တနင်္သာရီတိုင်း၊ ထားဝယ်အကျဥ်းထောင်မှ ထောင်ဝန်ထမ်း ၂ ဦးကို အောက်တိုဘာ ၁ ရက်နေ့မှာ ဘုရားမဲ စစ်ကောင်စီဂိတ်နဲ့ ပေ ၁,၀၀၀ ခန့်အကွာမှာ ရှင်းလင်းလိုက်တယ်လို့ Dawei Guerrilla Revolutionary Force (DGRF) တပ်ခွဲ-၂ က အောက်တိုဘာ ၃၀ ရက်နေ့မှာ ထုတ်ပြန်ပါတယ်။

စက်တင်ဘာ ၃၀ ရက် ညနေမှာ ရေး-ထားဝယ်ကားလမ်းပေါ်ရှိ ထားဝယ်အကျဥ်းထောင်မှ ထောင်ဝန်ထမ်း ၂ ဦး၊ အကျဥ်းသား ၅ ဦး ပါတဲ့ကားကို ကြိုစောင့်ပြီး ဖမ်းခဲ့တယ်လို့ DGRF ပြန်ကြားရေးတာဝန်ခံက ဆိုပါတယ်။

အကျဥ်းသား ၅ ဦးမှာ ရဲပြေး ၁ ဦး၊ စစ်ပြေး ၂ ဦး၊ ကားမှောင်ခိုမှု ၁ ဦးနဲ့ လူမှုရေးဖောက်ပြန်မှု ၁ ဦး ​ဖြစ်ပါတယ်။

DGRF ပြန်ကြားရေးတာဝန်ခံက “ရှင်းလင်းလိုက်တဲ့ ထောင်ဝန်ထမ်းနှစ်ဦးမှာ စစ်ကောင်စီရဲ့ လက်ကိုင်တုတ်ဖြစ်နေကြောင်း သိရှိရတာနဲ့ အကျဥ်းထောင်အတွင်း နိုင်ကျဥ်းတွေကို ဒုက္ခရောက်အောင် လုပ်ခဲ့တဲ့ အတွက်ကြောင့်ပါ။ တခြား ပြောပြမရတဲ့အချက်တွေ၊ တိုင်တန်းမှုတွေကြောင့်ရောပါ ရှင်းလင်းလိုက်တယ်” လို့ ပြောပါတယ်။

အကျဥ်းသား ၅ ဦးကို ခေါ်ထားဖို့ အဆင်မပြေလို့ ထိုင်းနိုင်ငံကို ပို့ဆောင်ပေးလိုက်ပြီး သူတို့လုံခြုံတော့မှ ထုတ်ပြန်တာဖြစ်တယ်လို့ သိရပါတယ်။

အဆိုပါဖမ်းဆီးမှုအတွင်း ကား ၁ စီး၊ ချိန်းဇောစက် ၁ ခု၊ တက်တူးစက် ၁ ခုနဲ့ ဖုန်း ၂ လုံး သိမ်းဆည်းရမိခဲ့ပါတယ်။

DGRF အနေနဲ့ လုပ်နိုင်သမျှတော့ စစ်ကောင်စီနဲ့ ဒေါက်တိုင်တွေကို တိုက်ခိုက်နေမှာဖြစ်ပြီး ပြည်သူတွေ့ရဲ့ ပံ့ပိုးမှုတွေကိုလည်း လိုအပ်လို့ ဝိုင်းဝန်းကူညီပေးကြပါလို့ ပြည်သူတွေကို မေတ္တာရပ်ခံထားပါတယ်။