ယာဉ်တိုက်မှုမဖြစ်ရလေအောင် ရန်ကုန်မြို့အတွင်းရှိ လမ်း​ဘေးဝဲယာနှစ်ဖက်မှာ ရပ်နားထား​တဲ့ တွဲကားတွေကို ယာဥ်မောင်းထံ ခွင့်ပြုချက်​တောင်းပြီး ရောင်ပြန်စ​တစ်ကာတွေ အခမဲ့ ကပ်​ပေးသွားဖို့ ​ ပြည်သူ့ကယ်ဆယ်ရေး People Rescue အဖွဲ့က စီစဉ်နေပါတယ်။

People Rescue အဖွဲ့မှ ဦးမောင်က “ကျနော်တို့အဖွဲ့က ရောင်ပြန်တွေဝယ်ပြီး ရောင်ပြန်မပါတဲ့ တွဲကားတွေတွေ့ရင် ခွင့်တောင်းပြီး ကပ်ပေးမယ်။ ​ရောင်ပြန်မကပ်ထားတဲ့ တွဲကားတွေ အများစုက ညပိုင်း​မှာ အ​နောက်က ဝင်တိုက်မိတဲ့အတွက် ယာဥ်တိုက်မှုတွေ မကြာခဏဖြစ်နေတာ တွေ့ရတယ်။ ရည်ရွယ်ချက်က ဒီလိုဖြစ်စဥ်တွေ ထပ်မဖြစ်အောင်လို့ပါ” လို့ ပြောပါတယ်။

အခုလ ၁၆ ရက် ညပိုင်းက ပရဟိတ လူနာတင်ယာဥ်တစီး အ​ရေး​ပေါ် အနီ​ရောင်အဆင့်ရှိတဲ့ လူနာ​တဦးကို ပို့​ဆောင်စဥ်မှာ လမ်းဖြတ်ကူးသူကို​ တိမ်းရှောင်ရင်း ​တွဲကားကိုတိုက်မိကာ လူနှစ်ဦးသေဆုံးရတဲ့ ဖြစ်စဥ် ရှိခဲ့​ပါတယ်။

ရန်ကုန်မြို့တွင်းမှာ ရောင်ပြန်စတစ်ကာ မကပ်ထားတဲ့ တွဲကားတွေကို ညပိုင်းမှာ နောက်ဘက်ကဝင်တိုက်မိတဲ့ ဖြစ်စဉ်မျိုး ဆက်လက်မဖြစ်ပွားစေဖို့အတွက် အခုလို စီစဉ်ဆောင်ရွက်တာဖြစ်ကြောင်း သိရပါတယ်။