မလေးရှားနိုင်ငံ၊ ဆန်ဂိုင်းလာလန်ပြည်နယ်ရှိ ပရိဘောဂစက်ရုံမှာ အလုပ်လုပ်ကိုင်နေတဲ့ မြန်မာအလုပ်သမား ၃ ဦးဟာ နိုဝင်ဘာ ၃ ရက် ညပိုင်းက အရက်သောက်နေရင်း စကားများ ရန်ဖြစ်ရာမှာ ၁ ဦး သေဆုံးခဲ့တယ်လို့ The New Straits Times မလေးရှားသတင်းမှာ ဖော်ပြပါတယ်။
ဆန်ဂိုင်းလာလန်ပြည်နယ်ရှိ ပရိဘောဂစက်ရုံမှာ မြန်မာရွှေ့ပြောင်းအလုပ်သမားအချင်းချင်း ဓားထိုးမှုဖြစ်တယ်ဆိုတဲ့ သတင်းရရှိတာကြောင့် မလေးရှားရဲတပ်ဖွဲ့က သွားရောက်စစ်ဆေးခဲ့ရာ အသက် ၂၃ နှစ်အရွယ် မြန်မာတဦး သွေးအိုင်ထဲမှာ လဲကျနေတာကြောင့် ရဲတပ်ဖွဲ့ဝင်တွေက ဆေးရုံပို့ဆောင်ဖို့လုပ်ပေမဲ့ သေဆုံးခဲ့ပါတယ်။
မျက်မြင်သက်သေတွေ ပြောစကားအရ သူငယ်ချင်းအချင်းချင်း အရက်သောက်ပြီး စကားများကြရာက မြန်မာအလုပ်သမား ၂ ဦးက အသက် ၂၃ နှစ်အရွယ် မြန်မာအလုပ်သမားတဦးကို ဓားနဲ့ထိုးသတ်ပြီး ထွက်ပြေးသွားတယ်လို့ သတင်းမှာ ဖော်ပြထားတယ်။
မလေးရှားရဲတပ်ဖွဲ့ရဲ့ ထုတ်ပြန်ချက်အရ သေဆုံးခဲ့တဲ့ မြန်မာအလုပ်သမားဟာ ဝမ်းဗိုက်ဘယ်ဘက်ခြမ်းမှာ ချွန်ထက်တဲ့အရာနဲ့ထိုးသွင်းခံရတဲ့ ဒဏ်ရာနဲ့ သေဆုံးခဲ့တာဖြစ်ပြီး ကျူးလွန်ခဲ့တဲ့ မြန်မာအလုပ်သမား ၂ ဦးကိုလည်း နိုဝင်ဘာ ၄ ရက် မနက်ပိုင်းမှာ သက်သေခံဓားနဲ့အတူ ဖမ်းဆီးရမိခဲ့ပါတယ်။
လူသတ်မှု ကျူးလွန်ခဲ့တယ်လို့ သံသယရှိတဲ့ မြန်မာအလုပ်သမား ၂ ဦးကို နိုဝင်ဘာ ၁၀ ရက်အထိ ချုပ်ရက်ရမန်ယူပြီး လူသတ်မှုနဲ့ စစ်ဆေးနေတယ်လို့ ကာဂျန်ရဲတပ်ဖွဲ့မှူးက ပြောပါတယ်။
Source/Photo - The New Straits Times
