စပိန်ကမ်းရိုးတန်းစောင့်တပ်ဖွဲ့ဟာ ကနေရီကျွန်းစုတွေဆီ ရောက်ရှိအောင် ကြိုးစားနေကြတဲ့ ရွှေ့ပြောင်းနေထိုင်သူ အနည်းဆုံး ၅၉ ဦးကို အောက်တိုဘာ ၁၉ ရက်က ကယ်ဆယ်နိုင်ခဲ့ပါတယ်။

ကမ်းရိုးတန်းစောင့်သင်္ဘော မာကွန်ဒိုရဲ့ အမှုထမ်းတွေဟာ ဂရန်း ကနေရီယာကျွန်းကနေ ၅ မိုင်လောက်အကွာမှာ ရွက်လွှင့်နေတဲ့ ရာဘာလှေအတွင်း အမျိုးသား ၄၇ ဦး၊ အမျိုးသမီး ၁၁ ဦးနဲ့ ကလေးငယ်တဦးတို့ကို တွေ့ရှိ ကယ်ဆယ်ခဲ့တာပါ။

ရွှေ့ပြောင်းနေထိုင်သူတွေကို အာရ်ဂင်းနဂင်း ဆိပ်ကမ်းကို ခေါ်ဆောင်သွားခဲ့ပြီး သူတို့ကို ကြက်ခြေနီဝန်ထမ်းတွေက စောင်နဲ့ ဆေးဝါးကုသမှုတွေ ပေးအပ်ခဲ့ပါတယ်။

အခုနှစ် ဇန်နဝါရီ ၁ ရက်မှ အောက်တိုဘာ ၁၅ ရက်အတွင်း အတ္တလန္တိတ်ရှိ ကျွန်းစုတွေမှာ ရွှေ့ပြောင်းနေထိုင်သူ ၂၃,၅၃၇ ဦးကို လက်ခံရရှိခဲ့ပြီး မနှစ်က အလားတူကာလထက် ၈၀ ရာခိုင်နှုန်း တိုးလာကြောင်း စပိန်ပြည်ထဲရေးဝန်ကြီးဌာနရဲ့ အချက်အလက်တွေအရ သိရပါတယ်။

ကနေရီကျွန်းစုရဲ့ ကျွန်း ၇ ကျွန်းဟာ စပိန်ကိုရောက်ရှိဖို့ ကြိုးစားနေတဲ့ ဆီနီဂေါနဲ့ တခြား အာဖရိကနိုင်ငံတွေက ရွှေ့ပြောင်းနေထိုင်သူတွေအတွက် အဓိကနေရာ ဖြစ်လာပါတယ်။

Source/Photo-Reuters