စစ်ကိုင်းတိုင်း၊ ကောလင်းမြို့နယ်က ကျွဲ နွားတွေမှာ Lumpy Skin Disease အရေပြား အကျိတ်ဖုနာရောဂါ ဖြစ်ပွားနေတာကြောင့် ကျွဲ နွားတွေ သယ်ယူပို့ဆောင် ဖြတ်သန်းတာနဲ့ သတ်ဖြတ်ရောင်းချတာတွေကို ရက်အကန့်အသတ်မရှိ ယာယီရပ်ဆိုင်းထားကြဖို့ ကောလင်းမြို့နယ် ပြည်သူ့အုပ်ချုပ်ရေး ပ.အ.ဖ အဖွဲ့က အောက်တိုဘာ ၁၂ ရက်မှာ ထုတ်ပြန် အသိပေးထားပါတယ်။
ကောလင်းမြို့နယ် ပအဖအဖွဲ့ တာဝန်ရှိသူက “မြို့နယ်စိုက်/မွေးတာဝန်ခံအဖွဲ့တွေ ကွင်းဆင်းစစ်ဆေးချက်အရ ရောဂါလက္ခဏာတွေ တွေ့ရလို့ ကျွဲ နွား သယ်ယူပို့ဆောင်ဖြတ်သန်းတာနဲ့ သတ်ဖြတ်ရောင်းချတာတွေ မလုပ်ကြဖို့ ရက်အကန့်အသတ်မရှိ ယာယီရပ်ဆိုင်းထားရမယ့်အကြောင်း အသိပေး ထုတ်ပြန်ထားပါတယ်” လို့ ပြောပါတယ်။
ရောဂါတွေ ငြိမ်သက်သွားမှ ပြန်လည်ခွင့်ပြုသွားမှာဖြစ်ပြီး ထုတ်ပြန်ထားတဲ့ ကန့်သတ်ချက်တွေကို လိုက်နာဆောင်ရွက်ပြီး ကူညီဆောက်ရွက်ကြဖို့ တိုက်တွန်းနှိုးဆော်ထားကာ လိုက်နာဆောင်ရွက်ခြင်းမရှိရင် အရေးယူသွားမယ်လို့ ထုတ်ပြန်ချက်မှာ ရေးသားဖော်ပြထားပါတယ်။
