မကွေးတိုင်းမှာ မိုးရွာသွန်းတာများလို့ မကွေးတိုင်းတောင်ပိုင်း ဧရာဝတီမြစ် အနောက်ဘက်ခြမ်းမှာ အခြေစိုက်တဲ့အရှိုချင်းကာကွယ်ရေးတပ် ACDF ရဲ့ တပ်စခန်းတချို့နဲ့ သီးနှံစိုက်ခင်းတွေ ပျက်စီးခဲ့တယ်လို့ စခန်းတာဝန်ခံဆီကနေ သိရပါတယ်။

မကွေးတိုင်းမှာ ဇူလိုင်လကုန်ပိုင်းကတည်းက မိုးစတင်ရွာနေတာဖြစ်ပြီး ဩဂုတ် ၈ ရက်နေ့ကတည်းက စတင်ပြီး ရေနစ်မြုပ်ကုန်တာဖြစ်ပါတယ်။

ရေနစ်မြုပ်မှုကြောင့် အရှိုချင်းကာကွယ်ရေးတပ် ACDFရဲ့ ရုံးဆောင်၊ စားဖိုဆောင်၊ ရဲဘော်ဆောင် ၂ ဆောင်၊ ကြက်ခြံနဲ့ သီးနှံစိုက်ခင်းတဧက စသည်တို့ပျက်စီးခဲ့ပါတယ်။

အရှိုချင်းကာကွယ်ရေးတပ် ACDFရဲ့ တာဝန်ခံတယောက်က “တပ်ဖွဲ့ဆောင်တွေရော သီးနှံစိုက်ခင်းတွေပါ ရေမြုပ်ကုန်တော့ ပျက်စီးဆုံးရှုံးမှုက အတော်များပါတယ်။ ရဲဘော်တွေကတော့ ရေလွတ်ရာ ပြောင်းနေကြရတာပေါ့။ အရေးပေါ်ပြုပြင်မှူတွေလုပ်သွားမှာပါ” လို့ ပြောပါတယ်။

အရှိုချင်းလူမျိုးတွေနဲ့ ဖွဲ့စည်းထားတဲ့ ချင်းပြည်ကာကွယ်ရေးတပ်-အရှိုဟာ ဧရာဝတီမြစ်အနောက်ဘက်ခြမ်း မကွေးတိုင်းတောင်ပိုင်းမှာအခြေစိုက်ပြီး စစ်အာဏာရှင်ကို တော်လှန်နေတဲ့ တပ်ဖွဲ့ဖြစ်ပါတယ်။