စစ်ကောင်စီတပ်က ဇူလိုင် ၃ ရက်မနက်ကစပြီး ပိတ်ထားတဲ့ ကလိန်အောင်-ကံပေါက်လမ်းပိုင်းကို ဇူလိုင် ၅ ရက်မနက်က ပြန်လည်သွားလာခွင့်ပြုလိုက်ပြီလို့ ကံပေါက်ဒေသခံတွေက ပြောပါတယ်။
“အကုန်ပေးသွားလိုက်ပါပြီ။ ဘေးတွဲတွေရော၊ ကားတွေရော အကုန်သွားလို့ရပါပြီ” လို့ ကံပေါက်ဒေသခံ ကားသမားတဦးက ပြောပါတယ်။
ကံပေါက် ကလိန်အောင်လမ်းပိုင်းမှာ စစ်ကောင်စီတပ်သားတွေ နေရာယူ ဂိတ်ချစစ်ဆေးတာ မရှိတော့ဘဲ ဇူလိုင် ၅ ရက် မနက်မှာ အရပ်ဝတ်လက်နက်ကိုင်တွေပါတဲ့ စစ်ကားတစီးနဲ့ ကင်းလှည့်နေတာတော့ တွေ့ရတယ်လို့ ဆိုပါတယ်။
ဇူလိုင် ၅ ရက် ညနေမှာ စစ်ကောင်စီတပ်သားတွေ အပြည့်လိုက်ပါလာတဲ့ စစ်ကားငယ် ၃ စီး ကံပေါက်ရွာအတွင်း ရောက်ရှိနေပြီး ညဘက်အထိ ကင်းလှည့်ခဲ့တယ်လို့ ဒေသခံတွေက ပြောပါတယ်။
ဇူလိုင် ၃ ရက်နဲ့ ၄ ရက်တွေမှာ စစ်ကောင်စီက ကလိန်အောင်-ကံပေါက်လမ်းကို ၂ ရက်ကြာ ပိတ်ခဲ့တာကြောင့် လမ်းပန်းဆက်သွယ်ရေး ပြတ်တောက်ခဲ့ပြီး ဒေသခံတွေ အခက်အခဲဖြစ်ခဲ့ရပါတယ်။
အခုလို လမ်းပိတ်တာတွေ မပြုလုပ်မီ ဇွန် ၂၇ ရက်နဲ့ ဇူလိုင် ၂ ရက်နေ့တွေမှာ မောရဝတီရေတပ်က စစ်ကောင်စီတပ်သားတွေ တပ်ကိုစွန့်ခွာပြီး အစုလိုက်အပြုံလိုက် ထွက်ပြေးခဲ့ကြပါတယ်။
ထွက်ပြေးသွားတဲ့ စစ်သားတွေကို ပိတ်ဆို့ဖမ်းဆီးနိုင်ဖို့ ကံပေါက်-ကလိန်အောင်လမ်းပိုင်းကို ၂ ရက်ကြာ ပိတ်ဆို့ရှာဖွေခဲ့ပေမဲ့ ပြန်လည်မဖမ်းမိတော့ဘဲ လွတ်မြောက်သွားပြီလို့ သိရပါတယ်။
ဇူလိုင် ၄ ရက်နေ့ နေ့လယ်ပိုင်းက တနင်္သာရီတိုင်း ရေဖြူမြို့နယ် ကံပေါက်ဒေသ သဲချောင်းကျေးရွာ နေအိမ်ကနေပျောက်ဆုံးသွားတဲ့ အသက် ၃ နှစ်အရွယ် မနဒီရွှေစင်အား ဒီနေ့အထိ ပြန်ရှာမတွေ့သေးဘူးလို့ သိရပါတယ်။
မိခင်ဖြစ်သူ ဒေါ်ဇင်မာသက်ဟာ ဇူလိုင် ၄ ရက် မွန်းတည့်ပိုင်းက နွားသွားကျောင်းပြီး ပြန်လာစဉ် နေအိမ်မှာ ကစားဖို့ထားခဲ့တဲ့ သမီးဖြစ်သူအား ရှာမတွေ့တော့တာကြောင့် အိမ်နီးချင်းတွေကို အကူအညီတောင်းပြီး လိုက်လံရှာဖွေခဲ့တာလို့ သဲချောင်းရွာသားတဦးက ပြောပါတယ်။
"ကလေး အဖေနဲ့အကိုက ရပ်ဝေးမှာပါ။ ကလေးအမေနဲ့ ကလေးက အတူနေတာ အခုပျောက်သွားတော့ တရွာလုံး ဝိုင်းကူရှာပေးနေကြပါတယ်။ အမြန်ဆုံးပြန်တွေ့ဖို့လည်း ဆုတောင်းပေးနေကြပါတယ်။"
ကလေးစပျောက်တဲ့ ဇူလိုင် ၄ ရက်နဲ့ ၅ ရက် ညနေပိုင်းအထိ သဲချောင်းကျေးရွာပတ်ဝန်းကျင်ရှိ လူနေအိမ်ရပ်ကွက်တွေအပြင် ဥယျာဉ်ခြံတွေနဲ့ချောင်းမြောင်းတွေအထိ လိုက်ရှာနေပေမဲ့ ပျောက်ဆုံးနေတဲ့ ကလေးကို ပြန်မတွေ့သေးဘူးလို့ ဆိုပါတယ်။
ကံပေါက်တိုက်နယ်အတွင်းက ကျေးရွာတွေမှာလည်း ကလေးငယ်အား တွေ့ရှိပါက မိသားစုကို ဆက်သွယ်အကြောင်းကြားပေးဖို့ မိသားစုက အကူအညီတောင်းခံထားပါတယ်။
ကံပေါက်တိုက်နယ်က ကျေးရွာတွေမှာ အရင်က အခုလို ကလေးပျောက်ဆုံးမှုဖြစ်စဉ်မျိုးတွေ မရှိခဲ့ဖူးဘူးလို့ ဒေသခံတွေက ပြောပါတယ်။
