ရန်ကုန်၊ ဒလမြို့မရဲစခန်းမှာ စက်တင်ဘာ ၂၆ ရက် ဒီနေ့မနက် ၅ နာရီက အချုပ်ခန်းခေါင်မိုးကို ဖောက်ပြီး ထွက်ပြေးသွားတဲ့ အချုပ်သား ၆ ဦးကို လက်ရှိအခြေအနေအထိ ပြန်လည်ဖမ်းဆီးရမိခြင်း မရှိသေးဘူးလို့ ဒေသခံတွေဆီက သိရပါတယ်။
ဒီနေ့မနက် ၅ နာရီက ဒလမြို့မရဲစခန်းရှိ အချုပ်ခန်းခေါင်မိုးကို အချုပ်သား ၆ ဦးက ဖောက်ပြီး ထွက်ပြေးသွားတာလို့ ဒေသခံတဦးက ဒီဗွီဘီကို ပြောပါတယ်။
“ခေါင်မိုးက သွပ်တွေကိုခွာပြီး ထွက်ပြေးသွားတာလို့ ကြားတယ်။ မနက်ကတည်းက စစ်နေတာ အခုချိန်ထိပဲ၊ အိမ်စီးကားတွေပါ စစ်တာ။”
အချုပ်သား ၆ ဦး ထွက်ပြေးသွားတဲ့အတွက် ရဲဝန်ထမ်းတချို့လည်း စစ်ဆေးခံနေရတယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“သူတို့ကို တာဝန်ယူထားတဲ့ ရဲတွေ အစစ်ခံနေရတယ်။ စစ်တပ်က လိုက်ရှာပေးနေတယ်။ အခုထိ မမိသေးဘူး။”
ထွက်ပြေးလွတ်မြောက်သွားသူတွေဟာ လုယက်မှု၊ မူးယစ်ဆေးဝါးအမှု စတဲ့ ပြစ်မှုတွေနဲ့ ဖမ်းဆီးခံထားရသူတွေလည်း ဖြစ်တယ်လို့ ဆိုပါတယ်။
လက်ရှိအခြေအနေအထိ စစ်ကောင်စီတပ်နဲ့ ရဲတွေဟာ ဒလမြို့ပေါ်နဲ့ ဒလ-တွံတေး အဝင်အထွက် နေရာတွေမှာ အိမ်စီးကားတွေနဲ့ ခရီးသည်တင်ယာဥ်တွေကို စစ်ဆေးနေတယ်လို့ ဒေသခံတွေဆီက သိရပါတယ်။
