံရေး၊ လုံခြုံရေးနယ်ပယ်မှာ ပူးပေါင်းဆောင်ရွက်ရေးနဲ့ ဒေသတွင်း အရေးကိစ္စတွေကို ဆွေးနွေးခဲ့ပါတယ်။
အမျိုးသမီးရေး၊ ငြိမ်းချမ်းရေး၊ လုံခြုံရေးနဲ့ ကျား၊ မ တန်းတူညီမျှရေး နယ်ပယ် အပါအဝင် ဂျာမနီ-ဂျပန်ကြား ပူးပေါင်းဆောင်ရွက်မှု ပိုမိုအားကောင်းလာစေဖို့ အနီးကပ် ပူးပေါင်းဆောင်ရွက်သွားမယ်လို့ ဝန်ကြီးနှစ်ဦးက အတည်ပြု ပြောဆိုပါတယ်။
အမျိုးသားလုံခြုံရေး မဟာဗျူဟာသစ်နဲ့ အင်ဒို-ပစိဖိတ်ဒေသတွင်း သူ့ရဲ့ ပါဝင်ပတ်သက်မှုအပေါ် အခြေခံပြီး ကာကွယ်ရေးစွမ်းရည်မြှင့်တင်ဖို့ ဂျာမနီရဲ့ ကြိုးပမ်းချက်တွေကို ပံ့ပိုးဖို့ ဂျပန်ဝန်ကြီးက ကမ်းလှမ်းခဲ့ပါတယ်။
နှစ်နိုင်ငံကြား ညှိနှိုင်းပြီးသားဖြစ်တဲ့ ACSA ရဲ့ အစောပိုင်း ကောက်ချက်အတိုင်း ဆောင်ရွက်ဖို့ ရည်ရွယ်ချက်ကို နှစ်နိုင်ငံဝန်ကြီးနှစ်ဦးက မျှဝေခဲ့ကြပါတယ်။
သူတို့ဟာ ယူကရိန်းမှာ ရုရှားရဲ့ ရန်လိုမှုကို တုံ့ပြန်ဖို့၊ တရုတ်နဲ့ မြောက်ကိုရီးယားတို့ အပါအဝင် ဒေသတွင်း အခြေအနေအပေါ် အမြင်ချင်းဖလှယ် ဆွေးနွေးခဲ့ကြပါတယ်။
အရှေ့အလယ်ပိုင်းမှာ လက်ရှိအခြေအနေနဲ့ ရင်ဆိုင်နေရရင်တောင် ယူကရိန်းအတွက် ခိုင်ခိုင်မာမာ ဆက်ပံ့ပိုးပေးဖို့ လိုအပ်တာကို အသိအမှတ်ပြုခဲ့ကြပါတယ်။
နျူးကလီးယားနဲ့ ဒုံးကျည်ကိစ္စတွေအပြင် ပြန်ပေးဆွဲခြင်းကိစ္စတွေအတွက် မြောက်ကိုရီးယားကို တုံ့ပြန်ရာမှာ ဂျပန်နဲ့ ဂျာမနီတို့ ဆက်ပြီး ပူးပေါင်း ဆောင်ရွက်သွားမယ်လို့ ဝန်ကြီးနှစ်ဦးက အတည်ပြု ပြောကြားခဲ့ပါတယ်။
ဖူကူရှီးမားနျူးကလီးယား ဓာတ်အားပေးစက်ရုံကနေ သမုဒ္ဒရာထဲကို စွန့်ပစ်တဲ့ သန့်စင်ပြီးသား ရေတွေကိစ္စကို ဂျာမနီက နားလည်၊ ပံ့ပိုးကူညီမှုအတွက် ကျေးဇူးတင်ပြီး ဂျာမနီနဲ့ နီးနီးကပ်ကပ် ဆက်လက်လုပ်ဆောင်သွားချင်တယ်လို့ ဂျပန်ဝန်ကြီး ကာမိကာဝါက ပြောခဲ့ပါတယ်။
Source/Photo-Reuters
