အဘစောမူးသာ၊ စစ်ပြန်ကြီး အဘလုံးတုံးတို့နှင့်အတူ ရွာ့တောင်ပိုင်းကို ရောက်၏။ စိမ်းသရဖူစိမ်း ရပ်ကျေးအစိမ်းဥက္ကဋ္ဌ အဘစိမ်းမောင်တို့အိမ်က ဆွမ်းကျွေးကို ဖြစ်၏။ စိမ်းဆိုမှစိမ်း တောင်ကျောင်းဆရာတော် ဦးအစိမ်းတက တရားချီးမြှင့်၏။ ဆရာတော်က အလှူဒါနနှင့် ပတ်သက်သောတရား၊ ခန္တီစ သည်းခံခြင်းနှင့် ဆက်နွှယ်သော တရားတို့ကို ဟောကြားချီးမြှင့်ပါ၏။

တရားအပြီးမှာ ဆွမ်းကပ်ကြပါ၏။ ဆရာတော်နှစ်သက်တော်မူလှသည့် အဆီတထပ် အသားတစ်ထပ် အခေါက်တစ်ထပ်ဖြစ်သော ဝက်သားသုံးထပ်သား ' ထပ်သရီး ' ကို ' အိ ' နေအောင်ချက်ထားလေရာ စားဖိုမှူးကြီး အဘစောမူးသာ၏ စပယ်ရှယ်လက်ရာပါ ခင်ဗျ။

"ဟောဒါကတော့ စစ်ပြန်ကြီးလုံးတုံးရဲ့ စပယ်ရှယ် ' ချဉ်ရည်ဟင်း ' ပါ ကိုယ်တော် "

" ချဉ်ပေါင်ရယ် မျှစ်ရယ် ကျောက်ဖရုံသီးရယ်ကို ငါးပိလေးနဲ့ ရောသမမွှေပြီး စပယ်ရှယ်ချက်ထား

ပြီး ဘေးမှာ မိုးမျှော်ငြုတ်သီးကို ကြက်သွန်နီရယ် ဆားရယ်နဲ့ စပယ်ရှယ်ထောင်းထားတာ။"

"ဒီဘက်ကတော့ စိမ်းမောင်ရဲ့ စပယ်ရှယ်ရွှေဖရုံသီးအကျေနှပ်ပါ ကိုယ်တော် "

" အိမ်း . . . နင်တို့ဟာတွေကလည်း ' စပယ်ရှယ်တွေချည်း ' ပါလား ဟကောင်တွေရ "

" ဆရာတော့်တရားကလည်း အလှူဒါနစပယ်ရှယ်နဲ့ သည်းခံခြင်းခန္တီစ စပယ်ရှယ်တွေချည်း

ပဲကိုး ဘုရာ့၊ လိုက်ဖက်လှပါပေတယ်။"

ဆရာတော်က မြိန်ယှက်စွာ အားရပါးရ ဘုန်းပေးတော်မူနေရာ အဘစိမ်းမောင်တို့မိသားစု၏ မျက်နှာတွေမှာ ကျေနပ်ပီတိတွေကို မြင်ကြရပါပေ၏။ ဆရာတော်ကား အတော့်ကို ဘုန်းပေးနိုင်ကာ သုံးပန်းကန်မြောက် မောက်မောက်ကုန်မှ လက်စသတ်တော်မူပါ၏။

အဘစိမ်းမောင်၏သားကြီး ' လေမောင် ' ကဘလူးတုနှင့် သီချင်းတစ်ပုဒ်ကို ခပ်တိုးတိုးဖွင့် ထားတာ ကြားရပါ၏။ မေဆွိတို့အမေ အန်တီ မြင့်မြင့်ခင်၏ နာမည်ကျော်တေးတစ်ပုဒ်ဖြစ်လေရာ အချိန်အခါနှင့် လိုက်ဖက်လှပါပေတော့၏။

" ဒို့များဟာ မဝေးသောကာလ ကျေးတောရွာက သာလှတို့များ . . . အသားရယ် ဖြူ ပြန်သတော့ . . . လူဟန်က သနားကမားနဲ့ ယဉ်သပေါ့ . . . ကျော့ကာပဲ ရပ်ထဲ ရွာထဲ . . . အလှူပွဲကျင်းပ ဒင်းက ပါစမြဲ . . . . ။"

" ဟေ့ကောင် လေမောင် . . အသံလေး တင်လိုက်ပါဦးဟ "

" ဟုတ်ကဲ့ အဘ စောမူးသာ "

" ကြက်ဆီပြန် . . ဝက်သနီလန် . . မအီအောင် ချဉ်ပေါင်ခံ . . . သွားဖုံးမြုပ်မှတန် . . ကုန်းတုတ်ကြရန် . . . ဝက်သားတုံးကြီးလက်သီးဆုပ်သဏ္ဍာန် . . . ( နိပ်ဟ )

(ထမင်းရည်ချောင်းစီး ပေါင်းပြီးသွန်ရန် . . .ပြည်ဝင်ကြေးအိုး မီးထိုးပါမြန်မြန်)၂ . . . . "

အဘစိမ်းမောင်က " ဟဲ့ကောင် တိုးတိုး " ဟုပြောရာ တောင်ကျောင်းကိုယ်တော်က " ရပါ တယ်ကွ " ဟု မိန့်တော်မူပါ၏။

အဘလုံးတုံးက " နစ္စ ၊ ဂီတ . . " ဟု မကြားတကြား ရွတ်နေပါလေရာ ဆရာတော်က မကြားလေဟန်ပြုပြီး မုန့်ဆီကြော်ကြီးတစ်ချပ်ကို ခွတွင်းထဲသို့သွတ်သွင်းရင်း ဝါးတော်မူခြင်းအလုပ်ကိုဆောင်ရွက်တော်မူနေပါလေ၏ ခင်ဗျာ။

" ဟဲ့ ဟဲ့ . . . ဖျာစမယ် ပေကြံ . . . . . . "

(ခ)

အချိုပွဲကို ဆင်နွှဲနေချိန်မှာ ငယ်သူငယ်ချင်းသူ့ဒကာတွေက ဘေးပတ်ပတ်လည်မှ ဝိုင်းကာ ယပ်ခပ်ပေးနေကြပါ၏။ ပြီးတော့ ဒီနေ့အလှူ ဒါနတို့ သည်းခံခြင်း တရားတို့နှင့် ဆက်နွှယ်ပြီး ဆွေးနွေးနေကြပြန်ပါ၏။ အဘစောမူးသာနှင့် အဘလုံးတုံးတို့၏ မျက်လုံးများထဲတွင် ' အဓိပ္ပါယ်တစ်ခုခု ' ပါနေတာကို မြင်တွေ့ရလေရာ ဖေကြီးမှာ ရင်ထိတ်စွာဖြင့် စောင့်မျှော်နေရပါလေ၏။

ဖေကြီးမှန်းဆချက် သွေးထွက်အောင် မှန်ပါလေ၏ ခင်ဗျာ။ အဘစောမူးသာက ဤ သို့ စကားစလာပါလေ၏။

"အလှူ ဒါနနဲ့ပတ်သက်ရင် လက်မနှေးပဲ ရက်ရက်ရောရောရှိလှတဲ့နေရာမှာ မင်းတို့စကစဥက္ကဋ္ဌကြီးကတော့ စပယ်ရှယ် စံပြပုဂ္ဂိုလ်ပဲ စိမ်းမောင်ရ "

" အေးလေကွာ . . ဘုရားတည် ကျောင်းဆောက် လှူဒါန်းတဲ့နေရာမှာ တကယ့်ကို လက်မနှေးတဲ့ ဗိုလ်ချုပ်မှူးကြီးကွ"

" ဟုတ်တယ် စိမ်းမောင်ရ . . . မင်းတို့အဘက အခုဆိုလည်း နိုင်ငံ့နေရာအနှံ့မှာ နေ့စဉ်လှူ ဒါန်းနေတာ မြင်နေကြရတာပဲလေ "

" ဟေ . . ဘာတွေ လှူနေပြန်ပြီလဲ လုံးတုံးရ၊ ' မြဝတီ ' မှာတော့ သတင်း မပါပါလားဟ"

" စိမ်းမောင်ကလည်းကွာ . . လိုင်းပေါ်ကသတင်းမှန်တွေမှာ နေ့စဉ် ပါနေတဲ့ဟာကို "

" ဘာတွေ လှူ နေတာလဲဟ "

" ဘာတွေဖြစ်ရမလဲဟ . . လက်နက်ငယ်တွေ၊ ကျည်ဆန်တွေ၊ လက်ပစ်ဗုံးတွေ၊ အမြောက်တွေ

ကအစ သံချပ်ကာကားတွေအထိ PDF တွေကိုနေ့စဉ်လှူ နေတာ မင်းမမြင်ဘူးလား "

" ဝါး . . . ဟား ဟား ဟား ဟား ဟား ဟား "

အဘစိမ်းမောင် ကြောင်တက်တက်ဖြစ်သွားသလို စိမ်းသရဖူစိမ်းကိုယ်တော်လည်း တုန်ကနဲဖြစ်ပြီး ဖင်တကြွကြွ ဖြစ်နေတာကို မြင်ကြရပါသဗျ။ အဘစောမူးသာက စကားကို အပြတ်မခံဘဲ ရအောင်ဆက်ပါ၏။

" ' သည်းခံခြင်းတရား ' မှာလည်း မင်းတို့အဘ ထိပ်ကပဲလေကွာ "

" အဲ . . . ဘယ်လို "

" သူတို့စခန်းတွေ ခုဂဏန်းကနေ ဆယ်ဂဏန်း၊ ဆယ်ဂဏန်းကနေ ရာဂဏန်းရောက်တဲ့အထိ အလှူ တွေ ဆက်တိုက်ပေးနေရင်း

" ကျုပ်တို့ သည်းခံနေတယ်နော် " ချည်းပြောပြောနေတာ မင်းတို့အမြင်ပဲမဟုတ်လား "

" ဟားဟား ဟားဟား ဟားဟား . . . . . . "

"ကဲကဲ . . . သိမ်းမောင်ရေ . . . ငါလည်းကျောင်းကို ပြန်ကြွဦးမှဟေ့"

" တင်ပါ့ဘုရား . . . တပည့်တော် ပြန်လိုက်ပို့ပေးပါ့မယ်"

အဘစိမ်းမောင်ကလည်း အခွင့်အရေးရတုန်း စကားဝိုင်းကို ရှောင်ခွာပြေးရန် အကြံနှင့်ဖြစ်လေရာ သူငယ်ချင်းအဘတွေကလည်း ' ဘာရမလဲ သာဝရာ ' ပုံစံဖြင့် ဆွဲထားကြပြီး သူ့သားကြီး ' လေမောင် ' ကို လိုက်ပို့စေပါ၏။

"အရှင်ဘုရားကလည်း တပည့်တော်တို့ကအလှူဒါနတို့ သည်းခံခြင်းတရားတို့နဲ့ပတ်သက် တာတွေကို ဆက်ပြီး ဆွေးနွေးနေတဲ့ဟာကို"

ဆရာတော်ကား ဣန္ဒြေသိက္ခာကို မနည်းကြီး ဆယ်တော်မူနေရကာ သူ၏ ' အစိမ်းရောင် ကျောင်းတော်' ဆီသို့ ခြေဖဝါးမြေမထိ  ‘အိုးဝေ’ ကားလေးနှင့် ပြန်ကြွသွားတော်မူပါ၏။ အဘစိမ်းမောင်ကား ရေခမ်းငါးငယ်လို ကူသူမဲ့ကာ မျက်စိသူငယ်နှင့် ကျန်ခဲ့ပါလေပြီတည်း။

လေမောင်၏ ဖုန်းကို အငယ်ကောင်ကယူကာ ကလိနေပြီးသကာလ များမကြာမီ သီချင်းသံ ထွက်ပေါ်လာပြန်ပါလေ၏။

" ဟဲ့ သာ လှ . . . ဗျ . . . ဗျာ . . . ဗျ ၊ 

ကပါဟ သာလှ . . . ကမှာပါ့ ဗျာဗျ . . .

ပါးတစ်ဖက်တစ်ချက် ပါးကွက်ကိုနှံ

မျက်နှာထား သနပ်ခါး ခံ ဟု တ် ပ . . .

အသားညက်ညက် မပျက်စိုရန်

တစ်သက်တာသွား မှတ်သားရန်

အ ဟု တ် လှ . . .

နားထက်ကဗွေမှာ သူပန်းပန်

နပန်းဆံ . . . နပန်းဆံ . . .

နထင်ဘေးက တန်းချပြန်

လှမ်းကတဲ့ဟန် . . . . . "

(ဂ)

သီချင်းသံကို မျက်စိမှိတ်က အာရုံစိုက်၍နားဆင်နေသည့် အဘစောမူးသာ၏မျက်နှာမှာ ပြုံးစိစိပါ ခင်ဗျ။ " ဒီသီချင်းကို ငါလည်း ငယ်ငယ်ကတည်းကကြိုက်တာ " ဟု ဆိုကာ ဆက်၍သောတဆင်နေပါလေ၏။

" ငါလည်းကြိုက်ပါတယ် မူးသာရ "

" ကြိုက်ရမှာပေါ့ စိမ်းမောင်ရ . . တကယ့်ကို အရသာရှိတဲ့သီချင်းကိုး "

သီချင်းဆုံးသွားတော့ အဘစောမူးသာက

" ငါလည်း ဒီရက်ထဲမှာပဲ အဲသည် ' နပန်းဆံ ' သံစဉ်အလိုက်လေးနဲ့ စာသားသွတ်ပြီး ' ကော်ပီ ' တစ်ပုဒ်ရေးထားမိသေးသကွ လုံးတုံးရ "

" ဟေ . . . အဟုတ်လားဟ မူးသာရ၊ ဆိုပြပါအုံးဟာ . . နားဆင်ခံစားရအောင်လို့ "

" လုပ်ပါ အဘစောမူးသာရဲ့ "

" အခုလို ပရိသတ်ကြီးက တခဲနက် တောင်းဆိုလာတဲ့အတွက် ' နားပန်းဆံ ' သီချင်းအလိုက်ကလေးနဲ့ ' နဘင်းကျန် ' ဆိုတဲ့ ' စာမြှောင်ကပ် ' တေးသီချင်းတစ်ပုဒ်ကို ကျွန်ုပ်စောမူးသာက အဟုတ် သီဆိုဖျော်ဖြေပေးပါ့မယ် ခင်ဗျား "

" ဖြောင်းဖြောင်း ဖြောင်းဖြောင်း ဖြောင်းဖြောင်း"

လက်ခုပ်သံများအကြား အဘစောမူးသာက ရေနွေးတစ်ခွက်ငှဲ့ကာ မော့ချလိုက်ပြီး လည်ချောင်းရှင်းပါလေ၏။ ပြီးတဲ့အခါ ပီသကြည်မြလှသည့် သူ၏အသံဝါကြီးဖြင့် ' နဘင်းကျန် ' သီချင်းသံ ထွက်ပေါ်လာပါလေတော့၏။

' ဒို့များဟာ မဝေးသောကာလ ခွေးပေါရွာက သာဝတို့များ . . 

 အရပ်ကယ် မမီပြန်သတော့ . . . လူဟန်က သနားကမားနဲ့ မြင်သူ ဝေါ့ 

အော့စရာပဲ ရပ်ထဲ ရွာထဲ အလှူ ပွဲကျင်းပ ဒင်းက လာဆဲ . . .

ဖိုးသာကဲ အဲ . . . သူခိုးငနာ ငဖြဲ အဲ . . . အကျိုးရှာနွှဲ အဲ . . . လူကြားထဲ ဒီကောင်ယုတ်ပြန် . . .

ပွဲတကာရောက် ဒီကောင် ဆလံ  ရွာခံလူအများ ဝိုင်းလို့ ထောင်းပြန် 

အော် အော်ပြန်သေးရဲ့ တစ်ဖန် ဒန် ဒန် ဒန် ဒန် ဒန် ဒန် . . . 

တော် တော်ကြာ ပြေး ပြေးမယ့်သဏ္ဍာန် ဒန် ဒန် ဒန် ဒန် ဒန် ဒန် . . .

အဖော်တွေဟာ ဆော်နေတာအမှန် ဒန် ဒန် ဒန် ဒန် ဒန် ဒန် . . .

 မတော်နေရာ ချော်သွေကာ ကန် ဒန် ဒန် ဒန် ဒန် ဒန် ဒန် . . . 

ဟဲ့ သာ ၀ . . . ဗျ . . . ဗျာ . . . ဗျ 

မ ရွ ပါ နဲ့ သာ ဝ ရွမယ်ဗျ အာ ဟ . . . 

ပါးတစ်ဖက်တစ်ချက် နှစ်ချက်စီနှံ မျက်နှာကြီး နီမြန်းလန် ဟုတ် ပ . . .

နားထက်က ကေသာဆောင့်စွဲပြန် နဘင်းကျန် . . . နဘင်းကျန် 

နထင်ကြီးမှာ ရဲလို့လန် အားရကြပြန် နှိပ်ဟ . . .

( ဟေးလားလေ မောင်တို့ ၊ ဟေးလားလေ မယ်တို့ ၊ ဝမ်းစ်မိုးသံ သောသောညံ ရော့ . . . ရော့ ) ၂ "

အဘစိမ်းမောင်ကား မျက်နှာကြီးစူပုပ်ကာ စိမ်းစိမ်းကြီး စိုက်ကြည့်နေပါသော်ညား အဘစောမူးသာကား ဆက်လက်၍ ဖျော်ဖြေ နေပါလေ၏ ခင်ဗျား။

" အဆဲသန်သန်ငနဲ အကြံအဖန် သူလာရင် လူတကာ ဆလံ . . .

 ရုန်းထွက်ဖို့ကြံ ရုန်းထွက်မရအမှန်

စစ်သား အပုန်းကြီး ခွကြီးကျနေဟန် ( နှိပ်ဟ )

နှက် အသားကုန်ကန် အခွက် အရေခွံ လန်၊ 

အော်သံတွေ ဆူ ဆူ ညံ . . . 

ကုန်း ထုကြ အမှန် ရုန်း သူ့ဘ၀ မဟန် 

စစ်သားငတုံးကြီး လက်သီးချက်တွေခံ ( နှိ ပ် ဟ ) 

နှက်ပြီ အမှန် အခွက် အသားနီလန် 

ဒီအကောင် ကြောင်တောင်ခံ (နှိပ်ဟ) 

သွားဖုံးပြုတ်မှတန် ကုန်းလုပ်ကြရန် 

လက်သီးလုံးကြီး ဝက်ခေါင်းလောက်သဏ္ဍာန် ( နှိပ်ဟ )

(အဆင်ပြေပေါင်းပြီး ခေါင်းကြီးဆော်ရန် ပြည်တစ်ခွင်ခရီးနှိုး  မီးထိုးပါမြန်မြန်) ၂ 

ဟဲ့ ဟဲ့ . . . နွှာကြမယ် ဧကန်၊ အို အို လာသမျှရယ် တွယ်နေပြန်၊ ဟဲ့ ဟဲ့ . . . 

မသာချမယ်လေ အမှန် အို အို ဗလာအဘရယ် စေတန် . . . 

ဟယ် သာဝရယ် ကြင်စိုးရယ် နဘင်းကျန် 

နင် မငိုနဲ့ဟာ အိုးဘယ့်နှာ ခေါ်ချပြန် 

တစ်ဦးစ နှစ်ဦးစ ထောက်ဒူးချမှ ပက်လက်လန် ပြေးကြတော့ အမှန် . . . ( ဟေး )

 ( ဟေးလားကွယ် မောင်ရို့ ဟေးလားကွယ် မယ်ရို့ ဝမ်းစ်မိုးသံ သောသောညံ ရော့ ရော့) ၂

တခါတရံများ ဗျာပါသံတွေကြား အနွှာခံရဧကန် 

ရွာခံများက ဆောင့်တအားနှံ သာ၀ ဂန်ဒူး ကြင်စိုး မသာချရန်။" 

ဖေကြီး(လေရှီး)