ပရီးမီးယားလိဒ် နာမည်ကျော်ကလပ် ဖူလ်ဟမ်အသင်းရဲ့ ဥက္ကဋ္ဌနဲ့ အသင်းပိုင်ရှင်ဟောင်းဖြစ်သူ အီဂျစ်ဘီလီယံနာသူဌေး မိုဟာမက် အယ်ဖေးရ်ဟာ အသက် ၉၄ နှစ်အရွယ်မှာ ကွယ်လွန်ခဲ့တယ်လို့ ဖူလ်ဟမ်အသင်းရဲ့ထုတ်ပြန်ချက်ကိုးကားပြီး Mirror သတင်းဌာနက စက်တင်ဘာ ၂ ရက်နေ့ မှာ ဖော်ပြထားပါတယ်။

မိုဟာမက်အယ်ဖေးရ်ဟာ သားကြီးဖြစ်သူ ဒိုဒီနဲ့​ ဝေလမင်းသမီး ဒိုင်ယာနာတို့ ကားမတော်တဆဖြစ်ပြီး ကွယ်လွန်ခဲ့တာ ၂၆ နှစ်မြောက် နှစ်ပတ်လည်နေ့ မတိုင်ခင် ၁ ရက်အလိုဖြစ်တဲ့ သြဂုတ် ၃၀ ရက်နေ့မှာ ကွယ်လွန်ခဲ့တာပါ။

မိုဟာမက်အယ်ဖေးရ်ကို လန်ဒန်မြို့က Regent`s Park Mosque မှာ စက်တင်ဘာ ၁ ရက်နေ့ သောကြာနေ့ဝတ်ပြုဆုတောင်းအပြီးမှာ သင်္ဂြိုလ်ခဲ့ပါတယ်။

ဖူလ်ဟမ်အသင်းက "မိုဟာမက်အယ်ဖေးရ် ကွယ်လွန်သွားတဲ့အတွက် အထူး ဝမ်းနည်းကြောင်း ပြောချင်ပါတယ်။ ဖူလ်ဟမ်အသင်းကလူတိုင်းဟာ အသင်းပိုင်ရှင်ဟောင်း သေဆုံးခဲ့တဲ့ မယုံကြည်နိုင်အောင်ဖြစ်ရပြီး စိတ်မကောင်းလည်း ဖြစ်ခဲ့ရပါတယ်။ သူဟာ ကလပ်ကို ပရီးမီးယားလိဒ်ကို အရောက်ပို့ပေးနိုင်ခဲ့တဲ့အပြင် ယူရိုပါလိဒ် ဖိုင်နယ်တက်အောင်အထိ အကူညီပေးနိုင်ခဲ့ပါတယ်။ ကလပ်အတွက် လုပ်ပေးခဲ့တဲ့ အရာအားလုံးကျေးဇူးတင်ပါတယ်" လို့ ထုတ်ပြန်ခဲ့ပါတယ်။

​​​မိုဟာမက်အယ်ဖေးဟာ ၁၉၉၇ ခုနှစ်မှာ သားအကြီးဖြစ်သူ ဒိုဒီနဲ့ မင်းသမီးဒိုင်ယာတို့ သေဆုံးခဲ့မှုနဲ့ပတ်သက်ပြီး ​​​ဗြိတိန်နိုင်ငံကို မေးခွန်းထုတ်ခဲ့တဲ့အတွက် နိုင်ငံသားဖြစ်ခွင့် ၂​ကြိမ် တိုင်တိုင် ငြင်းပယ်ခံခဲ့ရပါတယ်။

ဖူလ်ဟမ်အသင်းဟာ မိုဟာမက်အယ်ဖေးရ်ကွယ်လွန်ခြင်း ဝမ်းနည်းကြောင်း ပြတဲ့အနေဖြင့် ဒီနေ့ည မန်စီးတီးနဲ့ပွဲမှာ ၁ မိနစ်ခန့်ငြိမ်သက်သွားမယ်လို့ သတင်းမှာ ဖော်ပြထားပါတယ်။

အီဂျစ်ဘီလီယံနာ မိုဟာမက်​အယ်ဖေးရ်ဟာ ၁၉၉၇ ခုနှစ်မှာ ဖူလ်ဟမ်အသင်းကို ဝယ်ယူခဲ့ပြီး ၂၀၁၃ ခုနှစ်မှာ မစ္စတာခန်းကို ပြန်လည် ရောင်းချခဲ့ပါတယ်။

Source. Mirror