အပြည်ပြည်ဆိုင်ရာအာကာသစခန်း(ISS)မှာ သြဂုတ် ၂၇ ရက်က အသစ်ရောက်ရှိလာတဲ့ အာကာသယာဉ်မှူးတွေကို လက်ရှိအဖွဲ့ဝင်တွေက ကြိုဆိုနှုတ်ဆက်ခဲ့ကြပါတယ်။ 

မတူညီတဲ့နိုင်ငံ ၄ ခုကနေ ပါဝင်လာခဲ့တဲ့ အာကာသယာဉ်မှူး အသစ်တွေဟာ စည်းလုံးညီညွတ်မှုနဲ့ ပူးပေါင်းဆောင်ရွက်မှုတွေ လိုအပ်တယ်ဆိုပြီး အလေးပေး ပြောဆိုခဲ့ပါတယ်။ 

ဒါ့အပြင် ISS ယာဉ်အတွင်းပိုင်းမှာ ဘတ်တီးရီးယားနမူနာတွေ စုဆောင်းမှုနဲ့အတူ အာကာသ ယာဉ်မှူးတွေ အိပ်စက်နေချိန်အတွင်း ဇီဝကမ္မဆိုင်ရာ ရှုထောင့်တွေစတဲ့ သိပ္ပံနည်းကျ စမ်းသပ်မှုတွေ ကို အဖွဲ့ဝင်သစ် ၄ ဦးက ပြုလုပ်သွားမှာ ဖြစ်တယ်လို့ နာဆာအနေနဲ့ အတည်ပြုပါတယ်။ 

ဒီအာကာသယာဉ်မှူးအသစ် ၄ ဦးထဲမှာ အမေရိကန်နိုင်ငံသူ ဂျက်စမင်းမို့ဂ်ဘယ်လီ၊ ဒိန်းမတ် နိုင်ငံသား အန်ဒရေးယက်စ် မိုဂန်ဆန်၊ ဂျပန်နိုင်ငံသား ဆာတိုရှီ ဖူရူကာဝါနဲ့ ရုရှားနိုင်ငံသား ကွန်စတန်တင်း ဘော်ရီဆော့ဗ်တို့ပါဝင်ပြီး ISS မှာ ရှိနှင့်ပြီးသား အဖွဲ့ဝင် ၇ ဦးနဲ့အတူ ပူးပေါင်းသွားမှာပါ။ 

ဒါ့အပြင် စပေ့စ်အိတ်စ်ကုမ္ပဏီရဲ့ ဖယ်လ်ကွန်-၉ ဒုံးကျည်ဟာ အဖွဲ့ဝင်သစ်တွေ လိုက်ပါလာတဲ့ ဒရက်ကွန် အာကာသယာဉ်ကို ဂြိုလ်ပတ်လမ်းအထိ ပို့ဆောင်ပေးခဲ့တာ ဖြစ်ပါတယ်။

အမေရိကန်နိုင်ငံ ဖလော်ရီဒါပြည်နယ်မှာရှိတဲ့ နာဆာအဖွဲ့ရဲ့ ကန်နေဒီ အာကာသ စင်တာကနေ ဒီအာကာသယာဉ် ထွက်ခွာလာခဲ့တာဖြစ်ပြီး အချိန်အားဖြင့် သြဂုတ် ၂၆ ရက် အရှေ့ပိုင်းစံတော်ချိန် မနက် ၃နာရီ ၂၇မိနစ်မှာ ဖြစ်တယ်လို့ သိရပါတယ်။

Source/Photo-Reuters