ရှမ်းပြည်နယ်မြောက်ပိုင်း၊ နမ့်ခမ်းမြို့ပေါ်မှာ နိုဝင်ဘာ ၃ ရက် မနက် ၇ နာရီဝန်းကျင်က နမ့်ခမ်း-မန့်ဝိန်းကြီး ဆက်သွယ်ထားတဲ့ ရွှေလီကြိုးတံတားမှာ တပ်စွဲထားတဲ့ စစ်ကောင်စီ တပ်စခန်းကို တိုက်ခိုက်သိမ်းပိုက်နိုင်ခဲ့ကြောင်း တအာင်းတပ်မတော် (PSLF/TNLA) က ထုတ်ပြန်ပါတယ်။
တိုက်ပွဲမြို့ပေါ်နီးလာချိန် အခြေအနေကို နမ့်ခမ်းဒေသခံတဦးက “နမ့်ခမ်းလည်း မငြိမ်ပါဘူး။ တညလုံး ပစ်သံကြားနေရတာ။ ခု ပိုနီးလာပြီ။ ရွှေလီကြိုးတံတား သိမ်းပြီးကတည်းက အသံတွေပိုဆိုးလာတယ်” လို့ ပြောပါတယ်။
မနက် ၁၁ နာရီဝန်းကျင်မှာတော့ တိုက်ပွဲဟာ နမ့်ခမ်းမြို့ အောင်မေတ္တာရပ်ကွက်ထဲ ပြင်းထန်နေခဲ့ပြီး စစ်ကောင်စီတပ်က လေယာဉ်နဲ့ ဗုံးလာကြဲတာ ၄ ကြိမ်ထက်မနည်း ရှိနေပြီလို့ သိရပါတယ်။
လက်နက်ကြီး လက်နက်ငယ်အသံတွေ ဆူညံနေပြီး ရှောင်တိမ်းဖို့ ခက်ခဲသွားတဲ့ အခြေအနေမှာ မြို့ခံတွေဟာ နှစ်ဖက်လက်နက်ကိုင်တွေရဲ့ လှုပ်ရှားမှုကို မိမိတို့ရှိနေတဲ့ နေရာတွေကနေ မြင်နေရတာ ဖြစ်ပါတယ်။
မြို့လယ်ဘုရားကျောင်းမှာ တပ်စွဲထားတဲ့ စစ်ကောင်စီတပ်က ရွှေလီကြိုးတံတားဘက်ကို စစ်ကူဖို့ သွားရာကနေ တိုက်ပွဲထပ်မံဖြစ်ပွားခဲ့ပြီး တိုက်ပွဲပိုမိုပြင်းထန်လာတာ ဖြစ်ပါတယ်။
ကြိုးတံတားတိုက်ပွဲအပြီးမှာ လက်နက် ၄ လက်၊ ၆၀ မမ ဗုံးသီး ၃၀၊ RPG ၈ လုံး၊ လက်ပစ်ဗုံး ၅၀ လုံး၊ ကျည်ဆံအမြောက်အမြားနဲ့ စစ်အသုံးဆောင်ပစ္စည်းတွေကို သိမ်းဆည်းရမိခဲ့တယ်လို့ တအာင်းတပ်မတော် (PSLF/TNLA) က ထုတ်ပြန်ထားပါတယ်။
တရုတ်ဘက်ကတော့ နမ့်ခမ်းမြို့နယ် နယ်စပ်မျဥ်းပေါ်ကပ်လာတဲ့ တိုက်လေယာဉ်နှစ်စီးကို တရုတ်စစ်တပ်က လေယာဥ်ပစ်အမြောက်တွေနဲ့ ပြန်လည်ပစ်ခတ် မောင်းထုတ်နေတယ်လို့လည်း သိရပါတယ်။
