မကွေးတိုင်း၊ ဂန့်ဂေါမြို့နယ်၊ အနောက်ဂန့်ဂေါရွာမှာ စစ်ကောင်စီက ဒေသခံ အမျိုးသား ၂ ဦးကို ပစ်သတ်ခဲ့ပြီး အရပ်သားတချို့ကို ဖမ်းဆီးထားကာ နေအိမ်တလုံးကိုလည်း မီးရှို့ဖျက်ဆီးထားတယ်လို့ ဒေသခံတွေဆီက သိရပါတယ်။
ဩဂုတ် ၁၀ ရက် နေ့လယ်က မြင်းဇာရွာသားနဲ့ မန်းကျည်းခင်ရွာသား ၂ ဦးဟာ အနောက်ဂန့်ဂေါရွာကို လာစဉ် စစ်ကောင်စီစစ်ကြောင်းနဲ့တိုးပြီး ပစ်သတ်ခံလိုက်ရကာ အနောက်ဂန့်ဂေါရွာသား ကိုဝေဇင်အောင် အပါအဝင် အရပ်သား ၅ ဦးခန့် ဖမ်းဆီးခံထားရတယ်လို့ ဆိုပါတယ်။
အနောက်ဂန့်ဂေါရွာခံတဦးက “ရွာက အသက်ကြီးပိုင်းတွေကတော့ ရွာမှာပဲ အိမ်ထဲနေကြတာများတယ်။ လူငယ် လူလတ်ပိုင်းတွေပဲ ပြေးကြတာ။ ဝေဇင်အောင်ကတော့ လူလည်းဖမ်းခံရ၊ အိမ်လည်း မီးရှို့ခံရတယ်” လို့ ဒီဗွီဘီကို ပြောပါတယ်။
အဆိုပါ အနောက်ဂန့်ဂေါရွာမှာ အိမ်ခြေ ၄၀၀ ကျော်ရှိပြီး ဒေသခံ ၁,၅၀၀ ဝန်းကျင် နေထိုင်တယ်လို့ သိရပါတယ်။
စစ်ကောင်စီက သြဂုတ် ၉ ရက်ကစပြီး အနောက်ဂန့်ဂေါဘက်ကို စစ်ကြောင်းထိုးလာကာ အင်အားအများအပြားနဲ့ ကင်းပုန်းတွေချထားတာကြောင့် စစ်ကြောင်းရှိရာအနီးကို ကပ်လို့မရတဲ့ အနေအထား ဖြစ်နေတယ်လို့ ဂန့်ဂေါနယ် PDF တပ်ဖွဲ့ဝင်တဦးက ပြောပါတယ်။
ဇူလိုင် ၂၆ ရက်ကလည်း ဂန့်ဂေါမြို့ အေမြာက်တပ်အနီးက ပြည့်မရွာစာသင်ကျောင်းမှာ တပ်စွဲနေထိုင်တဲ့ စစ်ကောင်စီပူးပေါင်းတပ်တွေကို CDF-KKG ပူးပေါင်းတပ်ဖွဲ့က ပစ်ခတ်တိုက်ခိုက်ခဲ့ပါသေးတယ်။
