ကမ္ဘာအေးဘုရားလမ်းတွင် ယာဉ်တိုက်မှုဖြစ်ပြီး အမျိုးသမီး ၃ ဦး ဒဏ်ရာရ
DVBရန်ကုန်တိုင်း ဗဟန်းမြို့နယ်၊ ဦးထောင်ဘိုအဝိုင်းအနီး ကမ္ဘာအေးဘုရားလမ်းပေါ်မှာ ကား ၂ စီး မျက်နှာချင်းဆိုင်တိုက်မိတာကြောင့် အမျိုးသမီး ၃ ယောက် ဒဏ်ရာရရှိခဲ့တယ်လို့ မျက်မြင်တွေ့သူတွေက ပြောပါတယ်။
ဇူလိုင် ၂၁ ရက် ည ၁၀နာရီ ၁၅ မိနစ်အချိန်မှာ ဦးထောင်ဘိုအဝိုင်းကို ပတ်လာတဲ့ ပါဂျဲရိုးကားက ကာဒီးနားကားကို ဝင်တိုက်မိပြီး အတိုက်ခံရတဲ့ ကားပေါ်က အမျိုးသမီး ၃ ယောက် ဒဏ်ရာရရှိခဲ့တာပါ။
အမျိုးသမီး ၃ ယောက်ဟာ စမ်းချောင်းမြို့နယ်ကဖြစ်ပြီး ယာဉ်မောင်း ခါးထိဒဏ်ရာ၊ ဘေးမှာထိုင်သူ ညှပ်ရိုးဒဏ်ရာနဲ့ နောက်ခန်းမှာထိုင်သူ ခြေထောက်ဒဏ်ရာတို့ ရရှိခဲ့ပါတယ်။
မျက်မြင်တွေ့သူက “ပါဂျဲရိုးကားက မှားတာပါ။ အဝိုင်းပတ်တုန်းက တခြားကား တစီးကို ပွတ်ခဲ့သေးတယ်။ အဝိုင်းပတ်အပြီးမှ ဒီကားကို ထပ်တိုက်တာပါ” လို့ ပြောပါတယ်။
ဒဏ်ရာရရှိတဲ့ အမျိုးသမီးတွေဟာ ရန်ကုန်ပြည်သူ့ဆေးရုံကြီးမှာ ဆေးကုသမှုခံယူနေပါတယ်။
