ရုရှားတို့ သိမ်းပိုက်ထားတဲ့ ဒန်ညက်စ်မြို့ကို အမြောက်ဆန် ထိမှန်အပြီး သေဆုံးသူ ၄ ဦးအထိ မြင့်တက်လာခဲ့တယ်လို့ မြို့တော်ဝန် အလက်ဇီကူလင်မ်ဇီက အောက်တိုဘာ ၂၁ ရက်မှာ သူ့ရဲ့ တယ်လီဂရမ်ကနေ ပြောပါတယ်။

ယူကရိန်း လက်နက်ကိုင် တပ်ဖွဲ့တွေက စီးပွားရေးဆိုင်ရာ ကုန်စည်သိုလှောင်ရုံတွေ၊ ပြုပြင်ထိန်းသိမ်းရေးစခန်းတွေ အပါအဝင် အရပ်သား ပစ်မှတ်တွေကို အစုလိုက် အပြုံလိုက် ခဲယမ်းတွေနဲ့ တိုက်ခိုက်ခဲ့တယ်လို့ ရုရှားအစိုးရ သတင်းအေဂျင်စီ RIA က ဖော်ပြပါတယ်။

မီးသတ်ကားတွေနဲ့ လူနာတင်ယာဉ်တွေ တည်ရှိရာနေရာကို ကျည်ဆန်တချို့ ထိမှန်ခဲ့ပြီး ဒီပစ်ခတ်မှုကို ယူကရိန်း တာဝန်ရှိသူတွေက တရားဝင် သတင်း မထုတ်ပြန်သေးပါဘူး။

လွန်ခဲ့တဲ့ ၁၈ လက စခဲ့တဲ့ ယူကရိန်းစစ်ပွဲနောက်ပိုင်း ယူကရိန်းနဲ့  ရုရှားတပ်ဖွဲ့ဝင်တွေ သေဆုံး ဒဏ်ရာရသူ စုစုပေါင်းမှာ ၅ သိန်း နီးပါးရှိပြီလို့ အမေရိကန် တာဝန်ရှိသူတွေက ပြောပါတယ်၊

ရုရှားအစိုးရက စစ်ပွဲအတွင်း သေဆုံး ဒဏ်ရာရရှိသူတွေကို ပုံမှန်ရေတွက်နိုင်တယ်လို့ ယုံကြည်ရပြီး ယူကရိန်းအစိုးရကတော့ တရားဝင်ကိန်းဂဏန်းတွေကို ထုတ်မပြောလို့ အသေအပျောက်စာရင်းတွေကို ခန့်မှန်းရ ခက်နေပါတယ်။

ယူကရိန်းအရှေ့ပိုင်းက သတ်ဖြတ်မှုဟာ အခုနှစ်အတွင်း ပိုမိုပြင်းထန်လာပြီး သုံးလနီးပါးကြာ တန်ပြန်ထိုးစစ်ကလည်း ဆက်ဖြစ်နေပါတယ်။ 

ရုရှားစစ်တပ်မှာ အသေအပျောက် ၃ သိန်း နီးပါးရှိတယ်လို့ အရာရှိတွေကို ကိုးကားပြီး နယူးယောက်တိုင်းမ်စ် သတင်းစာက  ရေးပါတယ်။ 

Source/Photo-Reuters