စစ်ကိုင်းတိုင်း၊ တန့်ဆည်မြို့နယ်ထဲမှာ ဒီမနက်ပိုင်းက စစ်ကောင်စီတပ်နဲ့ ပြည်သူ့ကာကွယ်ရေးတပ်ပေါင်းစုတို့ တိုက်ပွဲဖြစ်ပွားပြီး စစ်ကောင်စီဘက်က အနည်းဆုံး ၁၀ ယောက် သေဆုံးခဲ့တယ်လို့ တန့်ဆည်မြို့နယ်၊ ပြည်သူ့ကာကွယ်ရေး ခေါင်းဆောင်တွေဆီကနေ သိရပါတယ်။
တန့်ဆည်မြို့ ဘောလုံးကွင်းကနေ အင်အား ၁၀၀ ကျော်နဲ့ စစ်ကြောင်းထိုးလာတဲ့ စစ်ကောင်စီတပ်တွေနဲ့ သပြေရင်းရွာအနီး ပဲခင်းကြီးတောရကျောင်းနားမှာ ဒီနေ့ဇူလိုင် ၁၅ ရက်နေ့ မနက် ၅ နာရီခွဲအချိန်က တိုက်ပွဲဖြစ်ခဲ့တာပါ။
ကာကွယ်ရေးအဖွဲ့တာဝန်ရှိသူတယောက်က “ထိတွေ့မှုက မီတာ ၁၀၀ အတွင်းမှာ ဖြစ်တာဆိုတော့ တိုက်ပွဲကပြင်းထန်တယ်လို့ပြောလိုရတယ်။ ကိုယ်တွေဘက်က ကြိုစောင့်ပြီး အသင့်အနေထားနဲ့ တိုက်တာဆိုတော့ ေ-ွးတွေ အတော် အထိနာသွားတယ်။ အဲလိုအထိနာလို့လည်း နမခကနေ Mi35 နဲ့လေကြောင်းကနေ ပစ်ခတ်တာတွေလုပ်သွားတယ်။ လေယာဉ်ပေါ်ကနေ ဗုံးသီး ၉ လုံး တောတွေထဲ ပတ်ချသွားတယ်။ လက်နက်ငယ်တွေနဲ့ပစ်တာလည်းလုပ်သွားတယ်။ ေ-ွး အသေကတော့ ၁၀ အထက်မှာရှိမယ်ဗျ။ ကိုယ့်ဘက်ကတော့ တိုက်ပွဲအတွင်းမှာ ရဲဘော် ၁ ယောက်ကျပြီး ၂ ယောက် ဒဏ်ရာရတယ်။ ဒဏ်ရာရ ရဲဘော် ၂ ယောက်ကိုတော့ ဆေးကုသပေးနေပြီ” လို့ ပြောပါတယ်။
ဒေသခံတွေကလည်း တိုက်ခိုက်ရေးရဟတ်ယာဉ်ဟာ တန့်ဆည်နယ်အနောက်ခြမ်းက မြေပြင်စစ်ကြောင်းဝင်နေတဲ့ သပြေရင်း၊ ပဲခင်းကြီး၊ ခရမ်းခြံ စတဲ့ရွာတွေကို တိုက်ခိုက်သွားတာလို့ ဆိုပါတယ်။
လက်ရှိမှာ အဲဒီစစ်ကောင်စီစစ်ကြောင်းဟာ တန့်ဆည်ပြည်သူကာကွယ်ရေးတပ်ပေါင်းစုနဲ့ တိုက်ပွဲ ဖြစ်ပွားပြီး ကံထူးမရွာကို ရောက်ရှိသွားပြီလို့လည်း ဒေသခံတွေက ပြောပါတယ်။
