ရန်ကုန်၊ မြောက်ဒဂုံမြို့နယ်၊ ပြည်ထောင်စုလမ်းမ၊ မဝတ လမ်းဆုံအနီးမှာ အောက်တိုဘာ ၄ ရက် မနက်အစောပိုင်းက YBS နဲ့ အိမ်စီးကားတိုက်မိပြီး ၁ ဦးသေဆုံးကာ ၆ ဦး ဒဏ်ရာရရှိခဲ့တယ်လို့ မြို့ခံလူမှုကူညီရေးအသင်းက ပြောပါတယ်။
ယာဉ်တိုက်မှုဟာ မနက်အစောပိုင်း ၂ နာရီခန့်က ဖြစ်ပေါ်ခဲ့တာဖြစ်ပြီး CNG ဂက်စ်ဖြည့်ကာ လမ်းမအတိုင်းဖြတ်လာတဲ့ YBS 112 နဲ့ မီးပွိုင့်မှာ ကွေ့လာတဲ့ လူ ၇ ဦးပါ Chevrolet အိမ်စီးကားတို့ တိုက်မိကြတာ ဖြစ်ပါတယ်။
ရှင်သန်ရေးအသင်း တာဝန်ရှိသူက “ည ၂ နာရီဝန်းကျင်လောက်က ဖြစ်တာ၊ ချက်ဗလက်ယာဉ်မောင်းကတော့ သေသွားတယ်။ PR-85 နဲ့ ဆေးရုံပို့ပေးထားပါတယ်။ ချက်ဗလက်က မီးပွိုင့်ကိုကွေ့လာတာ၊ YBS က တည့်တည့်ဖြတ်ရင်း တိုက်ကြတာ” လို့ ပြောပါတယ်။
ယာဉ်တိုက်မှုကြောင့် YBS ကား ညာဘက်နဲ့ ရှေ့မှန်ကွဲ၊ Chevrolet ကား ခေါင်းခန်းကြေမွသွားပြီး မြောက်ဒဂုံမြို့နယ်နေထိုင်သူ Chevrolet ယာဉ်မောင်း အသက် ၃၇ နှစ်အရွယ် ကိုကျော်စွာသန်းမှာ ပွဲချင်းပြီး သေဆုံးသွားကာ ကားပေါ်ပါ အသက် ၃၀ အရွယ် အမျိုးသား ၆ ဦး ထိခိုက်ဒဏ်ရာ ရရှိခဲ့ပါတယ်။
YBS 112 ဟာ တောင်ဒဂုံ ရိုးမရိပ်သာကနေ ဆူးလေ မြို့တော်ခန်းမအထိ ပြေးဆွဲနေတဲ့ ယာဉ်လိုင်းဖြစ်ပြီး ယာဉ်တိုက်မှုမှာ YBS ယာဉ်မောင်း ထွက်ပြေးသွားတယ်လို့ သိရပါတယ်။
အဆိုပါနေရာကို နွေးထွေးကူညီမှုအသင်း၊ မီးအိမ်ရှင် ကူညီရေးအသင်း၊ ဝန်းရံမှူး ကူညီရေးအသင်း၊ YRO ဒဂုံခရိုင်အဖွဲ့၊ ရှင်သန်ရေးကူညီမှုအသင်းတို့ရဲ့ လူနာတင်ယာဉ် ၆ စီးနဲ့ မြောက်ဥက္ကလာပဆေးရုံကြီးကို ပို့ဆောင်ပေးထားပါတယ်။
