လာမယ့် သီတင်းကျွတ်ပိတ်ရက်ကာလအတွင်း ရထားစီးနင်းသူတွေ အဆင်ပြေအောင် အထူးရထားခရီးစဉ်တချို့ပြေးဆွဲသွားမယ်လို့ မြန်မာ့မီးရထားဌာနကနေ သိရပါတယ်။
ပြေးဆွဲသွားမယ့် အထူးရထားခရီးစဉ်တွေအဖြစ် ရန်ကုန်-နေပြည်တော်၊ ရန်ကုန်-မန္တလေးနဲ့ ရန်ကုန်-ပြည်ခရီးစဉ်တို့ ပြေးဆွဲသွားမှာ ဖြစ်ပါတယ်။
မီးရထားဝန်ထမ်းတဦးက "သီတင်းကျွတ် အခါကြီးရက်ကြီးမှာ ခရီးသွားအရမ်းများတော့ ခရီးသွားရ အဆင်ပြေအောင် အထူးရထားတွေ ပြေးဆွဲတာပါ။ သီတင်းကျွတ် ပိတ်ရက်အတွက် သီးသန့်ပြေးဆွဲတာပါ။ ပြီးရင်တော့ မရှိတော့ပါဘူး။ ပြေးဆွဲမယ့် အချိန်ကတော့ မီးရထားဌာနကနေ ထုတ်ပြန်ပေးပါမယ်။ လက်မှတ်ခကတော့ အရင်နှုန်းထားပါပဲ မပြောင်းလဲပါဘူး" လို့ ပြောပါတယ်။
လက်မှတ်ခတွေအနေနဲ့ ရန်ကုန်-မန္တလေး ရိုးရိုးတန်း ကျပ် ၄၆၅၀၊ အထက်တန်း ကျပ် ၉၃၀၀၊ အိပ်စင်ကျပ် ၁၂၇၅၀၊ ရန်ကုန်-နေပြည်တော် ရိုးရိုးတန်း ကျပ် ၂၈၀၀၊ အထက်တန်း ကျပ် ၅၆၀၀နဲ့ ရန်ကုန်-ပြည် ရိုးရိုးတန်း ကျပ် ၁၉၅၀ တို့ဖြစ်ပါတယ်။
သတင်းကျွတ်လိုမျိုး ပိတ်ရက်ကြီးတွေမှာ အထူးရထားပြေးဆွဲတာဟာ ခရီးသွားတွေအတွက် အဆင်ပြေစေတယ်လို့ မီးရထားနဲ့ အမြဲခရီးသွားနေသူတဦးက ပြောပါတယ်။
"ဒီရက်တွေက ခရီးသွားဖို့ ရထားလက်မှတ်မှမဟုတ်ဘူး ကားလက်မှတ်လည်း ရဖို့မလွယ်ဘူး။ ခုလိုကာလမှာ အထူးရထားပြေးဆွဲတဲ့အတွက် ခရီးသည်တွေအတွက် အဆင်ပြေစေပါတယ်။ ဌာနဆိုင်ရာလူတွေကို ဦးစားမပေးဘဲ ပြည်သူတွေနဲ့ အတူတူရောင်းပေးရင်တော့ တော်တော်ကောင်းမှာပါ။”
အထူးရထားတွေအတွက် ရိုးရိုးတန်းရထားလက်မှတ်တွေကို သီတင်းကျွတ်ပိတ်ရက်မတိုင်မီ ၄ ရက်အလိုမှာ ရောင်းချသွားမှာ ဖြစ်ပြီး အထက်တန်းတွဲတွေနဲ့ အိပ်စင်တွေအတွက် ၂ ရက်အလိုမှာ ကြိုတင်ရောင်းချသွားမယ်လို့ မြန်မာ့မီးရထားဌာနက ထုတ်ပြန်ခဲ့ပါတယ်။
သင်္ကြန်ရုံးပိတ်ရက်မတိုင်ခင်ကာလကလည်း ရန်ကုန်-မန္တလေး၊ ရန်ကုန်-မော်လမြိုင် ၊ ရန်ကုန်-ပြည် အထူးရထားခရီးစဉ်တွေ ပြေးဆွဲခဲ့ပါတယ်။
