သြစတြေးလျနိုင်ငံရဲ့ အထင်ကရ အဆောက်အအုံတခုဖြစ်တဲ့ ဆစ်ဒနီအော်ပရာကဇာတ်ရုံဟာ အောက်တိုဘာ ၂၀ ရက်မှာ နှစ်ပေါင်း ၅၀ ပြည့်မြောက်ခဲ့တာကြောင့် လေဆာမီးပြပွဲတရပ် ပြုလုပ်ခဲ့ပါတယ်။
၁၉၇၃ ခုနှစ်ရဲ့ အောက်တိုဘာလ ၂၀ရက်နေ့မှာ ဒုတိယမြောက် အဲလ်လိဇဘတ် ဘုရင်မကြီး ကိုယ်တိုင် ဒီအဆောက်အအုံကို တရားဝင် ဖွင့်လှစ်ပေးခဲ့တာ ဖြစ်ပါတယ်။
၂၀ ရာစုအတွက် အခမ်းနားဆုံးသော ဗိသုကာလက်ရာတွေထဲမှ တခုအဖြစ် သတ်မှတ်ခံ ထားတဲ့ ဒီကဇာတ်ရုံကို နှစ်စဉ်လူပေါင်း ၁၀ ဒသမ ၉ သန်းက လာရောက်လည်ပတ်လေ့ ရှိတယ်လို့လည်း သိရပါတယ်။
၁၉၅၆ ခုနှစ်တုန်းက ဖိတ်ခေါ်ခဲ့တဲ့ အော်ပရာဟောက်စ် နိုင်ငံတကာဒီဇိုင်းပြိုင်ပွဲမှာ ကမ္ဘာတဝှမ်းမှ ဗိသုကာပညာရှင်တွေရဲ့ ဒီဇိုင်းပေါင်း ၂၃၃ ခုအထိ အရွေးချယ်ခံခဲ့ကြတယ်လို့ ဆိုပါတယ်။
အဲ့ဒီနောက် ဒိန်းမတ်နိုင်ငံသား ဂျော် အူတ်ဇန်ရဲ့ ဒီဇိုင်းလက်ရာက အနိုင်ရရှိသွားပြီး ၁၉၅၉ ခုနှစ်မှာ ဒီကဇာတ်ရုံကြီးကို စတင်တည်ဆောက်ခဲ့ရာ ၄ နှစ်အတွင်း အပြီးသတ်နိုင်ဖို့အတွက် မျှော်မှန်းခဲ့ကြပါတယ်။
ဒါပေမယ့်လည်း အစိုးရအပြောင်းအလဲဖြစ်မှု၊ ဒီဇိုင်းကွဲပြားခြားနားမှုနဲ့ ကုန်ကျစရိတ် မြင့်မားမှုတွေ ကြောင့် အူတ်ဇန်အနေနဲ့ ဒီဇိုင်းပြန်ရေးဆွဲခဲ့ရတဲ့အပြင် တည်ဆောက်မှု ပြီးစီးဖို့အတွက်ပါ ၁၄နှစ်ကြာ အချိန်ယူခဲ့ရပါတယ်။
၂၀၀၇ ခုနှစ်အရောက်မှာတော့ ယူနက်စကို(UNESCO) အဖွဲ့ကြီးရဲ့ ကမ္ဘာ့အမွေအနှစ် စာရင်း အတွင်း ဆစ်ဒနီအော်ပရာကဇာတ်ရုံကို တရားဝင်ထည့်သွင်းလိုက်ပါတယ်။
Source/Photo-Reuters
