ရန်ကုန်မှာ အောက်တိုဘာ ၆ ရက် မနေ့က တရက်တည်း မြို့နယ် ၃ ခုမှာ မီးလောင်ခဲ့ပြီး ၁ ကြိမ်ကိုတော့ Level 1 အဆင့်နဲ့ ငြှိမ်းသတ်ခဲ့ရတယ်လို့ မြန်မာနိုင်ငံ မီးသတ်ဌာနချုပ်ရဲ့ မှတ်တမ်းအရ သိရပါတယ်။

မနေ့ နေ့လယ် ၁ နာရီ မိနစ် ၅၀ က မြောက်ဥက္ကလာပမြို့နယ်၊ ရွှေပေါက္ကံစက်မှုဇုန်၊ တောင်ငူလမ်းက အဆောက်အဦတခုမှာ မီးလောင်ခဲ့ပြီး မီးသတ်နဲ့ အရပ်ဘက်အသင်းတွေ ပူးပေါင်းငြှိမ်းသတ်ခဲ့တာကြောင့် နေ့လယ် ၂ နာရီလောက်မှာ မီးငြိမ်းသွားပါတယ်။

ရန်ကင်းမြို့နယ်၊ ၁၅ ရပ်ကွက်၊ အောင်ဇေယျလမ်းက ပြုပြင်နေဆဲ စားသောက်ဆိုင် တခုမှာလည်း နေ့လယ် ၁ နာရီ မိနစ် ၅၀ လောက်က ဝါယာရှော့ခ်ဖြစ် မီးလောင်ခဲ့ပြီး ဆိုင်အတွင်းက ဆိုဖာ၊ ဖော့ချပ်နဲ့ အခန်းတွင်းပစ္စည်းတွေ မီးစွဲလောင်ခဲ့ပါတယ်။

ရန်ကုန်မြို့ခံကယ်ဆယ်‌ရေးအသင်းဝင်တယောက်က “ရန်ကင်းမှာက ပြုပြင်လက်စ ဘီယာဆိုင်တခု လောင်တာပါ။ အတွင်းမှာသုံးတဲ့ ဖော့တွေနဲ့ ဝရိန်ပုံးကရှော့ခ်ဖြစ်ပြီး မီးစွဲလောင်တာ၊ ဆိုဖာတွေ၊ ဖော့ချပ်တွေရော လောင်သွားတယ်။ မီးခိုးလုံးတွေထွက်လို့ အတွင်းလှိုက်လောင်တဲ့ ပုံစံမျိုးဖြစ်တာ။ ၂ နာရီ ၅ မိနစ်လောက်မှာ ရေခဲသွားတယ်၊ ဒေါပုံ‌မှာက ၂ လွှာရဲ့ ဘယ်ဘက်က အခန်းလောင်တာ။ ဝါယာရှော့ခ်ဖြစ်ရင်း ဖြစ်တာလို့ ကနဦး သိရတယ်။ အသင်းဘက်က တဦး ထိခိုက်မိတာ ရှိပါတယ်” လို့ ပြောပါတယ်။

ရန်ကင်းမြို့နယ်က မီးလောင်မှုကို ရန်ကင်းမြို့နယ် မီးသတ်ယာဉ် ၂ စီးနဲ့ ရေသယ်ယာဉ် ၁ စီး၊ အရပ်ဘက်အသင်းတွေက ပူးပေါင်းငြှိမ်းသတ်ခဲ့ကြပြီး နေ့လယ် ၂ နာရီ ၅ မိနစ်ခန့်မှာ မီးငြိမ်းသွားကာ မီးလောင်မှုအတွင်း လူထိခိုက်ဒဏ်ရာရတာ မရှိဘူးလို့ သိရပါတယ်။

ညပိုင်း ၈ နာရီ ၄၅ မိနစ်လောက်မှာလည်း ဒေါပုံမြို့နယ်၊ မြို့သစ်ရပ်ကွက်၊ မင်္ဂလာသီရိလမ်းက တိုက် ၁ လုံးရဲ့ ၂ လွှာမှာ မီးလောင်ခဲ့ပြီး မီးတောက်အားကောင်းနေတာကြောင့် ည ၈ နာရီ ၅၅ မိနစ်လောက်မှာ Level 1 ယာဉ်အုပ်စုတွေ လာရောက်ငြှိမ်းသတ်ခဲ့ပါတယ်။

ဒေါပုံမြို့နယ်မီးသတ်စခန်းက မီးသတ်ယာဉ်၊ သက်ဆိုင်ရာမီးသတ်တပ်ဖွဲ့ယာဉ်တွေ၊ အရပ်ဘက်အသင်းတွေ ပူးပေါင်းငြှိမ်းသတ်ခဲ့ကြပြီး မီးသတ်ပိုက်ခေါင်းနဲ့ ရိုက်မိ တာကြောင့် ကယ်ဆယ်ရေးအသင်းဝင် အမျိုးသား ၁ ယောက် နဖူးထိခိုက်ဒဏ်ရာ ရခဲ့ပါတယ်။

မီးလောင်မှုကြောင့် တိုက်ခန်းအရှေ့တခန်းနဲ့ အတွင်းပစ္စည်းတွေ ပျက်စီးသွားပြီး မီးလောင်တဲ့အကြောင်းရင်းနဲ့ ပျက်စီးမှုတန်ဖိုးကို မီးသတ်တပ်ဖွဲ့က တွက်ချက်နေဆဲ ဖြစ်ကာ ည ၉ နာရီမှာ မီးငြိမ်းသွားပါတယ်။