ကချင်ပြည်နယ်၊ ဖားကန့်မြို့နယ်မှာ ဆိုင်ကယ်မောင်းနှင်လာသူ အမျိုးသားတဦးထံက ငွေ၊ ကျောက်စိမ်းနဲ့ ဆိုင်ကယ်ကို အမည်မသိ လူ ၅ ဦးက ဓားပြတိုက်သွားတယ်လို့ ဒေသခံတွေက ပြောပါတယ်။
ဆိုင်းတောင် ယူမာလမ်းမကြီးမှာရှိတဲ့ Sky Bar အနီးမှာ ဇူလိုင် ၁၇ ရက် ညနေက ဆိုင်ကယ်မောင်းနှင်လာတဲ့ အမျိုးသားတဦးကို မျက်နှာဖုံးတပ်ဆင်ထားတဲ့ လူငါးဦးက သေနတ်ပြ ခြိမ်းခြောက်ပြီး ပစ္စည်းတွေ ဓားပြတိုက်သွားတာလို့ ဓားပြတိုက်ခံရသူနဲ့ နီးစပ်သူ အမျိုးသားတဦးက ပြောပါတယ်။
“ညနေ ၄ နာရီလောက် ဖြစ်တာ။ ကျောက်ဝိုင်းကအပြန် လမ်းမှာ ဓားပြတိုက်ခံရတာ။ SKY Bar နားမှာ လူကလည်း ပြတ်တယ်။ မျက်နှာမှာ Mask တပ်၊ ဦးထုပ်ဆောင်းထားတဲ့ လူ ၅ ဦးက ဆိုင်ကယ်ရပ်ခိုင်းပြီး သေနတ်နဲ့ချိန်တယ်။ ဓားနဲ့ထောက်ပြီး ပါတဲ့ပစ္စည်းတွေလည်း အကုန်ယူသွားတယ်။”
သေနတ်ပြ ဓားထောက် ခြိမ်းခြောက်ပြီး ငွေကျပ်သိန်းသုံးနဲ့ ကျောက်စိမ်းတွေအပြင် စီးနင်းလာတဲ့ ဆိုင်ကယ်ကိုပါ အမည်မသိ မျက်နှာဖုံးတပ်ဆင်ထားသူ ၅ ဦးက ဓားပြတိုက် လုယူသွားတာပါ။
ဖားကန့်မြို့နယ်မှာ ပြီးခဲ့တဲ့ မေ ၂၈ ရက် ညကလည်း ကျောက်စိမ်းအရောင်းအဝယ်လုပ်ကိုင်သူ တရုတ်အမျိုးသား လောပန်းတဦးအိမ်မှာ တန်ဖိုးကြီး ကျောက်စိမ်းနှစ်တုံး၊ ရွှေချောင်း၊ ငွေသားတွေ အပါအဝင် တန်ဖိုးကြီးကားနှစ်စီးကို အမျိုးသား ၆ ဦးက ဓားပြတိုက် လုယက်ခဲ့ပါသေးတယ်။
စစ်အာဏာသိမ်းပြီးနောက်ပိုင်း ဖားကန့်မြို့နယ်မှာ သေနတ်ပစ်ခတ်မှု၊ ပိုင်ရှင်မဲ့အလောင်း စွန့်ပစ်မှု၊ အနုကြမ်းစီး ဓားပြတိုက်မှု၊ လုယက် သတ်ဖြတ်မှု၊ ပြန်ပေးဆွဲမှုတွေ မကြာခဏ ဖြစ်နေပြီး စစ်ကောင်စီလက်အောက်ခံ ရဲတပ်ဖွဲ့ကတော့ ဖမ်းဆီးအရေးယူနိုင်တာ မရှိသေးပါဘူး။
