စစ်ကိုင်းတိုင်း၊ ကလေးမြို့၊ မြို့လှရပ်ကွက် နယ်မြေ ၉ က နေအိမ် ၂ အိမ်ကို အောက်တိုဘာ ၁ ရက် ညနေမှာ လက်နက်ကိုင် ၂ ယောက်က ဓားပြတိုက်ခဲ့တယ်လို့ ဒေသခံတွေက ပြောတယ်။
မြို့လှရပ်ကွက်နေသူတဦးက “ပထမဆုံးအိမ်ကို အရင်ဝင်ပြီး ပိုက်ဆံ ၃ သိန်း တောင်းတာ။ သူတို့က သေနတ်အတိုတွေနဲ့ ခြိမ်းခြောက်တာ။ မရှိလို့ ၂ သိန်းပဲ ပေးလိုက်ရတာ။ နောက်ထပ် တအိမ်အတွင်းကို ဝင်ပြီး ကျပ်သိန်း ၂၀ တိတိတောင်းလို့ ပေးလိုက်ရတာ” လို့ ပြောပါတယ်။
အရပ်ဝတ်တွေနဲ့ လက်နက်ကိုင် ၂ ယောက်ဟာ နေအိမ် ၂ အိမ်က စုစုပေါင်း ၂၂ သိန်းကျပ်ကို ဓားပြတိုက်ခဲ့ပြီးနောက် မြို့လှရပ်ကွက်ကနေ တောင်ဇလပ်ရပ်ကွက်ဘက်ကို ထွက်ခွာသွားကြတယ်လို့ ဆိုပါတယ်။
ဓားပြတိုက်သူ ၂ ယောက်ဟာ စစ်ကောင်စီလက်အောက်ခံ ပျူစောထီးအဖွဲ့ဝင်တွေ ဖြစ်တယ်လို့ ဒေသခံ တော်လှန်ရေးအင်အားစုတွေဘက်က ပြောပေမဲ့ ဒီဗွီဘီအနေနဲ့တော့ အတည်မပြုနိုင်သေးပါဘူး။
ဩဂုတ်လတုန်းကလည်း ကလေးမြို့ အရှေ့ပိုင်းရပ်ကွက်တွေဖြစ်တဲ့ အောင်သစ္စာနဲ့ အောင်မင်္ဂလာရပ်ကွက်မှာ ဓားပြတိုက်မှု ၅ ကြိမ်ထက်မနည်း ဖြစ်ပွားခဲ့ပါသေးတယ်။
အဲ့ဒီ ဓားပြတိုက်မှုဖြစ်စဉ်နဲ့ပတ်သက်ပြီး စစ်ကောင်စီဘက်ကတော့ လာရောက်စုံစမ်း အရေးယူတာ မရှိသလို ဒေသခံတွေကလည်း သွားရောက်တိုင်ကြားတာ မရှိကြပါဘူး။
