ယူကရိန်းနိုင်ငံ အရှေ့မြောက်ပိုင်း ခါကိဗ်ဒေသရှိ ဟရိုးဇာကျေးရွာက လူအယောက် ၅၀ ကျော် သေဆုံးခဲ့ရတဲ့ ရုရှားဒုံးကျည်တိုက်ခိုက်မှုမှာ ကူညီလမ်းပြပေးခဲ့ပြီး ရုရှားကိုထွက်ပြေးသွားတဲ့ ရွာသား ၂ ယောက်ကို ယူကရိန်းရဲ့ ပြည်တွင်းထောက်လှမ်းရေးဌာန (SBU) က အောက်တိုဘာ ၁၁ ရက်နေ့မှာ ဖော်ထုတ်ခဲ့ပါတယ်။
သံသယရှိသူ ရွာသား ၂ ဦးဟာ ညီအစ်ကိုတွေဖြစ်ကြပြီး ၂၀၂၂ ခုနှစ်က မော်စကိုဟာ ရွာကို လအတော်ကြာ ထိန်းချုပ်ထားခဲ့ချိန်မှာ အဲဒီသစ္စာဖောက် ၂ ယောက်က ရုရှားအာဏာပိုင်တွေအတွက် အလုပ်လုပ်ပေးခဲ့ကြောင်း ယူကရိန်းလုံခြုံရေးအဖွဲ့ (SBU) က တယ်လီဂရမ်အက်ပ်မှာ ကြေညာချက် ထုတ်ပြန်ခဲ့ပါတယ်။
ဟရိုးဇာကျေးရွာ တိုက်ခိုက်ခံရပြီးနောက်မှာ SBU အရာရှိတွေဟာ ရွာကို ရောက်လာကြပြီးတော့ ရွာခံတွေရဲ့ ဖုန်းတွေကို စစ်ဆေးခဲ့ကြောင်း ဒေသခံ ၂ ဦးက ရိုက်တာသတင်းဌာနကို ပြောပြခဲ့ပါတယ်။
SBU ရဲ့ အဆိုအရ အဲဒီညီအစ်ကို ၂ ယောက်ဟာ အောက်တိုဘာလ အစပိုင်းမှာ ဟရိုးဇာကျေးရွာရဲ့ လှုပ်လှုပ်ရှားရှား အချက်အလက်တွေကို စတင်စုဆောင်းခဲ့တယ်လို့ ဆိုပါတယ်။
ယူကရိန်း ထောက်လှမ်းရေး အေဂျင်စီဟာ အဲဒီအမျိုးသားတွေ ပိုင်ဆိုင်တဲ့ ရုရှားနိုင်ငံကူးလက်မှတ်တွေနဲ့ တခြားစာရွက်စာတမ်းတွေအပြင် သူတို့တွေ သတင်းအချက်အလက် ရရှိခဲ့တဲ့ မက်ဆင်ဂျာမှာ စကားပြောဆိုထားတဲ့ စခရင်ရှော့ ပုံတွေကိုလည်း ပို့စ်တင်ခဲ့ပါတယ်။ ရိုက်တာကတော့ အဲဒီအချက်အလက်တွေကို သီးခြား အတည်ပြုနိုင်ခြင်း မရှိပါဘူး။
အောက်တိုဘာ ၅ ရက်က ဟရိုးဇာကျေးရွာ တိုက်ခိုက်ခံရမှုဟာ အခုနှစ် ယူကရိန်းမှာ အသေအပျောက်အများဆုံး တိုက်ခိုက်ခံရမှုဖြစ်ပြီး ၂၀၂၂ ခုနှစ် ဖေဖော်ဝါရီက ရုရှားကျူးကျော်ပြီးကတည်းက အဆိုးရွားဆုံး တိုက်ခိုက်မှုလည်း ဖြစ်ပါတယ်။
လူဒါဇင်ပေါင်းများစွာ သေဆုံးခဲ့တဲ့အထဲက အများစုမှာ အရပ်သားတွေဖြစ်ကြပြီး သေဆုံးသူ ၅၅ ဦးရှိတယ်လို့ ယူကရိန်း အစိုးရရှေ့နေတွေက ပြောပါတယ်။ ဒါဟာ ကျေးရွာလူဦးရေ ၃၀၀ လောက် ရှိတဲ့အထဲက ၆ ပုံ ၁ ပုံလောက် သေဆုံးခဲ့တာဖြစ်ကြောင်း ဒေသခံအရာရှိတဦးက ရိုက်တာကို ပြောကြားခဲ့ပါတယ်။
Source/Photo-Reuters
