ရှစ်လေးလုံးအရေးတော်ပုံနောက်ခံ Beyond Rangoon ဟောလိဝုဒ် ရုပ်ရှင်ဇာတ်ကားထဲမှာ ပါဝင် သရုပ်ဆောင်ခဲ့တဲ့ မင်းသားကြီး ဦးအောင်ကိုရဲ့ ဈာပနကို အောက်တိုဘာ ၁၂ ရက် ဒီနေ့ မွန်းလွဲပိုင်း ပြင်သစ်နိုင်ငံ၊ ပါရီမြို့မှာ ကျင်းပဖို့ရှိနေပါတယ်။
ပြင်သစ်နိုင်ငံမြို့တော် ပါရီမှာ နှစ်ပေါင်းများစွာ အခြေချနေထိုင်တဲ့ အသက် ၈၇ နှစ်အရွယ် ဦးအောင်ကိုဟာ ပြီးခဲ့တဲ့ စက်တင်ဘာ ၉ ရက် နေ့လယ် ၁၂ နာရီမှာ လူကြီးရောဂါနဲ့ ကွယ်လွန်သွားခဲ့တာ ဖြစ်ပါတယ်။
ဦးအောင်ကို ကို ၁၉၃၆ ခုနှစ် အောက်တိုဘာ ၁၈ ရက်နေ့က သူ့ရဲ့ဇာတိ ပဲခူးခရိုင်၊ ရွှေကျင်မြို့နယ် ကွမ်းဆိပ်ရွာမှာ မွေးဖွားခဲ့တာ ဖြစ်ပါတယ်။
ဦးအောင်ကိုဟာ အိုးဝေနဲ့ ဟံသာဝတီ အပါအဝင် သတင်းစာတွေ၊ ဂျာနယ်တွေမှာ အောင်သာ အောင်ကိုကို၊ အောင်မျိုး စတဲ့ ကလောင်အမည်တွေနဲ့ ဆောင်းပါးတွေ ရေးသားခဲ့သူဖြစ်ပါတယ်။
ဒါ့အပြင် ပြင်သစ်နာမည်ကျော် စာရေးဆရာ အဲလ်ဘတ်ကမူးရဲ့ The Stranger (LE’ TRANGER) စာအုပ်ကို သူစိန်းဆန်ဆန် ဆိုတဲ့အမည်နဲ့ ဘာသာပြန်ဆိုခဲ့သူတဦးလည်းဖြစ်သည်။
သူဟာ လွန်ခဲ့တဲ့ ၁၉၆၀ ပြည့်လွန်နှစ်တွေကတည်းက ပြင်သစ်မှာ အခြေချနေထိုင်ခဲ့သူ ဖြစ်ပြီးတော့ မြန်မာဒီမိုကရေစီရေးတက်ကြွလှုပ်ရှား ကူညီဆောင်ရွက်ပေးခဲ့သူလည်းဖြစ်ပါတယ်။
၁၉၉၅ ခုနှစ်က ရုံတင်ပြသခဲ့တဲ့ Beyond Rangoon ရုပ်ရှင်ကားမှာ ပါဝင် သရုပ်ဆောင်ခဲ့တာပါ။ ဗြိတိန်ရုပ်ရှင်ဒါရိုက်တာ John Boorman ရိုက်ကူးတဲ့ အဆိုပါ ရုပ်ရှင်ကားကတော့ ၁၉၈၈ ခုနှစ် မြန်မာနိုင်ငံ ရှစ်လေးလုံး အရေးတော်ပုံကာလမှာ အမေရိကန် အမျိုးသမီးတိုးရစ်တယောက်ဖြစ်တဲ့ Laura Bowman ရောက်ရှိနေချိန်နဲ့ တိုက်ဆိုင် ဖြစ်ပျက်ခဲ့တဲ့ အကြောင်းအရာတွေကို သရုပ်ဖော်ထားတာ ဖြစ်ပါတယ်။
ဒီကားထဲမှာတော့ Bowman ဟာ ဒီမိုကရေစီရရှိရေးအတွက် နိုင်ငံရေး လှုပ်ရှားနေကြတဲ့ တက္ကသိုလ်ကျောင်းသားတွေနဲ့ မထင်မှတ်ဘဲ ပူးပေါင်းမိသွားကာ ကျောင်းသား ခေါင်းဆောင် ဦးအောင်ကိုနဲ့အတူ မြန်မာပြည်မှာ လည်ပတ်ခဲ့ပါတယ်။ အဆိုပါကာလတွေအတွင်း ငြိမ်းချမ်းစွာ ဆန္ဒပြနေတဲ့ ကျောင်းသားတွေကို မဆလ စစ်အစိုးရကနေ ဆိုးရွားစွာ နှိပ်ကွက်မှုတွေကြောင့် ကျောင်းသားတွေ ထိုင်းနိုင်ငံဆီ ထွက်ပြေးခဲ့ကြရတဲ့ အဖြစ်အပျက်ကို သရုပ်ဖော်ရိုက်ကူးထားခဲ့တာ ဖြစ်ပါတယ်။
Beyond Rangoon ရုပ်ရှင်ဟာ ပြင်သစ်နာမည်ကြီး ရုပ်ရှင်ပွဲတော်တခုဖြစ်တဲ့ ကိန်းရုပ်ရှင်ပွဲတော်မှာ ၁၉၉၅ ခုနှစ်ရဲ့ official selection အနေနဲ့ ရွေးချယ်ခံခဲ့ရပါတယ်။
