တရုတ် - မြန်မာ နယ်စပ် ကုန်သွယ်ရာ လမ်းကြောင်းပေါ်က မူဆယ် ၁၀၅ မိုင် မောင်းတံဂိတ်နား ဩဂုတ် ၂၉ ရက် မွန်းလွဲ ၂ နာရီကျော်လောက် ပြည်သူ့စစ်နဲ့ စစ်တပ်တို့ အချင်းချင်းခိုက်ရန်ဖြစ်ရာမှ ပစ်ခတ်မှုဖြစ်ပွားပြီး စစ်တပ်အရာရှိ အပါအဝင် ၂ ဦး သေဆုံးပြီး ၂ ဦး ဒဏ်ရာရရှိကြောင်း ဒေသခံတွေက ပြောပါတယ်။ 

၁၀၅ မိုင် အေးရှားဝေါလ်အနီး ဘုရားကုန်းမှာ စခန်းချနေထိုင်တဲ့ လုံထန် ပြည်သူ့စစ်အဖွဲ့က လာပစ်သွားတာလို့ ဒေသခံတဦးက ပြောပါတယ်။ 

“အချင်းချင်းပစ်တာ။ ပြည်သူ့စစ်တွေက စစ်ကောင်စီတွေကို ပစ်တော့ စစ်ကောင်စီဘက်ကလည်း ပြည်သူ့စစ်ကို ပြန်ပစ်တာ။” 

အဲဒီပစ်ခတ်မှုအတွင်း ဂိတ်မှာရှိတဲ့ ၄၂၁ တပ်က အရာရှိ ၁ ဦး၊ ဆက်သွယ်ရေး တပ်ကြပ်ကြီး ၁ ဦး သေဆုံးပြီး ၂ ဦး ဒဏ်ရာရှိတယ်လို့ ပြောပေမဲ့ ဓာတ်ပုံထဲမှာတော့ ပြည်သူ့စစ် ၁ ဦး အပါအဝင် သုံးဦး သေဆုံးနေတာ တွေ့ရပါတယ်။ 

ကားကုန်တင်ကားသမားတဦးကတော့ အဲဒီဂိတ်မှာ လုံထန်ပြည်သူ့စစ်နဲ့ စစ်တပ်ပဲ ထိုင်တယ်လို့ ပြောပါတယ်။ 

အဲဒီဂိတ်က မူဆယ် ၁၀၅ မိုင်ကနေ လားရှိုးဘက်အထွက်၊ အေးရှားဝေါလ်ဂိတ်မှာ ဖြစ်ပြီး ပုံမှန် ၅ ယောက်လောက်ပဲ ထိုင်တာလို့ ဆိုပါတယ်။ 

မနေ့နဲ့ ဒီကနေ့မှာတော့ မူဆယ်မြို့နယ်ထဲ စစ်ကောင်စီတပ်နဲ့ KIA တို့အကြား တိုက်ပွဲ ပြင်းထန်နေသလို စစ်ကောင်စီနဲ့ TNLA တို့လည်း တိုက်ပွဲပြင်းထန်နေပြီး စစ်ကောင်စီက လေကြောင်းပါ အသုံးပြုနေပါတယ်။ 

ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်၊ နမ့်ဖတ်ကာရွာမှာတော့ ဩဂုတ် ၂၉ ရက် ညနေ ၃ နာရီခွဲ ဝန်းကျင်က ရပ်ကွက် ၃ နဲ့ ရပ်ကွက် ၄ မှာ လက်နက်ကြီး ကျ‌ရောက်တာကြောင့် နေအိမ် ၂ လုံး ထိမှန် ပျက်စီးသွားတယ်လို့ ဒေသခံတွေက ပြောပါတယ်။ 

“ဟုတ်တယ်။ အိမ် ၂ အိမ်တော့ ထိတယ်။ ဒါပေမဲ့ အရမ်းဆိုးဝါးသွားတာက ရပ်ကွက် ၃ က ဆရာ မောင်မောင်သာရဲ့ အိမ်” လို့ ရပ်ကွက် ၃ နေ အမျိုးသမီးတဦးက ပြောပါတယ်။ 

လူထိခိုက်တာ မရှိပေမယ့် အဲဒီအိမ်ရဲ့ အပေါ်ဘက်က အမိုးတွေ၊ မျက်နှာကြက်တွေ အကုန်ပျက်စီးသွားတယ်လို့ ဆိုပါတယ်။ 

“ရပ်ကွက် ၃ မှာက ၂ လုံး လာကျတာမှာ ၁ လုံးက မီးသွေးအိတ် ပုံထားတဲ့ထဲမှာ ကျကွဲပြီး ၁ လုံးက အိမ်မှာကို ထိမှန်သွားတာ” လို့ သူက ရှင်းပြပါတယ်။ 

ရပ်ကွက် ၄ ဘက်က‌ အိမ်က အရမ်းတော့ မထိဘဲ လူကတော့ လက်တွေမှာ နည်းနည်း စင်ထိ ဒဏ်ရာရတယ်လို့ ရပ်ကွက် ၄ နေ အမျိုးသမီးတဦးက ပြောပါတယ်။ 

"ရပ်ကွက် ၄ နဲ့ အောင်သပြေဘက်မှာ။ အဲမှ TNLA တွေ ရှိလို့လေ။ အဲဒီမှာ သူတို့ (နမ့်ဖတ်ကာ စစ်ကောင်စီ ၁၂၃ တပ်က) လှမ်းပစ်သွားတာ။" 

အဲဒီမှာတော့ လက်နက်ကြီး ၁ လုံးပေါက်ကွဲလို့ လူ ၁ ဦး နည်းနည်းဒဏ်ရာရပြီး မပေါက်ကွဲသေးတဲ့ လက်နက်ကြီး ကျည် ၂ လုံးလည်း ကျန်နေတယ်လို့ သူက ပြောပါတယ်။

မနေ့ညနေက တအာင်းလွတ်မြောက်ရေးတပ်မတော် (TNLA) တပ်ဖွဲ့ဝင်တွေကို ယူနီဖောင်းအပြည့်အစုံ  သေနတ်တွေနဲ့ ဘုရားကျောင်းဘက်သွားတဲ့ လမ်းမကြီးဘေးမှာ တွေ့ရတယ်လို့ မျက်မြင် ဒေသခံ နောက်တဦးက ပြောပါတယ်။ 

“သူတို့ရှိတယ်ဆိုတဲ့ သတင်းရတော့ ဒီစစ်တပ်ကုန်းက လူတွေက သူတို့ကို ပစ်တာလေ။ ...  ရပ်ကွက် ၃ ဘုရားကျောင်း တက်သွားတဲ့လမ်းဘေးနားက လမ်းမကြီးမှာကို နေနေကြတာလေ။ ကလေးတွေ ကျောင်းဆင်းလာတဲ့ အချိန်။" 

ဘယ်လက်နက်ကိုင် အဖွဲ့ကိုမှ ရွာထဲ၊ ရပ်ကွက်ထဲ ယူနီဖောင်းနဲ့ လက်နက်တွေကိုင်ပြီး လုံးဝ မလာစေချင်ဘူးလို့ သူက ပြောပါတယ်။ 

ပြီးခဲ့တဲ့ ဇူလိုင် ၂၅ ရက်နေ့ကလည်း နမ့်ဖတ်ကာ ဇီးဒဘန်ရွာလမ်းနဲ့ ဈေးအနီးက နေအိမ် ၁ လုံးပေါ် လက်နက်ကြီးကျတာကြောင့် ထိခိုက်ပျက်စီးခဲ့ပြီး ဇူလိုင်လ ၁၈ ရက်နေ့ကလည်း ဇီးဒဘန်ရွာမှာ လက်နက်ကြီးကျည်ထိမှန်တာကြောင့် ပြည်သူ ၁ ဦးသေဆုံးပြီး ၃ ဦး ထိခိုက် ဒဏ်ရာရခဲ့ပါတယ်။