ဖိလစ်ပိုင်နိုင်ငံကနေ ထိုင်းနိုင်ငံကိုလာတဲ့ ကုန်တင်သင်္ဘောတစီးရဲ့ ကွန်တိန်နာထဲမှာ အလောင်း ၂ လောင်းကို တွေ့ရှိတယ်လို့  sanook.com ထိုင်းသတင်းမှာ ဖော်ပြ ပါတယ် ။ 

အောက်တိုဘာ ၂ ရက် မနက် ၅ နာရီလောက်က ဘန်ကောက် လတ်ကရဘန်းနယ်မြေရှိ ကွန်တိန်နာသေတ္တာတခုထဲမှာ ပုပ်ပွနေတဲ့ လူသေအလောင်း ၂ လောင်း တွေ့ရှိကြောင်း အကြောင်းကြားချက်ရခဲ့တယ်လို့  လုမ့်ကတန်လူမှုကူညီရေးအသင်းက  သတင်းထောက်တွေကို ပြောပါတယ်။ 

အဆိုပါ အလောင်း ၂ လောင်းမှာ အမျိုးသမီး ၁ ဦး နဲ့ အမျိုးသား ၁ ဦးတို့ဖြစ်ပြီး ပုပ်ပွနေကာ မီးရှို့ထားတဲ့အရာပါတွေ့ရှိတာကြောင့် အသတ်ခံရတယ် ယူဆရကြောင်း ဆိုပါတယ်။ 

အလောင်းနားမှာ ဘာမှတ်ပုံတင်အထောက်အထားမှမရှိတာကြောင့် ဘယ်သူဘယ်ဝါမှန်း မသိရသေးဘဲ လောလောဆယ် သက်သေစိစစ်ရေးရဲတပ်ဖွဲ့က ဆက်လက်စစ်ဆေးနေတယ်လို့ ဆိုပါတယ်။ 

အဆိုပါဖိလစ်ပိုင်ကုန်တင်သင်္ဘောဟာ ပြီးခဲ့တဲ့ စက်တင်ဘာ ၂၄ ရက်ကတည်းက ထိုင်းအရှေ့တောင်ပိုင်း ချွန်းပူးရီးခရိုင် လဲမ်ချဘန်းသင်္ဘောဆိပ်ကို ကမ်းကပ်လာတာဖြစ်ပါတယ်။ 

ကုန်ပစ္စည်းပါ ကွန်တိန်နာတွေကိုတော့ ဒီကနေ့ အောက်တိုဘာ ၂ ရက် မနက် ၅ နာရီလောက်မှ ဘန်ကောက် လတ်ပရဘန်းဂိုဒေါင်ကို သယ်ဆောင်လာတာဖြစ်ပြီး လူသေအလောင်းပါ တွေ့ရတာလို့  တာဝန်ရှိသူက သတင်းထောက်ကို ပြောသွားပါတယ်။ 

sources-sanook