စစ်ကိုင်းတိုင်း၊ ကနီမြို့နယ်ထဲမှာ ဩဂုတ် ၁၀ ရက်နေ့က စစ်ကောင်စီတပ်နဲ့ တော်လှန်ရေးတပ်တွေ တိုက်ပွဲ ၆ ကြိမ်ဖြစ်ခဲ့ပြီး ဒီရက်ပိုင်းတိုက်ပွဲတွေကြောင့် တော်လှန်ရေးတပ်ဘက်က ၄ ယောက်ကျဆုံးခဲ့ပါတယ်။

ယင်းမာပင်ခရိုင်၊ ကနီမြို့မှာ ဩဂုတ် ၁၀ ရက်နေ့ မနက်ပိုင်းက စစ်ကောင်စီတပ်အင်အား ၆၀ လောက်ဟာ ကနီမြို့ပေါ်ကနေ မြောင်းကျေးရွာဘက်ကို အလာ တံတားနားမှာ တိုက်ပွဲစဖြစ်ခဲ့ပြီး မနက် ၈ နာရီလောက်မှာတော့ ကနီမြို့ပေါ်ရဲစခန်းကို ဗုံးသီးချတိုက်ခိုက်ခဲ့တယ်လို့ ကျောက်လုံးကြီးတပ်မဟာ KLG က ဩဂုတ် ၁၁ ရက်နေ့ ညနေပိုင်းမှာထုတ်ပြန်ပါတယ်။

မနက် ၉ နာရီမှာလည်း ရေလယ်ကျွန်းပျူကျေးရွာကို ရိက္ခာပို့လာတဲ့ စစ်ကြောင်းကို ၂ ကြိမ် မိုင်းဆွဲ တိုက်ခိုက်ခဲ့သလို ရှမ်းမြောင်းရွာဘက်က စစ်ကောင်စီအင်အား ၁၀၀ လောက်ကိုလည်း စောင့်ကြိုတိုက်ခိုက်ခဲ့တဲ့ပြီး စစ်ကောင်စီတပ်သား ၁၅  ယောက် သေဆုံးခဲ့တယ်လို့ ဆိုပတါယ်။

ထိတွေ့တိုက်ပွဲမှာ စစ်ကောင်စီဘက်က ပစ်ခတ်တဲ့ လက်နက်ကြီးကျည် ထိမှန်ပြီး အမှတ် ၁ စစ်ဒေသ ယင်းမာပင်ခရိုင်၊ ပြည်သူ့ကာကွယ်ရေးတပ်မတော် အမှတ် ၂၁ တပ်ရင်းရဲ့ တပ်ခွဲမှူး ကိုနိုင်ဝင်းကျဆုံးခဲ့ပြီး ရဲဘော်တယောက်လည်း ထိခိုက်ဒဏ်ရာ ရခဲ့ပါတယ်။

ကျောက်လုံးကြီးတပ်မဟာ တာဝန်ရှိသူတယောက်က “ ကိုနိုင်ဝင်းရဲ့ စျာပနကိုတော့ ဒီကနေ့ (ဩဂုတ် ၁၁ရက်) မှာ ပြုလုပ်ခဲ့ပါတယ်။ ဒဏ်ရာရ ရဲဘော်ကတော့ ပေါင်ကိုထိမှန်ပြီး ၅ ချက် ချုပ်ထားရပါတယ်” လို့ ပြောပါတယ်။

အဲဒီစစ်ဆင်ရေးတွေကို ယင်းမာပင်ခရိုင်တပ်ရင်း ၂၁၊ ၂၂ နဲ့ ၂၃၊ KGL PDF အဖွဲ့နဲ့ ပြည်ထောင်စုလွတ်မြောက်ရေးတပ်ဦး ULF တို့က ပူးပေါင်းတိုက်ခိုက်ခဲ့တာဖြစ်ပါတယ်။

ဩဂုတ် ၆ ရက်နေ့ကလည်း ယင်းမာပင်ခရိုင်၊ ကနီမြို့နားမှာ စစ်ကြောင်းထိုးလာတဲ့ စစ်ကောင်စီစစ်ကြောင်း အင်အား ၃ဝဝ လောက်နဲ့ ဒေသကာကွယ်ရေးတပ်တွေ တိုက်ပွဲဖြစ်ခဲ့ပြီး ပြည်သူ့ကာကွယ်ရေးတပ်ဘက်က ရဲဘော် ၃ ယောက် ကျဆုံး၊ ၅ ယောက် ဒဏ်ရာရရှိခဲ့တယ်လို့ မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း  ၄ ပြန်ကြားရေးဘက်က သိရပါတယ်။

တိုက်ပွဲအတွင်း စစ်ကောင်စီဘက်က လက်နက်ကြီးပစ်ကူတွေ သာလွန်နေတာကြောင့် ကျဆုံးခဲ့ရတာဖြစ်ပြီး အင်တာနက်လိုင်းအခက်အခဲနဲ့ ရဲဘော်တွေရဲ့ ဈာပနကိစ္စတွေ ဆောင်ရွက်နေရလို့ သြဂုတ် ၁၁ ရက်နေ့မှာမှ ထုတ်ပြန်လာခဲ့တာပါ။

 တပ်ရင်း ၄ ပြန်ကြားရေးတာဝန်ခံက "တိုက်ပွဲဖြစ်တာက ၆ ရက်နေ့ကပါ။သူတို့ဘက်က အင်အား ၃ဝဝ ဝန်းကျင်ရှိပါတယ်ဗျ။ တိုက်ပွဲအတွင်းမှာ စစ်ကောင်စီတပ်ဖွဲ့တွေ တပ်စွဲထားတဲ့ အနောက်မြောက်တိုင်းစစ်ဌာနချုပ်-နမခ၊ ရွှေတောင်ဦးကုန်းနဲ့ ကျောက်စစ်ပုံ ဒေသမှာရှိတဲ့ အမြောက်တပ်တွေကနေ လက်နက်ကြီးတွေနဲ့ ပစ်ခတ်ခဲ့ပါတယ်။ သူတို့ဘက်က အထိအခိုက်ကိုတော့အတည်မပြုနိုင်သေးပါဘူး" လို့ ဒီဗွီဘီကို ပြောပါတယ်။

အဲဒီတိုက်ပွဲမှာ မုံရွာခရိုင်ပြည်သူ့ကာကွယ်ရေးတပ်မတော် (Chindwin Attack Force) တပ်ရင်း ၄၊ တပ်ခွဲ ၃၊ Monywa NightKing PDF၊Union Liberation Front-UFL တပ်ပေါင်းစု၊ MRDA တပ်ရင်း ၆၊ တပ်ခွဲ ၁ နဲ့ တခြားဒေသခံ မဟာမိတ်တပ်ဖွဲ့တွေက ပူးပေါင်းပါဝင်တိုက်ခိုက်ခဲ့တယ်လို့ဆိုပါတယ်။

လက်ရှိမှာတော့ စစ်ကောင်စီတပ်ဖွဲ့က ယင်းမာပင်ဒေသ အပါအဝင် စစ်ကိုင်းတိုင်းရဲ့ နေရာအနှံ့အပြားကို ဆက်တိုက်ဆိုသလို စစ်ကြောင်းထိုးဝင်ရောက်နေတဲ့အတွက် ပြည်သူတွေလည်း ဘေးလွတ်ရာကို စစ်ရှောင်နေကြရပြီး ပြည်သူ့ကာကွယ်ရေးတပ် တွေအနေနဲ့လည်း တိုက်ပွဲတွေကြောင့် လက်နက်ခဲယမ်းတွေလိုအပ်နေတယ်လို့ သိရပါတယ်။

တိုက်ပွဲတွေမှာ စစ်ကောင်စီရဲ့ထိခိုက်ကျဆုံးစာရင်းတွေကို တော်လှန်ရေးတပ်ဖွဲ့တွေက ထုတ်ပြန်ခဲ့တာဖြစ်ပြီး ဒီဗွီဘီအနေနဲ့ သီးခြားအတည်မပြုနိုင်ပါဘူး။