မဟာမြိုင်တောဘက်မှာ မိုးများပြီးလမ်းပိတ်နေတာ သီတင်းတပတ် ပတ်ဝန်းကျင်ရှိပြီဖြစ်လို့ စစ်ကိုင်းတိုင်း၊ ကလေးမြို့မှာ စက်သုံးဆီတွေ ပြတ်တောက်နေပြီး စက်သုံးဆီဆိုင်အချို့ ပိတ်ထားရတယ်လို့ မြို့ခံတွေကပြောပါတယ်။

စက်တင်ဘာလ ၂၆ရက် ဒီနေ့မနက်ပိုင်းမှာတော့ ကလေးမြို့တွင်းက KTဆီဆိုင်၊ရဲတံခွန်ဆီဆိုင်၊‌ ရွှေလမင်းဆီဆိုင်တွေကသာ စက်သုံးဆီတွေကိုအကန့်အသတ်ဖြင့်ရောင်းချပေးနိုင်တော့တာပါ။

ရောင်းချပေးတဲ့စက်သုံးဆီဆိုင်တွေမှာအောက်တိန်း 92 တဂါလံကို ကျပ်  ၁၈၀၀၀ ဝန်းကျင်၊ 95 တဂါလံကို ကျပ် ၂၀၀၀၀ ဝန်းကျင်ဈေးနဲ့ ဓာတ်ဆီတွေကို ဆိုင်ကယ်တစ်စီးလျှင် ကျပ်  ၅၀၀၀ ဖိုးသာထည့်သွင်း ရောင်းချပေးနိုင်တော့တာလို့ဆိုပါတယ်။

ကလေးမြို့ခံတဦးက “ မဟာမြိုင်လမ်းကမိုးများပြီး လမ်းပိတ်နေတော့ ဆီတွေပြတ်ကြတာ။ ဒီဇယ်ကတော့ ထည့်လို့ရသေးတယ်။ ကလေးမြို့လည်း ဆိုင်ကယ်ပဲအဓိက အစီးများကြတာလေ။ 92/95တွေပြတ်တော့ အခက်တွေ့တယ်။” လို့ ဒီဗွီဘီကို ပြောပါတယ်။

ကလေးမြို့က စက်သုံးဆီဆိုင်ကြီးတွေဖြစ်တဲ့ အိုဆို၊ မြမေတ္တာမွန်၊ ရဲတံခွန်၊ တော်ဝင်၊ PPK စတဲ့ စက်သုံးဆီဆိုင်တွေကတော့ ရောင်းချစရာ ဆီမ‌ရှိတော့တာကြောင့် ဆိုင်ပိတ်ထားလိုက်ရပြီလို့ ဆိုပါတယ်။

ကလေးမြို့ကနေ မြန်မာပြည်အောက်ပိုင်းဘက်ကိုသွားတဲ့ ကလေး-ဂန့်‌‌ဂေါလမ်း၊ ကလေးဝ-မဟာမြိုင်လမ်း၊ ကလေးဝ-မင်းကင်းလမ်း၊ ကလေး-ဟားခါးလမ်း စတဲ့ အဓိကလမ်းမကြီး ၄ ခုရှိပြီး လက်ရှိမှာတော့ မဟာမြိုင်လမ်းကို အဓိကအသုံးပြု‌နေရပြီး ကလေး-ဂန့်ဂေါလမ်းကတော့ လမ်းကြောပိတ်နေတာ ၂ နှစ်ကျော်နေပြီလည်း ဖြစ်ပါတယ်။