သုံးပွဲဆက်တိုက်အနိုင်ရလဒ်နဲ့ ယုံကြည်မှုတည်ဆောက်နိုင်ခဲ့ကြောင်း ချဲလ်ဆီးနည်း ပြပိုချက်တီနိုက ပြောသွားပါတယ်။
ချဲလ်ဆီးအသင်းဟာ မနေ့ညက ကစားခဲ့တဲ့ ဘန်လေအသင်းနဲ့ပွဲစဉ်မှာ ဦးဆောင်ဂိုး အရင်ပေးလိုက်ရပေမဲ့ လေးဂိုးဆက်တိုက်သွင်းယူပြီး နောက်ဆုံးသုံးပွဲဆက်တိုက် နိုင်ပွဲရရှိခဲ့တာပါ။
ဒီလို နိုင်ပွဲဆက်မှုဟာ ငယ်ရွယ်တဲ့အသင်းတစ်သင်း၊ တည်ဆောက်နေဆဲအသင်းတစ်သင်းအတွက် အလွန် အရေးပါပြီး ယုံကြည်မှုကောင်းတွေ တည်ဆောက်နိုင်ခဲ့ကြောင်း နည်းပြပိုချက်တီနိုကပြောပါတယ်။
ပိုချက်တီနိုက “ကျနော်တို့ ကစားပုံကောင်းပေမဲ့တိုက်စစ်ပိုင်းမှာတော့ တိုးတက်မှုတွေရှိလာဖို့နဲ့ ယုံကြည်မှု မြင့်မား လာဖို့လိုအပ်ခဲ့တာပါ။ လက်ရှိအချိန်မှာတော့ နောက်ဆုံးသုံးပွဲဆက်အနိုင်ရလဒ်နဲ့အတူ အရေးပါတဲ့ ယုံကြည်မှုကောင်းတစ်ခုကို တည်ဆောက်နိုင်ခဲ့လို့ ကျေနပ်ပျော်ရွှင်မိပါတယ်” လို့ ပြောပါတယ်။
ချဲလ်ဆီးအသင်းဟာ လိဂ်ဖလားမှာ ဘရိုက်တန်ကို အနိုင်ရခဲ့သလို ပရီးမီးယားလိဂ်မှာလည်း နှစ်ပွဲဆက်တိုက် အနိုင်ရလို့ အဆင့် ၁၁ နေရာအထိတက်လှမ်းလာခဲ့ပါတယ်။
Photo-Reuters
