(က)

" မင့်ညီ သန်းမောင် အိမ်ပြန်ရောက်ပြီဆို "

" အင်း . . . . . . ဟူး . . . . . . "

အဘစောမူးသာ့အမေးကို အဘစိမ်းမောင်က သက်ပြင်းမှုတ်ထုတ်ရင်း ဖြေပါလေ၏။ မျက်နှာမှာ ပုံမှန်မဟုတ်၊ ရှုသိုးသိုး၊ တစ်ခုခုကို မကျေလည်သည့်သဏ္ဍာန်။ အဘစောမူးသာက စစ်ပြန်ကြီး အဘလုံးတုံးနှင့် ဖေကြီးကို အဓိပ္ပါယ်ပါပါ လှမ်းပြုံးပြပါလေ၏။

"မင်းညီသန်းမောင့်သား ' အပြေးချန်ပီယံ ' ကျော်ကြီးကော ပြန်ရောက်လာတာလား "

" အင်း . . . . . "

အမေးစကားတွေကို သိပ်ပြီးဖြေချင်စိတ်ရှိပုံမပေါ်။ အရွှင်အဘတွေက ပြုံးစိ ပြုံးစိ။ အဘ

လုံးတုံးက ဖေကြီးကိုလှမ်းပြုံးပြရင်း စိမ်းသရဖူစိမ်း ရပ်ကျေးဥက္ကဋ္ဌကြီးကို မေးပြန်ပါ၏။

"ဆိုင်ကယ်အဖမ်းမခံဘဲ ထွက်ပြေးတာကကျော်ကြီး၊ အဖမ်းခံရတာက သူ့အဖေ သန်း မောင်၊ တော်တော်ရှုပ်တဲ့ကောင်တွေကွာ "

" (---) ကောင် "

" မင်း ငါ့ကို ဘာလို့ဆဲတာလဲ "

" ဟာကွာ . . . မင်းကိုဆဲတာမဟုတ်ဘူးဟ၊

ဟိုသူတောင်းစား ငါ့တူကျော်ကြီးကိုဆဲတာ "

သို့ဖြင့် ဖြစ်ကြောင်းကုန်စင် သိရပါလေတော့၏။ ကျော်ကြီးကိုမမိ၍ သူ့အဖေကို ' ဓားစာခံ ' အဖြစ် ဖမ်းချုပ်ထားပြီးနောက် ကျော်ကြီးကိုပါ အခြားရွာမှာ ပျူစောထီး သတင်းပေး ဒလန်တို့လက်ချက်ဖြင့် ပုန်းခိုနေရာနေရာမှ ထပ်မံဖမ်းဆီးမိသွားပြီးသကာလ ရဲစခန်းအချုပ်ခန်းမှာ အတူတကွ စံမြန်းတော်မူကြရပါသတဲ့။

" အခု ကျော်ကြီးတစ်မျက်နှာလုံး ညိုမည်းပြီးဖူးယောင်နေတာများ သပြေသီးမှည့်ကြီးကျ နေတာပါပဲကွာ . . . "

" ရဲအချုပ်က ' ကျွေး ' လိုက်တာလား "

" အချုပ်ထဲအရင်ရောက်နှင့်နေတဲ့ သူ့အဖေသန်းမောင် ဗြောင်းဆန်အောင် စွတ်ထိုးထား

တဲ့ဒဏ်ရာက ပိုများတယ်တဲ့ဟ . . သေမှ "

" ဝါး . . . ဟားဟား ဟားဟား ဟားဟား "

ဘာမှမဆိုင်ပဲ အချုပ်ထဲမှာ လေးငါးခြောက်ရက် ' လေ ' နေတဲ့ ဦးသန်းမောင်ဟာ မာရသွန်ချန်ပီယံ သူ့သားကျော်ကြီးလည်း အချုပ်သံတိုင်တံခါးကို ခါးကိုင်း ခေါင်းငုံ့ပြီး ဝင်လာတာလည်းမြင်ရော ဘာမပြောညာမပြောနဲ့ ပြေးထိုးတာ ဝုန်းဒိုင်းကိုကြဲလို့ပါတဲ့ ခင်ဗျ။

နောက်ဆုံးမတော့ သူ့အစ်ကို အဘစိမ်းမောင်က အထက်ကအဘတွေနဲ့ အဆက်အသွယ်ရ ပြီး သားအဖနှစ်စလုံးကို ' ပြန်ထုတ် ' နိုင်ခဲ့ပါရောတဲ့။ '' ဒီလောက်မြန်မြန် အပြင်ပြန်ရောက် တာ အဘမတာပဲကွ" ဟု အဘစောမူးသာကပြောတော့ အဘစိမ်းမောင်ဆီက ဆဲသံကြီး ပေါ်လာပြန်ပါလေ၏။

" (---) တွေ . . . "

" မင်းက ဘလိုင်းကြီး ထဆဲနေပါလား "

" ဟိုကောင်တွေကို ဆဲတာဟ "

ရဲစခန်းက ရဲသူတောင်းစားတွေကို လှမ်းဆဲတာပါတဲ့။ ဘာဖြစ်လို့လဲမေးတော့ သူ့ညီနဲ့သူ့တူ  နှစ်ယောက်ပေါင်း လွတ်ဖို့အတွက် ရဲကြေး ' သိန်းသုံးဆယ် ' လောက် ကုန်သွားခဲ့ပါသတဲ့။ တိတိကျကျပြောရရင်တော့ ၂၇ သိန်းပေးလိုက်ရတယ်တဲ့ ခင်ဗျ။ ဒါကြောင့် မကျေမ နပ်လှမ်းဆဲနေတာ။

" (---)  ခွေးသူတောင်းစားတွေ . . . . . "

" ဟားဟား ဟားဟား ဟားဟား ဟားဟား "

" အဲဒါ မင်းတို့ကိုးကွယ်နေတဲ့ကောင်တွေလေ "

" မ အ လ တွေပေါ့ဟ စိမ်းမောင်ရ "

"  ဝါး . . . ဟားဟာ ဟားဟား ဟားဟား "

(ခ)

အဘစိမ်းမောင်ကား ' မအေ ' နှင့် ထပ်ကာ ထပ်ကာ ' ကိုင်တုတ် ' နေပါလေ၏ ခင်ဗျာ။ ကိုင်တုတ် မခံနိုင်ရိုးလား၊ သူ့ညီနှင့် သူ့တူကို လောလောဆယ် သူ ' စိုက် ' ၍ ရွေးထားရပေသကိုး။

"လူဆိုတာ ကိုယ့်ပေါင်ပေါ် မီးပွားကျကာမှ ကိုယ်ချင်းစာစိတ်လေး ဝင်လာတတ်တာမျိုး"

" နစကဥက္ကဋ္ဌဗိုလ်ချုပ်မှူးကြီးကတော့ ဘုရားနဲ့ တရားနဲ့၊ အောက်ခြေကကောင်တွေကတော့ တကယ့်ကို ရမ်းရမ်းကားကားနဲ့ ဓားပြတိုက် မိုက်ကြေးခွဲ ဝေစားနေကြတဲ့တကယ့် သူတောင်းစားတွေ"

" စိမ်းမောင် . . . စိမ်းမောင် . . . ခုချိန်ထိ မအလကို ' လူကောင်း ' လို့ ထင်နေတုန်းကိုးဟ . . . ဒုက္ခ . . . ဒုက္ခ "

အဘစိမ်းမောင်ကား ခုထိ ကြင်စိုး သာဝမအလကို ကိုးကွယ်နေတုန်းပါတကား။ ဟိုအဘတွေ ဘယ်လိုပင် ရှင်းပြရှင်းပြ နားမဝင်ပါလေ။ မအလသည် ဘုရားဒကာ လူ ကောင်းဟု ယုံကြည်ဆဲ။

" သူက လူကောင်းကွ၊ တိုင်းပြည့်အပေါ်စေတနာတကယ်ပိုတဲ့ပုဂ္ဂိုလ် "

" ကဲ ကဲ . . . ဘာတွေ ဘယ်လို စေတနာတွေပိုတယ်ဆိုတာ မိန့်တော်မူပါအုန်း "

" အေး . . . ဥပမာတစ်ခုပဲပြောမယ်ကွာ၊ ကုန်ဈေးနှုန်းတွေ အရမ်းတက်နေတဲ့ဒီအချိန်မှာ သူက ဝန်ထမ်းတစ်ယောက်ကို သုံးသောင်း အလကားတိုးပေးမှာတဲ့ "

" ဟေ . . . ဟုတ်လားဟ "

"ဒါတင်ဘယ်ကမလဲကွာ၊ နေ့စားဝန်ထမ်းတွေကိုလည်း တစ်နေ့ကို တစ်ထောင် တိုးပေးအုန်းမှာတဲ့ကွ "

" အဲဒီလို တိုးပေးလိုက်တော့ တိုင်းပြည်ပြီး အေးချမ်းပြီး တိုးတက်သွားရောလားဟ "

"ဘာပဲဖြစ်ဖြစ် ကုန်ဈေးနှုန်းကို ရင်ဆိုင်နိုင်ကြပြီပေါ့ကွာ "

" ဝါး ဟားဟား ဟားဟား ဟားဟား . . . "

သို့ဖြင့် အဘစောမူးသာနှင့် စစ်ပြန်ကြီးအဘလုံးတုံးတို့က ရှင်းပြကြရပြန်ပါ၏။ နိုင်ငံတွေမှာ ဝန်ထမ်းဆိုတာ နိုင်ငံ့လူဦးရေရဲ့ တစ်ရာခိုင်နှုန်းလောက်ပဲရှိကြောင်း၊ လစာတိုးပေးတယ်ဆိုတာ ' ကွက် ' ပြီးတိုးပေးလို့မရဘဲအခြား  စက်ရုံအလုပ်ရုံ' ကုမ္ပဏီဝန်ထမ်းတွေ' ရဲ့ အခြေခံလစာကိုပါ တိုးပေးနိုင်ပါမှ ညီမျှ မှုရှိပြီး လူတွေ အဆင်ပြေမှာဖြစ်ကြောင်း၊ ခုလိုမျိုး မစဉ်းစားမဆင်ခြင်ဘဲ သူတို့ခိုင်းကောင်းနေတဲ့ Non CDM အစိုးရဝန်ထမ်းတွေကိုသာ ' အစာ ' ပြပြီး ' ရုန်း ' ခိုင်း နေခြင်းအားဖြင့် ' ကုန်ဈေးနှုန်း' ဟာ ဒီ့ထက် ပိုပြီး ကြီးကိုကြီးလာမယ်ဟု သုံးသပ်ပြပါ၏။

" နိုင်ငံတစ်ခုမှာ ' ပြည်သူ့ဝန်ထမ်း ' အပါအဝင် ရှိရှိသမျှအိမ်ထောင်စုတွေအားလုံးကို မျှ မျှတတ ကြည့်ရမယ်ကွ "

" ဘယ်လို ' ကြည့် ' ရမှာလဲ မူးသာရ "

" ဒီလိုလေကွာ . . . ဥပမာကောင်းတစ်ခုရှိခဲ့တယ်၊ NLD အစိုးရလက်ထက် ကိုဗစ်ကာလကြီးမှာ ပြည်သူအားလုံး ဝင်ငွေတွေ နည်းသွားချိန် NLD အစိုးရက ထောက်ပံ့ကြေးတွေ ပေးတယ်။ နိုင်ငံသားမိသားစုအားလုံးကို ညီတူညီမျှ ပေးတယ်။ အဲသလိုမျိုး စနစ်တကျသွားရမှာ"

အခုဟာက ' လုပ်နည်း ' မှားနေတယ်ဟု သေသေချာချာ ရှင်းပြပါလေ၏။ မအလတွေက သူတို့သြဇာခံ Non CDM ဝန်ထမ်းတွေကွက်ကွက်ကလေးကိုသာ ' မဲဆွယ် ' ပြီး ကုပ်ပေါ်ခွနေဆဲ ဟု ဆိုပါလေ၏။

"  စေတနာ ' မမှန်တဲ့သဘောပေါ့ကွာ။ အခုလိုမျိုး ' သုံးသောင်းစီ ' တိုးပေးလိုက်တဲ့အခါ Money Supply တွေ တအားများသွားတော့တာပေါ့ကွာ "

" အေးကွ . . . မူးသာပြောတာအမှန်ပဲ။ လက်ရှိ မြန်မာနိုင်ငံမှာ လှည့်လည်နေတဲ့ ငွေသားပမာဏက ကျပ်ဘီလီယံပေါင်း ၃၀,၂၈၅ ရှိတယ်လို့သိရတယ်။ အခု ဝန်ထမ်းတစ်ဦးကို ကျပ် သုံးသောင်းဆိုတော့ ဝန်ထမ်း ၁ သန်းရှိရင် ငွေကြေးဖောင်းပွမှု ဘီလီယံ ၅၀ တက်လာပြီလို့ သိရတယ်ကွ "

" အင်း . . . လုံးတုံးပြောတာလည်း အမှန်ပဲ "

စိမ်းသရဖူစိမ်း အဘစိမ်းမောင်ကား ဟိုအဘ တွေရှင်းပြသမျှကို ပါးစပ်ကြီးဟကာ ငေးမော၍ နားဆင်နေသော်ငြား နားထဲသို့ဝင်ပုံမရပါလေ။

" မင်းတို့ ဘာတွေပြောပြော ' သုံးသောင်းစီ ' ရကြတယ်ဆိုတော့ ဝမ်းသာစရာပေါ့ကွာ "

" ဟားဟား ဟားဟား ဟားဟား . . . စိမ်း မောင် . . . စိမ်းမောင် . . ငါတို့တော့ ' ဟော ရင်းသာ ပျံလွန်တော်မူမယ် ' ဖြစ်တော့မဟ "

" ဝါး . . . ဟားဟား ဟားဟား ဟားဟား "

(ဂ)

အဘစောမူးသာနှင့် အဘလုံးတုံးတို့၏ သုံးသပ်ချက်များကား စိတ်ဝင်စားစရာပါ။ မအလမှာ စစ်လက်နက်တွေဝယ်ဖို့ ' ဒေါ်လာ ' ခမ်းနေပြီဖြစ်ကြောင်း၊ ခုဆိုရင် နိုင်ငံခြားမှာ အလုပ်လုပ်တဲ့သူတွေဆီက ရသမျှ ' ညှစ် ' လို့အားမရသေးဘဲ နိုင်ငံရပ်ခြားသွားပြီး သီချင်းသီဆိုဖျော်ဖြေသူတွေနှင့် နိုင်ငံခြားမှာပြပွဲသွားလုပ်သည့် ပန်းချီဆရာတွေဆီကပါ' အခွန် ' ဆိုကာ ရသမျှဒေါ်လာကို ညှစ်နေပြီဖြစ်ကြောင်း သိရပါလေ၏။

" နိုင်ငံခြားဆေးသွားကုသူတွေကိုပါ ညှစ်အုန်းမှာ မြင်ယောင်သေး "

" ဟေး ဟေး ဟေး ဟေး ဟေး "

" ငါ့စိတ်ထင်တော့ ဟိုးအရင်တုန်းက နိုင်ငံခြားမှာ စာပေဟောပြောပွဲတွေ ဟောခဲ့တဲ့ စာရေးဆရာတွေဆီကပါ ' ဘက်ဒိတ် ' နဲ့အခွန် ပြန်ကောက်အုံးမလားပဲဟ "

" ဟားဟား ဟားဟား ဟားဟား . . . . . "

" ခင်ဗျားက ဆယ်ပွဲ . . . ဒီတော့ တစ်ပွဲကို အခွန်ဒေါ်လာ ၁၀၀ နဲ့၊ အားလုံးပေါင်း ဒေါ် လာ ၁,၀၀၀ ဆောင်ပါ လုပ်ချင်လုပ်အုံးမှာ "

" ဟားဟား ဟားဟား ဟားဟား . . . . . "

မြန်မာနိုင်ငံမှာ ' ငွေကြေးဖောင်းပွမှု ' ကမြင့်သထက်မြင့်လာပြီး ခုလိုမျိုး ဝန်ထမ်းတွေကို ' ငါးစာ ' သုံးသောင်းချိတ်ပြီး မျှားဖို့ရာအတွက် ' ငွေစက္ကူ  ' တွေကို စိတ်ရှိတိုင်း ရိုက်ထုတ်ပေးဝေနေတဲ့အခါ ကုန်ဈေးနှုန်းဟာ ထပ်ပြီးတော့ကို တက်လာအုံးမှာပါတဲ့ ခင်ဗျ။ ခု ၂၀၂၃ ခုနှစ်အကုန် ပိုင်းကိုစောင့်ကြည့်ရင် ခု လက်ရှိအချိန်ထက် ကုန်ဈေးနှုန်းတွေ ဘယ်လောက် အထိများ ထပ်ပြီးတက်သလဲဆိုတာ မြင်ကြရအုံးမှာပါတဲ့။

မြန်မာလူထုရဲ့ အခြေခံစားကုန်တွေဖြစ်တဲ့ ဆန်၊ ဆီ၊ ဆားတို့ဟာ ဘယ်လောက် အထိ ' တက် ' နေပြီလဲဆိုတာ အားလုံးရင်မောစွာ မြင်ကြရပါသတဲ့။ ကျန်တဲ့ အ ထွေထွေဈေးနှုန်းတွေဟာလည်း လူတွေလက်လှမ်းလို့မမီအောင် ထောင်တက်နေပါပြီတဲ့။ မြန်မာပြည်မှာ ' ထမင်းငတ်လို့ သေတဲ့လူတွေတောင်မှ ' ရှိနေပါပြီတဲ့။

စကားဝိုင်းကား နားမချမ်းသာစရာများနှင့် ဖြစ်ပါလေ၏။ အရင်းစစ်တော့ အာဏာရူး မအလနှင့် လက်တစ်ဆုပ်စာနောက်လိုက်တစ်သိုက်ကောင်းစားဖို့ရာ နိုင်ငံနှင့်ပြည်သူကို ချနင်းခဲ့ခြင်းက အဖြေဖြစ်ပါလေ၏။

" ဒါနဲ့ စိမ်းမောင်ရေ . . . မင်းအခုရက်စပါးတွေရိတ်တော့ အလုပ်သမားတွေကို ဘယ်လိုပေးရလဲ "

" အဲ . . . အရင်အတိုင်း သုံးထောင်စီပဲပေါ့ မူးသာရ "

" မင်းတို့အဘ မအလတောင်မှ နေ့စားတွေကို တစ်ထောင်စီ တိုးပေးနေတဲ့ဟာ၊ မင်းလည်း တိုးပေးမှပေါ့ဟ "

" အဲ . . . "

" အဲဒါမှ မင်းဝန်ထမ်းတွေလည်း မင်းအပေါ်ကို ပိုပြီး ကြည်ညိုလာမယ်လေ "

" - - - - "

အဘစိမ်းမောင်ကား နှုတ်ဆိတ်သွားပါ၏။ စကားဝိုင်းကား အဆုံးသတ်တော့မည်ထင်၏။ အဘစောမူးသာနှင့် အဘလုံးတုံးတို့က ပြုံးဖြဲ ပြုံးဖြဲ ဖြစ်လာကြပါ၏။

" ဒီမှာ စိမ်းမောင် . . . မင့်တူကျော်ကြီးကို သေသေချာချာ မှာထားအုံး "

" ဒီကောင့်ကို ဘာမှာရမှာတုန်းဟ "

" နောက်တစ်ခါ ဆိုင်ကယ်အဖမ်းခံရလို့ထွက်ပြေးပြီး အချုပ်ကျရင် လိုက်မရွေးဘူးလို့ "

" အင်း . . . . . "

" အခု ' သိန်းသုံးဆယ် ' လောက်နဲ့ ပြတ်သွားခဲ့ပေမဲ့ နောက်လလောက်ဆိုရင် တော့ ကုန်ဈေးနှုန်းနဲ့လိုက်ပြီး ' သိန်း ၆၀ 'လောက်နဲ့ရွေးမှ ရတော့မှာလို့ ဆုံးမပြော ကြားထားတော်မူထားဖို့ပါ ခင်ဗျား "

" ဝါး . . . ဟား ဟား ဟား ဟား ဟား "

ဖေကြီး(လေရှီး)