စစ်ကောင်စီက ၆၀ မမလက်နက်ကြီးတွေနဲ့ ပစ်ခတ်ခဲ့တာကြောင့် မုံရွာမြို့ ကြာပိုင်ကျေးရွာရှိ ကလေး ၁ ဦး အပါအဝင် အရပ်သားပြည်သူ ၇ ဦး လက်နက်ကြီးစမှန်ကာ ပြင်းထန်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
အောက်တိုဘာ ၂၉ ရက် ည ၉ နာရီလောက်က မုံရွာမြို့ တောပုရွာ အရပ်ခေါ် (ပျူစောထီးကျေးရွာ)ရှိ စစ်ကောင်စီနဲ့ ပျူစောထီးတွေက အနီးနားပတ်ဝန်းကျင်ကို လက်နက်ကြီးတွေနဲ့ ရည်ရွယ်ချက်ရှိရှိ ပစ်ခတ်ခဲ့ပြီး လက်နက်ကြီးနှစ်လုံးဟာ ကြာပိုင်ကျေးရွာထဲကို ကျရောက်ပေါက်ကွဲတာလို့ ဆိုပါတယ်။
ကြာပိုင်ရွာနေ အမျိုသမီးတဦးက "ပစ်တဲ့ထဲက တလုံးက အိမ်ပေါ်တည့်တည့်ကိုကျတာ၊ အဲ့အိမ်မှာရှိတဲ့ မိသားစုဝင် ၅ ဦးလုံး ထိခိုက်သွားတယ်။ ဘေးအိမ်က နှစ်ဦးထဲက တယောက်က အခြေအနေစိုးရိမ်နေရတယ်။ အိပ်နေတဲ့ အချိန်ကျတာဆိုတော့ အကုန်ထိခိုက်သွားတာ"လို့ ပြောပါတယ်။
အခုလက်ရှိ အချိန်မှာတော့ လက်နက်ကြီးစမှန် ဒဏ်ရာရရှိသူ ၇ ဦးကို ဆေးကုသမှုတွေ လုပ်ဆောင်ပေးနေတယ်လို့ သိရပါတယ်။
မုံရွာမြို့နယ် ကြာပိုင်ရွာနဲ့ မအူရွာတို့မှာ နေထိုင်တဲ့ အရပ်သားပြည်သူတွေဟာ အခုလို စစ်ကောင်စီ က လက်နက်ကြီးတွေနဲ့ ရမ်းသန်းပစ်ခတ်မှုတွေကြောင့် ကိုယ်ဝန်ဆောင်မိခင်အပါအဝင် ထိခိုက်သေဆုံးခဲ့ရသူဦးရေ အယောက် ၂၀ကျော် ရှိနေပြီလို့ မုံရွာမြို့ခံတွေက ပြောပါတယ်။
ပြီးခဲ့တဲ့ ဇူလိုင် ၂၉ ရက် ညနေ ၆ နာရီကလည်း မုံရွာမြို့အဝင် မအူဂိတ်ရှိ စစ်ကောင်စီပစ်ခတ်ခဲ့တဲ့ လက်နက်ကြီးစ ထိမှန်ပြီး မအူကျေးရွာ အနောက်ဘက်ခြမ်းမှ မထက်အိကို အသက် ၁၅ နှစ်ဟာ ဦးခေါင်းထိမှန် သေဆုံးခဲ့ပြီး အမျိုးသမီးတဦးအပါအဝင် ၃ ဦး ဒဏ်ရာရရှိခဲ့တယ်လို့ မအူရွာခံတွေဆီကနေ သိရပါတယ်။
ဒါ့အပြင် ပြီးခဲ့တဲ့ ဇူလိုင် ၁၀ ရက် ညနေ ၅ နာရီ ၅၁ မိနစ်လောက်ကလည်း စစ်ကောင်စီ ပစ်ခတ်ခဲ့တဲ့ လက်နက်ကြီးစ ထိမှန်တာကြောင့် မအူကျေးရွာမှ မနွယ်ဝင်း (၄၅ နှစ်) ရင်ဘတ်ကို ထိမှန်သေဆုံးခဲ့ပြီး အမျိုးသား ၁ ဦးနဲ့ ကလေး ၂ ဦး ဒဏ်ရာ ရရှိခဲ့ပါတယ်။
