မကွေးတိုင်း ရေစကြိုမြို့နယ်မှာ ဇူလိုင် ၁၉ ရက်နေ့မနက်က စစ်ကောင်စီတပ်သားတွေ စီးနင်းတိုက်ခိုက်ခံရပြီး ထိခိုက်သေဆုံးသူ များပြားခဲ့တယ်လို့ မြင်းခြံကျားနက်တပ်ဖွဲ့ MBT ကနေ သိရပါတယ်။

MBT တပ်ဖွဲ့ရဲ့ အမှတ် (၅) စစ်ဆင်ရေးနယ်မြေဖြစ်တဲ့ ရေစကြိုမြို့နယ် ဟသ်ာ(ရွာမ)ကျေးရွာမှာ တပ်စွဲထားတဲ့ စစ်ကောင်စီတပ်စခန်းကို ဇူလိုင် ၁၉ ရက်နေ့ မနက် ၅ နာရီလောက်မှာ အာဇာနည်နေ့ကို ဂုဏ်ပြုတဲ့အနေနဲ့ ဝင်ရောက်စီးနင်းတိုက်ခိုက်ခဲ့တယ်လို့ မြင်းခြံ Black Tiger တပ်ဖွဲ့ရဲ့ ခေါင်းဆောင် ဗိုလ်မိုက်ခဲက ဒီဗွီဘီကို ပြောပါတယ်။

နှစ်ဘက်အပြန်အလှန်ထိတွေ့တိုက်ပွဲ နာရီဝက်လောက်ဖြစ်ပွားခဲ့ပြီး RPG 7 ပြောင်းကွဲသွားလို့ စခန်းမသိမ်းနိုင်ခဲ့ဘဲ ပြည်သူ့ကာကွယ်ရေး ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့ကြတယ်လို့ ဆိုပါတယ်။

အဲဒီတိုက်ခိုက်မှုအတွင်းမှာ သူတို့တပ်စွဲထားတဲ့ အဆောက်ဦတခု ပြိုကျပျက်စီးခဲ့ပြီး စစ်ကောင်စီတပ်သား အများအပြား သေဆုံးဒဏ်ရာရရှိတာကို မျက်မြငတွေ့ခဲ့ရပေမယ့် အရေအတွက် အတိအကျမသိရသေးလို့ ပြောပါတယ်။

ရေစကြိုမြို့နယ်မှာ ဇူလိုင် ၁ ရက်နေ့ ညနေကလည်း စစ်ကောင်စီတပ်သားတွေတိုက်ခိုက်ခံရပြီး ထိခိုက်သေဆုံးသူများပြားနိုင်တယ်လို့ မြင်းခြံကျားနက်တပ်ဖွဲ့-MBT ကနေ သိရပါတယ်။

မကွေးတိုင်း မြိုင်မြို့နယ်မှာ ဇူလိုင် ၁၉ ရက်နေ့က စစ်ကောင်စီတပ်သားတွေနဲ့ ပျူစောထီးတွေတိုက်ခိုက်ခံရပြီး ထိခိုက်သေဆုံးသူရှိနိုင်တယ်လို့ မြိုင် ပကဖ ကနေသိရပါတယ်။

မြိုင်မြို့နယ် ဝက်ပုတ်ပျူစောထီးစခန်းက စစ်ကောင်စီတပ်သားတွေနဲ့ ပျူစောထီးတွေကို ဇူလိုင် ၁၉ ရက်နေ့ မနက် ၉ နာရီလောက်မှာ ပြည်သူ့ကာကွယ်ရေးပူးပေါင်းတပ်ဖွဲ့တွေက လက်နက်ကြီးနဲ့ အချက် ၅၀ လောက် ၁ နာရီလောက်ကြာအောင် ပစ်ခတ်တိုက်ခိုက်ခဲ့ကြတယ်လို့ မြိုင်ပကဖ တပ်ရင်း ၁ တပ်ရင်းမှူး ဗိုလ်လက်ယာက ပြောပါတယ်။

အဲဒီတိုက်ခိုက်မှုအတွင်းမှာ သူတို့ရဲ့ ဘန်ကာနားကို လက်နက်ကြီးကျည်တွေ ကျရောက်ပေါက်ကွဲခဲ့ ပြီး စစ်ကောင်စီဘက်က ထိခိုက်သေဆုံးသူ များပြားနိုင်တယ်လို့ ဆိုပါတယ်။

ဒါအပြင် တွင်းမပျူစောထီးစခန်းကိုလည်း မွန်းလွဲ ၁ နာရီလောက်မှာ မောင်းသူမဲ့ လေယာဥ်ငယ်နဲ့ အီနာဂါဗုံးသီး အလုံး ၂၀ လောက်ဖြုတ်ချတိုက်ခိုက်ခဲ့လို့ သူတို့နေတဲ့ အဆောင်တွေထိခိုက်ပျက်စီးသွားပြီး စစ်ကောင်စီဘက်က ၃ ယောက်ဒက်ရာရရှိခဲ့ပြီး ပျူစောထီးခေါင်းဆောင် ကျော်ကျော်လှရဲ့ နေအိမ်ကိုလည်း အီနာဂါဗုံးသီး ၄ လုံးဖြုတ်ချတိုက်ခိုက်ခဲ့တယ်လို့ ပြောပါတယ်။

စစ်ကောင်စီတပ်သားတွေ အထိုင်ချတပ်စွဲထားတဲ့ ကန်နီပျူစောထီးကျေးရွာကိုလည်း မနက် ၁၀ နာရီခွဲလောက်က အာဇာနည်နေ့ အထိမ်းမှတ်အဖြစ် ဒရုန်းနဲ့ အီနာဂါဗုံးသီး ၂ လုံး၊မောင်းသူမဲ့လေယာဥ်ငယ်နဲ့ မီးလောင်ဗုံး ၇ လုံးဖြုတ်ချတိုက်ခိုက်ခဲ့ပြီး ထိခိုက်သေဆုံးတဲ့ အခြေနေကိုတော့ မသိရသေးဘူးလို့ဆိုပါတယ်။

မြိုင်မြို့မြောက်ဘက် စစ်ဆေးရေးဂိတ်ကိုလည်း ဇူလိုင် ၁၈ ရက်နေ့မှာ အီနာဂါ ဗုံးသီးတွေနဲ့တိုက်ခိုက်ခဲ့လို့ စစ်ကောင်စီတပ်သား ၂ ယောက် အပြင်းထန်ဒဏ်ရာရရှိခဲ့တယ်လို့ မြိုင်ပကဖကနေ သိရပါတယ်။

တိုက်ခိုက်မှုတွေအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေအနေကို သတင်းထုတ်ပြန်ထားတာ မတွေ့ရသေးသလို ဒီဗွိဘီက သီးခြားအတည်မပြုနိုင်သေးပါဘူး။