မကွေးတိုင်း၊ မကွေးမြို့နယ်၊ ဆားတိုင်ကန်ကျေးရွာရှိ ဘောလုံးကွင်းအနီးက ရေကန်ထဲမှာ ဩဂုတ် ၁၆ ရက် နေ့လယ်ပိုင်းက ကျောင်းသား ၂ ဦး ရေနစ်သေဆုံးခဲ့တယ်လို့ မြို့ခံလူမှုကူညီရေးအသင်းတွေက ပြောပါတယ်။
ဆားတိုင်ကန်ရွာမှာ နေထိုင်တဲ့ ၆ တန်းကျောင်းသား အသက် ၁၄ နှစ်အရွယ် မောင်စဝ်နိုင်ဘုန်းနဲ့ မောင်သူရဇော်တို့ဟာ နေ့လယ် ၁ နာရီလောက်က အဆိုပါကန်ထဲမှာ ရေဆင်းချိုးရင်း ရေနစ်သွားခဲ့တာ ဖြစ်ပါတယ်။
မကွေးရောင်စုံမေတ္တာအသင်း တာဝန်ရှိသူတဦးက “အသင်းကို သတင်းဝင်တာက မနေ့က ၁ နာရီခွဲလောက်ပါ။ ကလေးတွေကို ရေကလည်း သိပ်မနက်တော့ ရွာသားတွေက ဆင်းပြီးတော့ ဆယ်ထားပေးတာ။ နစ်တာက ၁၅ မိနစ်၊ မိနစ် ၂၀ လောက်ဆိုတော့ ဆင်းဆယ်တဲ့အချိန်နဲ့ အသက်မမီတော့တာ” လို့ ပြောပါတယ်။
ရွာခံတွေက ကလေးငယ်နှစ်ဦး ရေနစ်နေတယ်လို့ ကယ်ဆယ်ရေးအသင်းတွေကို ဖုန်းဆက် အကြောင်းကြားခဲ့ကြတာဖြစ်ပြီး အသင်းတွေ ရောက်ရှိချိန်မှာတော့ ကလေး ၂ ယောက်စလုံး အသက်မရှိတော့ဘူးလို့ သိရပါတယ်။
အဆိုပါဖြစ်စဉ်နေရာကို မကွေးရောင်စုံမေတ္တာအသင်းနဲ့ မကွေးပရဟိတမင်းခေါင်အသင်းတို့ရဲ့ လူနာတင်ယာဉ်တွေနဲ့ မကွေးပြည်သူ့ဆေးရုံကြီး ရင်ခွဲရုံကို ပို့ဆောင်ပေးခဲ့တာ ဖြစ်ပါတယ်။
