ရန်ကုန်၊ ဒဂုံမြို့သစ် (မြောက်ပိုင်း) မြို့နယ်၊ တိုးကြောင်ကလေးဘူတာအနား အမှတ် ၂ လမ်းမကြီးပေါ်မှာ ဩဂုတ် ၁၃ ရက် မနက်ပိုင်းက ကား နှစ်စီးတိုက်မိပြီး ထိခိုက်ဒဏ်ရာရသူ ၉ ဦးအနက် ၄ ဦး စိုးရိမ်ရဒဏ်ရာ ရရှိခဲ့တယ်လို့ မြို့ခံကယ်ဆယ်ရေးအသင်းတွေက ပြောပါတယ်။

မနက် ၆ နာရီ မိနစ် ၄၀ လောက်က တိုယိုတာမာ့ခ်တူး အိမ်စီးကားဟာ လမ်းပြောင်းပြန် ကျော်တက်ရာကနေ လူ ၉ ဦးကျော်ပါတဲ့ ဈေးကြိုလိုက်ထရပ်ကားနဲ့ တိုက်မိခဲ့တာ ဖြစ်ပါတယ်။

စေတနာရှင်ပရဟိတအသင်း ဥက္ကဋ္ဌက “အိမ်စီးရွှေငါး (မာ့ခ်တူး) ကားလေးနဲ့ လိုက်ထရပ် ဈေးကြိုကားတို့ တိုက်မိတာပါ။ ကြီးကြီးမားမားဖြစ်တာတော့ ၄ ဦးပါ။ ယောက်ျားလေး ၁ ဦးက ခေါင်းပိုင်း တော်တော်ထိထားတယ်၊ ကျိုးလည်း ကျိုးထားတယ်။ မိန်းကလေး ၃ ဦးမှာ ကိုယ်ဝန်သည် ၁ ဦးပါတယ်။ ထိခိုက်တာအားလုံးက ဈေးကားကလူတွေပါ” လို့ ပြောပါတယ်။

ယာဉ်တိုက်မှုကြောင့် ဈေးကြိုကား တိမ်းမှောက်သွားကာ ကားပေါ်ပါ လူနာစုစုပေါင်း ၉ ဦး အနက် အသက် ၂၈ နှစ်အရွယ် အမျိုးသား ၁ ဦးနဲ့ အသက် ၃၀ ကျော်အရွယ် ကိုယ်ဝန်သည် အမျိုးသမီး ၁ ဦး အပါအဝင် အမျိုးသမီး ၃ ဦးတို့မှာ ဦးခေါင်းထိခိုက် ပြင်းထန်ဒဏ်ရာတွေ ရရှိခဲ့ပါတယ်။

ထိခိုက်မှုပြင်းထန်တဲ့ လူနာ ၄ ဦးကို စေတနာရှင်ပရဟိတအသင်းယာဉ် ၂ စီးနဲ့ သင်္ဃန်းကျွန်း စံပြဆေးရုံကို အရေးပေါ်ပို့ဆောင်ပေးထားပြီး မစိုးရိမ်ရလူနာ ၅ ဦးကို H Rescue အရေးပေါ် ကယ်ဆယ်ရေးအသင်းက ဆေးကုသမှု ပြုလုပ်ပေးခဲ့တယ်လို့ သိရပါတယ်။