ရန်ကုန်၊ ဒဂုံမြို့သစ်မြောက်ပိုင်းမြို့နယ်က ဖုန်းအပိုပစ္စည်းဆိုင်တခုမှာ မနေ့ညပိုင်းက ဝါယာရှော့ဖြစ်ပြီး မီးလောင်ခဲ့တယ်လို့ မြောက်ဒဂုံမီးသတ်တပ်ဖွဲ့က ပြောပါတယ်။
ည ၁၁ နာရီခွဲလောက်မှာ မီးလောင်မှုသတင်းရရှိခဲ့တာကြောင့် မြောက်ဒဂုံမြို့နယ် မီးသတ်ယာဉ်တွေနဲ့ အရပ်ဘက်ကယ်ဆယ်ရေးအသင်းတွေက သွားရောက် ငြှိမ်းသတ်ခဲ့ကြတာ ဖြစ်ပါတယ်။
အဲဒီဆိုင်ဟာ ဖုန်း၊ ကွန်ပြူတာအပိုပစ္စည်းနဲ့ အလှကုန်တွဲရောင်းတဲ့ ၂ ခန်းတွဲ ဆိုင်ခန်းဖြစ်ပြီး အတွင်းခန်းထဲက မီးလောင်နေတာကြောင့် မီးသတ်တပ်ဖွဲ့က တံခါးဖျက်ပြီး ဝင်ရောက်ငြှိမ်းသတ်ခဲ့ရတာ ဖြစ်ပါတယ်။
ကယ်ဆယ်ရေးအဖွဲ့ဝင်တယောက်က “လမ်းမတန်းက ဖုန်းပစ္စည်းဆိုင်တခုမှာ အတွင်းက လှိုက်လောင်နေတာ၊ အထဲမှာလူတော့ မတွေ့ခဲ့ရဘူး။ ဆိုင်ပိတ်ချိန် ၈ နာရီလို့တော့ တွေ့တယ်။ မီးလောင်တာက ၁၁ ခွဲလောက်။ ဝါယာကြိုးတွေ မီးစွဲပြီး လောင်တဲ့ပုံပါ။ တံခါးတော့ ဖျက်ပြီးမှ ငြှိမ်းလို့ ရသွားတယ်” လို့ ဆိုပါတယ်။
မီးလောင်မှုကြောင့် ဆိုင်မျက်နှာစာအပါအဝင် ဆိုင်သုံးပစ္စည်းနဲ့ အခန်းအရှေ့ပိုင်း လောင်ကျွမ်းပျက်စီးသွားပြီး ည ၁၁ နာရီ ၄၅ မိနစ်လောက်မှာ မီးငြိမ်းသွားပါတယ်။
ဆိုင်မီးလောင်မှုရဲ့ ပျက်စီးဆုံးရှုံးမှုတန်ဖိုးကို မီးသတ်တပ်ဖွဲ့က တွက်ချက်နေဆဲ ဖြစ်တယ်လို့သိရပြီး စက်တင်ဘာ ၉ ရက်မှာပဲ နေ့လယ် ၁ နာရီခွဲလောက်က ရန်ကုန်၊ ကျောက်တံတားမြို့နယ်၊ ဘားလမ်းကုသိုလ်ဖြစ်ဆေးရုံနဲ့ တောင်ဒဂုံစက်မှုဇုန်ရှိ စက္ကူစက်ရုံတို့မှာ မီးလောင်ကျွမ်းခဲ့ပါသေးတယ်။
